Дэлхийн хүн ам 2200 он гэхэд 4 тэрбум орчим болж буурвал байгаль орчинд үзүүлэх дарамт багасаж, уур амьсгалын өөрчлөлт удааширч, зэрлэг амьтад олшрох боломжтой гэж судлаачид үзжээ. Тодруулбал, 1970-2020 оны хооронд дэлхийн хүн ам болон байгаль орчны өөрчлөлтийг судалсан тайлан "Sustainable Development" сэтгүүлд нийтлэгдсэн байна. Судалгаанд сүүлийн 50 жилд дэлхийн хүн ам хоёр дахин нэмэгдсэнийг онцолсон.

Энэ хугацаанд эрчим хүчний хэрэглээ бараг гурав дахин, газрын хэвлийгээс олборлосон ашигт малтмалын хэмжээ дөрөв дахин нэмэгдсэн байна. Харин хуванцар үйлдвэрлэл 13 дахин өсжээ. Өнөөдөр дэлхийн нэг хүн жилд дунджаар долоон тонн ашигт малтмалын хэрэглээтэй тэнцэх хэмжээний нөөц ашигладаг байна. Мөн нэг хүнд жилд 60 орчим кг хуванцар ногдож байгаа нь 1970 оныхоос зургаа дахин их юм.

Хүн ам нэмэгдэхийн зэрэгцээ хот, зам, үйлдвэр, тариалангийн талбай олширч, ой мод болон зэрлэг амьтдын амьдрах орчин багасжээ. Судалгаанд хамрагдсан 5000 гаруй зэрлэг амьтны тоо 1970-2020 онд дунджаар 73 хувиар буурсан байна. Судлаачид дэлхийн хүн амын ирээдүйг хоёр хувилбараар тооцоолсон аж. Хэрэв хүн амын өсөлт цаашид удааширвал 2100 онд дэлхийн хүн ам 6.9 тэрбум, 2200 онд 4.1 тэрбум орчим болж буурч магадгүй.

Ийм нөхцөлд нүүрсхүчлийн хийн ялгаруулалт хоёр дахин багасаж, хуванцар үйлдвэрлэл эрс буурах боломжтой гэж судлаачид үзсэн байна. Ингэснээр байгаль аажмаар сэргэх боломжтой. Харин хүн амын өсөлт үргэлжилбэл 2100 онд 11.4 тэрбум, 2200 онд 21.2 тэрбум хүнтэй болох аж.

Энэ тохиолдолд хуванцар үйлдвэрлэл болон эрчим хүчний хэрэглээ эрс нэмэгдэж, байгаль орчинд үзүүлэх дарамт улам ихэснэ. Гэхдээ эдгээр тоо нь бодит тооцоолол биш гэдгийг судлаачид онцолжээ. Ирээдүйд шинэ технологи нэвтрэх, улс орнуудын бодлого өөрчлөгдөх зэрэг олон зүйл үр дүнд нөлөөлнө.

Судлаачид хүмүүсийг хүчээр цөөн хүүхэдтэй болгохыг санал болгоогүй гэдгийг мөн онцложээ.

Харин жирэмслэлтээс хамгаалах хэрэгслийн хүртээмжийг сайжруулах, охид эмэгтэйчүүдийн боловсролыг дэмжих, хүн бүрт гэр бүлийнхээ хэмжээг өөрсдөө шийдэх боломж олгохыг зөвлөжээ.

Мөн хүн ам цөөрөх нь дангаараа байгаль орчны асуудлыг шийдэхгүй гэж судлаачид анхааруулсан байна. Учир нь чинээлэг орнуудын хүмүүс бага орлоготой орнуудын хүмүүсээс хавьгүй их эрчим хүч, байгалийн нөөц хэрэглэдэг аж.

ЭХ СУРВАЛЖ: KAZINFORM