Франц, Испанид гарсан түймрийн улмаас 300 мянган хүнийг нүүлгэн шилжүүлжээ
Франц, Испанид гарсан ойн түймрийн улмаас нүүлгэн шилжүүлсэн оршин суугчдын тоо хурдацтай нэмэгдэж, 300 мянгаас хол давжээ. Францад түймэртэй тэмцэхэд цэргүүдийг дайчлаад байгаа тухай AFP агентлаг ням гарагт мэдээлсэн байна. Үүнээс өмнө хоёр улсын хэмжээнд 250 мянга гаруй хүнийг нүүлгэн шилжүүлжээ.
Францын баруун өмнөд нутагт хэдэн өдрийн турш үргэлжилж буй ойн түймрийн хамгийн том голомт засаг захиргааны төв нь Бордо хот болох Жиронд мужид бүртгэгджээ. Орон нутгийн эрх баригчид түймрийн нөхцөл байдлыг "асар эрчимтэй, урьдчилан таамаглахын аргагүй" хэмээн үнэлж байна. Одоогийн байдлаар түймэрт доод тал нь 240 байшин өртөн шатжээ. Харин Бордо хотын захирагч хотыг бүхэлд нь нүүлгэн шилжүүлэх шаардлагагүй гэж мэдэгдсэн бөгөөд тус хотод бусад суурин газраас нүүлгэн шилжүүлсэн мянга мянган хүнийг байрлуулаад байгаа аж.
Францын Үндэсний гал сөнөөгчдийн холбооноос (FNSPF) мэдээлснээр, ой мод асар их шатсаны улмаас үүсдэг "пирокумулонимбус" хэмээх аянгын үүл бий болж байгаа нь нөхцөл байдлыг улам хүндрүүлж байна. Ийм үүл нь хүчтэй салхи үүсгэж, дахин түймэр дэгдээх аянга цахилгааныг асар ихээр цахидаг байна.
Байгалийн гамшигтай тэмцэхээр тус бүс нутагт 2.5 мянга орчим гал сөнөөгч, 1.5 мянган цэргийн алба хаагч, 1.2 мянган цагдаагийн ажилтан дайчлагдан ажиллаж байна.
Испанид 75 мянга орчим хүнийг нүүлгэн шилжүүлжээ. Тус улсын төв бүс нутаг болох Мадрид хотын орчимд түймэр гарсан байна. Мадрид болон төвийн нутгийн бусад муж болох Авила, Толедо, мөн зүүн эрэгт орших Кастельон мужаас 75 мянга орчим хүнийг нүүлгэн шилжүүлжээ.
Түүнчлэн Испанийн зүүн нутагт, Валенси бүс нутгийн орчимд гарсан түймэр амралтын өдрүүдэд дахин дүрэлзэж эхэлжээ. Энэ бүс нутагт 15 мянган хүнийг нүүлгэн шилжүүлээд байна.
Байгалийн гамшигтай тэмцэхэд Европын Холбооны бусад орон Франц, Испани руу гал сөнөөх ангиуд, нисэх онгоц, тусгай техник хэрэгслийг илгээж байна. Тухайлбал, Франц улс руу Хорватаас гал унтраах хоёр онгоц, Португалаас дахин хоёр онгоц, мөн Чех, Словакаас "Black Hawk" загварын хүнд даацын хоёр нисдэг тэрэг илгээсэн байна.
Агаарас гал унтраах зориулалттай "Canadair" загварын хоёр нисэх онгоцыг Испани руу илгээснээ Италийн эрх баригчид мэдэгджээ. Грекээс мөн ийм хоёр онгоцыг тус улс руу илгээжээ. Түүнчлэн Испанид түймэртэй тэмцэхэд Нидерланд, Португалын нисэх хүчний техникийг ашиглаж байна.
Эх сурвалж:Монцамэ агентлаг
Уг нийтлэлийн бүх текстүүдийг хуулах
Уг нийтлэлийн бүх зургийг татах
Бусад мэдээлэл
2026/07/27
Шинэ мэдээСумдын халаалтын төвүүдийн засвар, шинэчлэлийг бүрэн хийж, хувийн хэвшил рүү менежментийг нь шилжүүлсэн гэдгийг онцоллоо
Сумдын халаалтын төвүүдийн засвар, шинэчлэлийг бүрэн хийж, хувийн хэвшил рүү менежментийг нь шилжүүлснээр төрийн ачаалал буурч, эдийн засгийн үр ашигтай ажиллаж эхэлсэн гэдгийг энэ үеэр танилцууллаа.
2026/07/27
Шинэ мэдээЦэнхэр бүсэд гал түймэр гарсан үед хариу арга хэмжээний дадлага сургуулийг зохион байгууллаа
“Цөлжилттэй тэмцэх тухай НҮБ-ын конвенцын талуудын 17 дугаар бага хурал (COP17) зохион байгуулах цэнхэр бүсэд гал түймэр гарсан үед хариу арга хэмжээ зохион байгуулах дадлага, сургуулийг зохион байгууллаа.
2026/07/27
Гадаад мэдээЕвропт аагим халуун өдрүүд үргэлжилж байна
БУДАПЕШТ, 2026 оны наймдугаар сарын 6 /Reuters/. Австри улсад лхагва гарагт агаарын хэм түүхэн дээд хэмжээнд хүрч халжээ. Түүнчлэн аагим халуун, ган гачгийн улмаас төв болон өмнөд Европт ихээхэн хүндрэл үүсэж, Унгар улсад эрчим хүчний хэрэглээг хязгаарлажээ. Дэлхийд хамгийн эрчимтэй дулаарч буй Европ тивд энэ зун түүхэнд үзэгдээгүйгээр халж, Франц, Испани улсууд түймрийн гамшигт өртөөд байна. Аагим халуун агаарын урсгал зүүн зүгт шилжиж, Италийн зарим нутагт Цельсийн +40 хэм хүрсэн тул томоохон хотуудад улаан түвшний сэрэмжлүүлэг зарлажээ. Албани улсын онцгой байдлын албаныхан Маллакастер мужийн өмнөд хэсэгт дэгдсэн ойн түймрийг унтраахаар ажиллаж байна. Хэт халуунаас болж Ватиканы Пап лам Лео долоо хоног тутмын айлтгалаа Ариун Петрийн талбайд бус харин дотор танхимд хийхээс аргагүйд хүрчээ. Ромд ирсэн жуулчид энэ шийдвэрийг "бүгчим халуунаас түр боловч зугтах боломж" хэмээн талархан хүлээн авчээ. Словактай залгаа хилийн орчимд орших Австрийн Бад Дойч-Альтенбург хотод агаарын хэм +41.2 °C хүрснийг тус улсын үндэсний цаг уурын алба бүртгэжээ. Түүнчлнэ мягмар гарагт Вена хотын орчимд +41.0 °C хүрч халсан байна.
