Цаг агаар:

Өнгөрсөн хоногт: Улаанбаатар хот болон Архангай аймгийн 5 суманд 0.2 мм, Булган аймгийн 1 суманд 1.5 мм, Дархан-Уул аймгийн 4 суманд 1.2 мм, Дорнод аймгийн 9 суманд 0.2-0.6 мм, Орхон аймгийн 1 суманд 1 мм, Өвөрхангай аймгийн 16 суманд 1-7 мм, Өмнөговь аймгийн 7 суманд 0.2-0.6 мм , Сэлэнгэ аймгийн 5 суманд 0.3 мм, Төв аймгийн 27 суманд 0.1-0.5 мм, Хэнтий аймгийн 18 суманд 0.7-12 мм цас орсон мөн Говь-Алтай аймгийн 3 суманд 15-17 м/с хүрч хүчтэй шуурсан.

Өнөөдөр: Нутгийн зүүн хэсгээр үүлэрхэг. Зүүн аймгуудын нутгийн зүүн хэсгээр нойтон цас, цас орж, цасан шуурга шуурна. Ихэнх нутгаар баруун хойноос секундэд 6-11 метр, говь, талын нутгаар түр зуур секундэд 16-18 метр хүрч ширүүсэж, шороон шуурга шуурна.Увс нуур болон Тэс голын хөндийгөөр -12...-17 градус, Дархадын хотгор болон Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Орхон, Сэлэнгэ, Хараа, Ерөө, Туул, Тэрэлж, Хэрлэн, Онон, Улз голын хөндийгөөр -7...-12 градус, Их нууруудын хотгор, Хангайн нурууны өвөр бэл, говийн бүс нутгийн өмнөд хэсгээр -2...+3 градус, бусад нутгаар -2...-7 градус хүйтэн байна.

Улаанбаатар хотод: Багавтар үүлтэй. Цас орохгүй. Салхи баруун хойноос секундэд 5-10 метр. Өдөртөө -5...-7 градус хүйтэн байна.

Төлөв байдал: 14, 16-нд Хөвсгөл, Хэнтийн уулархаг нутаг, Орхон, Сэлэнгэ голын хөндийгөөр, 17-нд төвийн аймгуудын нутгийн хойд хэсэг, зүүн аймгуудын нутгийн зарим газраар нойтон цас, цас орж, зөөлөн цасан шуурга шуурна. Салхи 16, 17-нд говь, тал, хээрийн нутгаар түр зуур секундэд 16-18 метр хүрч ширүүснэ. 14, 15-нд ихэнх нутгаар хүйтний эрч бага зэрэг суларч Увс нуур болон Дархадын хотгор, Завхан, Заг-Байдраг голын эх, Идэр, Тэс голын хөндийгөөр шөнөдөө -28...-33 градус, өдөртөө -11...-16 градус, Хангай, Хөвсгөл, Хэнтийн уулархаг нутаг, Хараа, Ерөө, Туул, Тэрэлж, Хэрлэн голын хөндийгөөр шөнөдөө -20...-25 градус, өдөртөө -6...-11 градус, говийн бүс нутгийн өмнөд хэсгээр шөнөдөө -1...-6 градус хүйтэн, өдөртөө +4...+9 градус дулаан, Хангайн нурууны өвөр бэл, говийн бүс нутгийн хойд хэсгээр шөнөдөө -6...-11 градус, өдөртөө +4...-1 градус, бусад нутгаар шөнөдөө -11...-16 градус, өдөртөө +1...-4 градус хүйтэн байна. 16-нд нутгийн хойд хэсгээр, 17-нд нутгийн зүүн хэсгээр бага зэрэг хүйтэрнэ.

Гал түймэр:

Улаанбаатар хот, Чингэлтэй дүүрэг 24 дүгээр хороо гарааш шатаж байна гэсэн дуудлагыг 08:38 цагт хүлээн авсан. Сүхбаатар дүүргийн Онцгой байдлын хэлтсийн 74 дүгээр ангийн алба хаагчдыг очиход, иргэн Э-ын эзэмшлийн 8х5 метрийн хэмжээтэй гарааш эд зүйлийн хамт бүрэн шатаж байсныг ажиллаж унтраасан.

Улаанбаатар хот, Налайх дүүрэг 4 дүгээр хороо байшин шатаж байна гэсэн дуудлагыг 18:47 цагт хүлээн авсан. Тус дүүргийн Онцгой байдлын хэлтсийн 28 дугаар ангийн алба хаагчдыг очиход, иргэн Г-ын эзэмшлийн 8х5 метрийн хэмжээтэй 1 давхар байшингийн 3х3 метрийн хэмжээтэй үүдний амбаар шатаж байсныг  ажиллаж унтраасан.

Улаанбаатар хот, Сонгинохайрхан дүүрэг 19 дүгээр хороо автомашин шатаж байна гэсэн дуудлагыг 03.13-ны өдрийн 00:38 цагт хүлээн авсан. Тус дүүргийн Онцгой байдлын хэлтсийн 26 дугаар ангийн алба хаагчдыг очиход, иргэн У-ийн эзэмшлийн  "Rumion" загварын автомашин, 2х2 метрийн хэмжээтэй хогийн сувагт хог шатаж байсныг ажиллаж унтраасан.

Улаанбаатар хот, Хан-Уул дүүрэг 20 дугаар хороо автомашин шатаж байна гэсэн дуудлагыг 03.13-ны өдрийн 03:20 цагт хүлээн авсан. Тус дүүргийн Онцгой байдлын хэлтсийн 14 дүгээр ангийн алба хаагчдыг очиход хашаанд зөөврийн сууцанд, эд зүйл шатаж байсныг ажиллаж унтраасан.

Хүний үйл ажиллагаатай холбоотой осол: 

Зам, тээврийн осол - Автозамын тээврийн осол: Говьсүмбэр аймаг, Сүмбэр сум “Найрамдал” 3 дугаар багийн “Сүмбэр гарден” цэцэрлэгт хүрээлэнгийн урд төв зам дагуу 2 суудлын автомашин мөргөлдөж, автомашины төмөр хийцэд 1 хүн хавчуулагдсан тухай дуудлагыг 20:20 цагт хүлээн авсан. Тус аймгийн Онцгой байдлын газрын 37 дугаар ангийн алба хаагчдыг очиход,  иргэн О-ын эзэмшлийн  "Vellfire" загварын суудлын гэр бүлийн автомашин, иргэн Т-ын эзэмшлийн "Prius" загварын суудлын автомашинууд мөргөлдөж,  автомашины төмөр хийцэд, иргэн А /31 настай, эмэгтэй/-ын  зүүн хөл нь хавчуулагдсан байсныг  ажиллан эсэн мэнд гаргаж, аймгийн ЯТТГ-ийн эмчид хүлээлгэн өгсөн.

ОНЦГОЙ БАЙДЛЫН ЕРӨНХИЙ ГАЗАР