Онцгой байдлын ерөнхий газар, НҮБ-ын Олон улсын шилжилт хөдөлгөөний байгууллага (IOM)-тай хамтран зохион байгуулж байгаа гамшгийн үед хүн амыг нүүлгэн шилжүүлэх ажлыг төлөвлөх, хэрэгжүүлэх олон улсын стандарт зааварчилгааны сургагч багш бэлтгэх сургалт эхэллээ. 

Нээлтийн  ажиллагаанд ОБЕГ-ын дэд дарга, хурандаа Ц.Уранчимэг, IOM-ын Монгол Улс дахь захирал, Ёко Фужимүра, Гамшгаас хамгаалах сургалтын газрын дарга, хурандаа Х.Сүхбаатар нар оролцсон юм. 

Хурандаа Ц.Уранчимэг хэлсэн үгэндээ "Монгол Улсын хэмжээнд 2025 онд нийт 5371 удаагийн аюулт үзэгдэл, осол бүртгэгдэж, 306 хүн амь насаа алдан, 249 хүн гэмтэж бэртэн, 634 орчим тэрбум төгрөгийн шууд хохирол учирч, Онцгой байдлын байгууллагын алба хаагчид 4596 гаруй хүний амь нас, 459 орчим тэрбум төгрөгийн эд хөрөнгийг авран хамгаалсан байна. Гэсэн хэдий ч уур амьсгалын өөрчлөлтөөс үүдэлтэй аюулт үзэгдлийн эрчим, давтамж нэмэгдэж байгаа нь дэлхий даяар жил бүр олон сая хүнийг түр болон байнгын байдлаар нүүн шилжихэд хүргэж байна. Гамшгийн үед хүн амыг нүүлгэн шилжүүлэх асуудал нь улс орон бүрийн аюулгүй байдлын бодлогын хэсэг бөгөөд төлөвлөж, бэлтгэл бэлэн байдлаа хангах нь чухал юм" хэмээн онцлон дурдлаа. 

Энэхүү сургалт нь гамшгийн үед хүн амыг нүүлгэн шилжүүлэх үйл ажиллагааг бодит заавар, зөвлөмж, олон улсын стандартын дагуу төлөвлөхөд чиглэж байгаа бөгөөд Монгол Улсын Засгийн газар, холбогдох байгууллагуудын гамшгийн үеийн хариу арга хэмжээ авах, бэлэн байдлыг хангах, төлөвлөлт хийх чадавхыг бэхжүүлэхэд чухал ач холбогдолтой юм.

Сургалтад хамрагдаж байгаа алба хаагчид гамшгийн үеийн нүүлгэн шилжүүлэлтийг илүү оновчтой төлөвлөх, эмзэг бүлгийн иргэдийг хамгаалах, олон нийтэд чиглэсэн мэдээлэл, харилцааг үр дүнтэй хэрэгжүүлэх мэдлэг, ур чадвар эзэмших бөгөөд олж авсан туршлагаа бодит нөхцөлд хэрэгжүүлэх боломж бүрдэнэ.