Аадар борооны улмаас 30 хүн амь насаа алдаж, 80 мянга гаруй хүнийг нүүлгэн шилжүүлжээ
Усархаг ширүүн борооны улмаас Бээжин хотын 80 332 оршин суугчийг аюулгүй газарт нүүлгэн шилжүүлсэн тухай Хятадын төв телевиз мэдээлэв.
Хотын хойд захад орших Миюнь, Хуайжөү, баруун өмнөд хэсгийн Фаншань дүүргүүдэд хамгийн олон хүнийг нүүлгэн шилжүүлсэн байна. Бээжинд үргэлжлэн орсон аадар борооны улмаас 30 хүн амиа алдсан гэж Хятадын төв телевиз өмнө нь мэдээлсэн байна. Миюнь дүүрэгт 28 хүн, Яньцин дүүрэгт 2 хүн амиа алджээ.
Хятадын Үндэсний хөгжил, шинэчлэлийн хорооноос үерийн дараах сэргээн босголтод зориулж Бээжинд 200 сая юань (27.8 сая орчим ам.доллар) хуваарилжээ. Өмнө нь Хятадын удирдагч Ши Жиньпин төрийн байгууллагуудад хандан үерийн аюулаас урьдчилан сэргийлэх, байгалийн гамшгийн уршгийг арилгах чиглэлд дорвитой ажил хийхийг уриалсан байна.
Хятадын эрх баригчид Бээжинд болсон үерийн гамшигтай тэмцэх зорилгоор хамгийн өндөр түвшний хариу арга хэмжээг эхлүүлжээ. Хятадын хойд нутагт Чаобай мөрний сав газарт долоодугаар сарын 24-нөөс хойш ширүүн бороо орж, улмаар Бээжингийн зүүн хойд захад орших Миюнь дүүргийн голын сав газар руу ирэх усны урсгал огцом нэмэгдсэн тухай "Синьхуа" агентлаг өмнө нь мэдээлжээ. Долоодугаар сарын 27-нд Миюнь дүүргийн сав газарт цутгасан усны хэмжээ нь сүүлийн 60 гаруй жилийн хугацаанд бүртгэгдсэн хамгийн өндөр түвшинд хүрсэн байна.
Хотын эрх баригчид нийгмийн сүлжээгээр дамжуулан иргэдийг голын эрэг орчмоор явахаар зайлсхийж, онцын шаардлагагүй бол гэрээсээ гарахгүй байхыг уриалсан байна.
Бээжинд 2023 оны долоодугаар сарын сүүлч наймдугаар сарын эхээр орж байсан аадар борооны улмаас 11 хүн амиа алдаж, нийслэлийн 13 дүүрэгт 44 мянга гаруй хүн хохирч, хэдэн зуун мянган иргэнийг нүүлгэн шилжүүлж байжээ.
Эх сурвалж:montsame.mn
Уг нийтлэлийн бүх текстүүдийг хуулах
Уг нийтлэлийн бүх зургийг татах
Бусад мэдээлэл
2025/07/29
Шинэ мэдээСумдын халаалтын төвүүдийн засвар, шинэчлэлийг бүрэн хийж, хувийн хэвшил рүү менежментийг нь шилжүүлсэн гэдгийг онцоллоо
Сумдын халаалтын төвүүдийн засвар, шинэчлэлийг бүрэн хийж, хувийн хэвшил рүү менежментийг нь шилжүүлснээр төрийн ачаалал буурч, эдийн засгийн үр ашигтай ажиллаж эхэлсэн гэдгийг энэ үеэр танилцууллаа.
2025/07/29
Шинэ мэдээЦэнхэр бүсэд гал түймэр гарсан үед хариу арга хэмжээний дадлага сургуулийг зохион байгууллаа
“Цөлжилттэй тэмцэх тухай НҮБ-ын конвенцын талуудын 17 дугаар бага хурал (COP17) зохион байгуулах цэнхэр бүсэд гал түймэр гарсан үед хариу арга хэмжээ зохион байгуулах дадлага, сургуулийг зохион байгууллаа.
2025/07/29
Гадаад мэдээЕвропт аагим халуун өдрүүд үргэлжилж байна
БУДАПЕШТ, 2026 оны наймдугаар сарын 6 /Reuters/. Австри улсад лхагва гарагт агаарын хэм түүхэн дээд хэмжээнд хүрч халжээ. Түүнчлэн аагим халуун, ган гачгийн улмаас төв болон өмнөд Европт ихээхэн хүндрэл үүсэж, Унгар улсад эрчим хүчний хэрэглээг хязгаарлажээ. Дэлхийд хамгийн эрчимтэй дулаарч буй Европ тивд энэ зун түүхэнд үзэгдээгүйгээр халж, Франц, Испани улсууд түймрийн гамшигт өртөөд байна. Аагим халуун агаарын урсгал зүүн зүгт шилжиж, Италийн зарим нутагт Цельсийн +40 хэм хүрсэн тул томоохон хотуудад улаан түвшний сэрэмжлүүлэг зарлажээ. Албани улсын онцгой байдлын албаныхан Маллакастер мужийн өмнөд хэсэгт дэгдсэн ойн түймрийг унтраахаар ажиллаж байна. Хэт халуунаас болж Ватиканы Пап лам Лео долоо хоног тутмын айлтгалаа Ариун Петрийн талбайд бус харин дотор танхимд хийхээс аргагүйд хүрчээ. Ромд ирсэн жуулчид энэ шийдвэрийг "бүгчим халуунаас түр боловч зугтах боломж" хэмээн талархан хүлээн авчээ. Словактай залгаа хилийн орчимд орших Австрийн Бад Дойч-Альтенбург хотод агаарын хэм +41.2 °C хүрснийг тус улсын үндэсний цаг уурын алба бүртгэжээ. Түүнчлнэ мягмар гарагт Вена хотын орчимд +41.0 °C хүрч халсан байна.
