Монгол Улсын Ерөнхий сайд Г.Занданшатар, Шадар сайд С.Амарсайхан нар ой, хээрийн түймрийн нөхцөл байдалтай холбогдуулан цахим хурал хийж, мэдээлэл сонслоо.

Хуралд ОБЕГ-ын дарга, хошууч генерал Г. Ариунбуян Сэлэнгэ аймгийн Алтанбулаг сумын Цөх багийн “Доргон толгой” гэдэг газар гарсан ойн түймрийн голомтод ажиллах үеэрээ түймрийн нөхцөл байдал, авч хэрэгжүүлж байгаа арга хэмжээний талаар танилцууллаа.

Мөн ОБЕГ-ын Ажиллагааны шуурхай штабын дарга, ОБЕГ-ын тэргүүн дэд бөгөөд штабын дарга, хурандаа Ц.Ганзориг, УОК-ын Нарийн бичгийн дарга, хурандаа Т.Баярхүү нар оролцсон юм.

Цахим хурлаар Сэлэнгэ аймагт гарсан ой, хээрийн түймрийн нөхцөл байдал болон авч хэрэгжүүлж байгаа арга хэмжээний талаар танилцуулж, түймрийн голомт, хүн хүч, техник хэрэгслийн байршил, цаашдын эрсдэл, авах арга хэмжээний талаар хэлэлцлээ.

Сүүлийн долоо хоногийн хугацаанд Сэлэнгэ аймгийн нутаг дэвсгэрт нийт 11 түймрийн дуудлага бүртгэгдсэн байна.

Улсын хэмжээнд он гарсаар 12 аймгийн 64 сум, нийслэлийн 3 дүүрэгт нийт 138 удаагийн ой, хээрийн гал түймэр бүртгэгдсэн нь өнгөрсөн оны мөн үетэй харьцуулахад 47.4 % өссөн дүнтэй байна.