Парис хотод хэдхэн хоногийн өмнө цельсийн 40 хэмд хүрч халж байжээ. Франц улс даяар 1947 оноос хойш хамгийн халуун өдрүүд энэ сарын 19-ний өдрөөс эхэлсэн. Гэвч энэ сарын 25-ны өдрөөс эхэлж Францын нутаг дэвсгэрт аянга цахилгаантай ширүүн бороо асгарч үер буулаа. Нийслэл Парис хотын гудамж талбай үерт автсан бол цаг агаарын онц ноцтой үзэгдлийн улмаас Францын 57 хотод улбар шар өнгийн түгшүүр зарлалаа.

Пүрэв гарагийн шөнө ганцхан цагт орсон борооны хэмжээ 30-50 мм-т хүрсэн байна. Мөн шуурганы хүч 100 км/цаг байв. Үерийн улмаас Оверн мужид галт тэрэгний бүх хөдөлгөөнийг зогсоосон бол Парисын баруун хойд хэсэг болон Окситаниас Норманди хүртэл нутаг дэвсгэрт галт тэргийн хөдөлгөөнийг зогсоохоор төлөвлөж байна. Иргэний нисэхийн газрын зөвлөснөөр лхагва гарагийн орой 16:00 цагаас 23:30 цагийн хооронд Парисын Орли нисэх буудлын нислэгүүдийг 20 хувиар цөөлсөн байна.

Францын Үндэсний Ассамблейд Ойрхи Дорнод дахь Иран, Израилийн зөрчил мөргөлдөөний талаар сайд нар хэлэлцэж байх үеэр Ассамблейн барилгын дээврээс ус алджээ.
Дуу цахилгаантай аадар борооны үеэр Франц болон хөрш Бельгийн нутаг дэвсгэр даяар ойролцоогоор 39 000 удаа аянга цахилгаан цохисон тухай зарим хэвлэлд мэдээлжээ.

Харамсалтай нь үерийн үеэр хоёр хүн амь насаа алдсан. Майенна хотод 59 настай эрэгтэй аадар борооны үеэр мотоциклтой явж байгаад зам дээр унасан мод мөргөж осолдож амиа алджээ. Францын өөр нэг хотод 12 настай хүү голын усанд сэрүүцэж байхад нь шуурганы үеэр тасарч гол руу унасан мод ирж мөргөсөн байна. Парис хотод мод унаж тасарсан тухай 40 орчим дуудлага ирсэн байна.

Аадар бороо Их Британийн нутаг дэвсгэрт орох төлөвтэй байгааг цаг уурчид анхаарууллаа. Их Британийн зүүн нутагт дуут цахилгаантай бороо орж, үер буух эрсдэлтэйг тус улсын цаг уурын газраас сэрэмжлүүлж байна.

Эх сурвалж: eagle.mn