Цаг агаар:

Өнгөрсөн хоногт: Увс, аймгийн нутгаар цас орж, бусад нутгаар цаг агаар тогтуун байлаа.

Өнөөдөр: Төв болон зүүн аймгуудын нутгийн хойд хэсгээр үүлшиж, Хэнтийн уулсаар ялимгүй цас орно. Бусад нутгаар цас орохгүй. Нутгийн баруун хэсгээр баруунаас, бусад нутгаар баруун хойноос секундэд 4-9 метр, тал, хээрийн нутгаар секундэд 12-14 метр хүрч ширүүснэ. Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр -27…-32 градус, Их нууруудын хотгор, Монгол-Алтай, Хөвсгөлийн уулархаг нутаг, Хүрэнбэлчир орчмоор -18…-23 градус, Хангай, Хэнтийн уулархаг нутаг, Эг, Үүр, Хараа, Ерөө, Халх голын хөндийгөөр -11…-16 градус, Хангайн нурууны өвөр бэл болон говийн бүс нутгийн өмнөд хэсгээр 0...-5 градус, бусад нутгаар -7...-12 градус хүйтэн байна.

Улаанбаатар хотод: Үүлшинэ. Цас орохгүй. Салхи баруун хойноос секундэд 4-9 метр. -8…-10 градус хүйтэн байна.

Төлөв байдал: 18-нд баруун аймгуудын нутгийн баруун хойд хэсгээр, 19-нд баруун болон төвийн аймгуудын нутгийн хойд хэсгээр цас орно. Бусад хугацаанд цас орохгүй. Салхи 18-нд Монгол-Алтайн уулсаар, 19-нд Алтайн салбар уулс, Арц, Богдын өвөр хоолойгоор секундэд 13-15 метр хүрч ширүүснэ. 16-20-нд Хүйтний эрч суларч Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр шөнөдөө -34...-39 градус, өдөртөө -21...-26 градус, Их нууруудын хотгор, Монгол-Алтай, Хөвсгөлийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн, Халх голын хөндийгөөр шөнөдөө -24...-29 градус, өдөртөө -11...-16 градус, говийн бүс нутгийн өмнөд хэсэг болон цас багатай газраар шөнөдөө -9...-14 градус хүйтэн, өдөртөө -3…+2 градус дулаан, бусад нутгаар шөнөдөө -17…-22 градус, өдөртөө -6...-11 градус хүйтэн байна.

Гал түймэр:

Хэнтий аймгийн Баян-Адарга сумын Адарга баг “Батын булаг” гэдэг газар /аймгийн төвөөс зүүн хойд зүгт 160 км, сумын төвөөс зүүн урд зүгт 8 км/ иргэн Э-ийн эзэмшлийн жоншны уурхайд гал гарч байна гэсэн дуудлагыг 13:02 цагт хүлээн авсан. Тус аймгийн Онцгой байдлын газрын Баян-Адарга сум дахь Эрэн хайх, аврах салбарын алба хаагчдыг очиход, иргэн Э-гийн эзэмшлийн 10х4 хэмжээтэй модон байшин, 4х4 хэмжээтэй байшин шатаж байсныг ажиллан унтраасан.

Нийслэлийн Баянзүрх дүүргийн 32 дугаар хороонд нийтийн байр шатаж байна гэсэн дуудлагыг 09:46 цагт хүлээн авсан. Тус дүүргийн Онцгой байдлын хэлтсийн 63 дугаар ангийн алба хаагчдыг очиход иргэн Н-ийн 8х8 метрийн хэмжээтэй 2 давхар байшингийн 2х2 метрийн хэмжээтэй галлагааны өрөө, 2 давхрын зүүн урд хана хэсэг шатаж байсныг ажиллаж унтраасан. 

Орхон аймгийн Баян-Өндөр сумын Булаг багт байшин шатаж байна гэсэн дуудлагыг 10:29 цагт хүлээн авсан. Тус аймгийн Онцгой байдлын газрын 81 дүгээр ангийн алба хаагчдыг очиход 5х6 метрийн хэмжээтэй модон байшингийн хана хэсэг шатаж байсныг ажиллан унтрааж, иргэн Э-д хүлээлгэн өгсөн.

Баянзүрх дүүргийн 31 дүгээр хороонд хашаанд автомашин шатаж байна гэсэн дуудлагыг 15:06 цагт хүлээн авсан. Тус дүүргийн Онцгой байдлын хэлтсийн 63 дугаар ангийн алба хаагчдыг очиход иргэн Э-гийн  "Landcriuser" загварын автомашины шатахууны савны доод хэсэг шатаж байсныг ажиллаж унтраасан.

Дорноговь аймгийн Алтанширээ сумын 3 дугаар баг “35 дугаар зөрлөг” гэдэг газар /аймгийн төвөөс баруун хойд зүгт 35 км, сумын төвөөс баруун урд зүгт 80 км/ ачааны автомашин шатаж байна гэсэн дуудлагыг 21:50 цагт хүлээн авсан. Тус аймгийн Онцгой байдлын газрын 33 дугаар ангийн алба хаагчдыг очиход “ND4250” загварын 28 тонн нүүрс ачсан ачааны автомашины чиргүүлийн хойд хэсэгт 3 тонн орчим нүүрс уугиж шатаж байсныг ажиллаж унтраасан. 

Баянзүрх дүүргийн 28 дугаар хороонд граж шатаж байна гэсэн дуудлагыг 23:58 цагт хүлээн авсан. Тус дүүргийн Онцгой байдлын хэлтсийн 35 дугаар ангийн алба хаагчдыг очиход иргэн Ц-гийн 4х8 метрийн хэмжээтэй гражийн зүүн хойд хана, тааз хэсэг шатаж байсныг ажиллаж унтраасан.

Баянзүрх дүүргийн 13 дугаар хороонд хашааны гадна хог шатаж байна гэсэн дуудлагыг 01:39 цагт хүлээн авсан. Тус дүүргийн Онцгой байдлын хэлтсийн 63 дугаар ангийн алба хаагчдыг очиход эзэн нь тодорхойгүй хашааны гадна ил задгай хог шатаж байсныг ажиллаж унтраасан.

Дархан-Уул аймгийн Дархан сумын 1 дүгээр багт байшин шатаж байна гэсэн дуудлагыг 02:08 цагт хүлээн авсан. Тус аймгийн Онцгой байдлын газрын 54 дүгээр ангийн алба хаагчдыг очиход 9х6 метрийн хэмжээтэй байшингийн дээврийн хэсэг шатаж байсныг ажиллан унтраасан.

Хэнтий аймгийн Бор-Өндөр сумын “Уурхайчин” 4 дүгээр багт иргэн О-ийн эзэмшлийн залгаа 5 ханатай гэр шатаж байна гэсэн дуудлагыг 03:57 цагт хүлээн авсан. Тус аймгийн Онцгой байдлын газрын Бор-Өндөр сум дахь Онцгой байдлын хэлтсийн 49 дүгээр ангийн алба хаагчдыг очиход иргэн О-гийн эзэмшлийн залгаа 5 ханатай 2 гэр шатаж байсныг унтраасан. Уг гал түймэрт иргэн О /31 настай, эрэгтэй/, иргэн Т/ 28 настай, эмэгтэй/ буцалтгүй нэрвэгдэгч болсон байсныг, сумын Цагдаагийн хэлтэст шилжүүлэн өгсөн.

Сэлэнгэ аймгийн Мандал сумын Минжийн хангай багт /аймгийн төвөөс зүүн урд зүгт 235 км, ангийн байрлалаас баруун зүгт 3.5 км/ байшин шатаж байна гэсэн дуудлагыг 04:15 цагт хүлээн авсан. Тус аймгийн Онцгой байдлын газрын 19 дүгээр ангийн алба хаагчдыг очиход 10х8 метрийн хэмжээтэй байшингийн дээврийн хэсэг шатаж байсныг ажиллан унтраасан.

Нийслэлийн Баянгол дүүргийн 24 дүгээр хороонд хогийн цэг шатаж байна гэсэн дуудлагыг 05:30 цагт хүлээн авсан. Хан-Уул дүүргийн Онцгой байдлын хэлтсийн 14 дүгээр ангийн алба хаагчдыг очиход 3х5 метрийн хэмжээтэй хогийн цэгт хог шатаж байсныг ажиллаж унтраасан.

Баянгол дүүргийн 13 дугаар хороонд хогийн цэг шатаж байна гэсэн дуудлагыг 05:56 цагт хүлээн авсан. Чингэлтэй дүүргийн Онцгой байдлын хэлтсийн 10 дугаар ангийн алба хаагчдыг очиход ил задгай хогийн цэгт хог шатаж байсныг ажиллаж унтраасан.

Хүний үйл ажиллагаатай холбоотой осол:

Цас шаварт суусан: Увс аймгийн Хяргас сумын Хайрхан баг ’’Наран бие’’ гэдэг газар /аймгийн төвөөс зүүн урд зүгт 220 км, сумын төвөөс баруун урд зүгт 60 км/ 1 зорчигчтой автомашин цасанд суусан тухай дуудлагыг 21:20 цагт хүлээн авсан. Тус аймгийн Онцгой байдлын газрын Аврах салбарын алба хаагчдыг очиход иргэн Б-гийн эзэмшлийн "RX350" загварын автомашин замаас гарч цасанд суусан байдалтай байсныг ажиллан татан гаргасан. 

ОНЦГОЙ БАЙДЛЫН ЕРӨНХИЙ ГАЗАР