Цаг агаар:

Өнгөрсөн хоногт: Булган, Дархан-Уул, Сүхбаатар, Сэлэнгэ, Төв аймгуудын зарим нутгаар цас орж, бусад нутгаар цаг агаар тогтуун байлаа.

Өнөөдөр: Ихэнх нутгаар солигдмол үүлтэй. Монгол-Алтайн уулархаг нутаг, Халх голын сав газраар ялимгүй цас орж, цасан шуурга шуурна. Бусад нутгаар цас орохгүй. Салхи ихэнх нутгаар баруун хойноос секундэд 5-10 метр, нутгийн зарим газраар секундэд 13-15 метр хүрч ширүүснэ. Увс нуур болон Дархадын хотгор, Тэс голын хөндийгөөр -24…-29 градус, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Байдраг, Эг, Үүр, Ерөө, Тэрэлж, Хэрлэн голын хөндийгөөр -15…-20 градус, Хангайн нурууны өвөр бэл, говийн бүс нутгийн өмнөд хэсэг болон цас багатай газраар -1...-6 градус, бусад нутгаар -8...-13 градус хүйтэн байна.

Улаанбаатар хотод: Үүл багасана, цас орохгүй. Салхи баруун хойноос секундэд 5-10 метр. Өдөртөө -11…-13 градус хүйтэн байна.

Төлөв байдал: 31-нд баруун болон төвийн аймгуудын нутгийн зарим газраар, 1-р сарын 1-нд төвийн аймгуудын нутгийн зарим газраар, говийн аймгуудын нутгийн хойд, зүүн аймгуудын нутгийн өмнөд хэсгээр, 2-нд баруун аймгуудын нутгийн баруун хэсгээр цас орж, цасан шуурга шуурна. Салхи 31-нд ихэнх нутгаар, 01-нд говь, тал, хээрийн нутгаар секундэд 15-17 метр хүрч ширүүснэ. 31-нд баруун аймгуудын нутгаар, 01-р сарын 01-нээс ихэнх нутгаар хүйтний эрч чангарч Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр шөнөдөө -37...-42 градус, өдөртөө -26...-31 градус, Монгол-Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн голын хөндийгөөр шөнөдөө -31...-36 градус, өдөртөө -19...-24 градус, говийн бүс нутгийн өмнөд хэсэг болон цас багатай газраар шөнөдөө -16...-21 градус, өдөртөө -5…-10 градус, бусад нутгаар шөнөдөө -23…-28 градус, өдөртөө -12...-17 градус хүйтэн байна.

Гал түймэр:

Улаанбаатар хот, Сонгинохайрхан дүүрэг 28 дугаар хороо байшин шатаж байна гэсэн дуудлагыг 18:09 цагт хүлээн авсан.Тус дүүргийн Онцгой байдлын хэлтсийн 29 дүгээр ангийн алба хаагчдыг очиход, иргэн Э-ийн 7х7 метрийн хэмжээтэй дэлгүүрийн тааз дээврийн хэсэг, залгаа баригдсан 8х9 метрийн байшингийн тааз, дээврийн хэсэг тус тус шатаж байсныг ажиллаж унтраасан.

Улаанбаатар хот, Багануур дүүрэг 1 дүгээр хороо хураалттай мод шатаж байна гэсэн дуудлагыг 18:45 цагт хүлээн авсан. Тус дүүргийн Онцгой байдлын хэлтсийн 64 дүгээр ангийн алба хаагчдыг очиход, эзэнгүй хашаанд 1 метр.куб орчим хураалттай түлээний мод шатаж байсныг  ажиллаж унтраасан.

Хүний үйл ажиллагаатай холбоотой осол:

Автозамын тээврийн осол: Төв аймаг, Баян сум Өгөөмөр 2 дугаар баг зам тээврийн осол гарч 2 хүн автомашины төмөр хийцэд хавчуулагдсан байгааг гаргах шаардлагатай байна гэсэн дуудлагыг 18:25 цагт хүлээн авсан. Багахангай дүүргийн Онцгой байдлыг хэлтсийн 80 дугаар ангийн бэлтгэл ээлжийн алба хаагчдыг  очиход,  "Bongo3" загварын автомашин,  "Prius" загварын автомашинууд мөргөлдөж "Bongo3" загварын автомашины жолооч иргэн О /56 настай, эрэгтэй, зүүн хөл хугарсан/, Prius загварын автомашины зорчигч А /44 настай, эмэгтэй, амь насаа алдсан/ автомашины төмөр хийцэд хавчуулагдсан байсныг 20 минут ажиллан гаргаж, Төв аймгийн Баян сумын хэсгийн төлөөгч Цагдаад хүлээлгэж өгсөн. 

Ус цаг уурын гаралтай аюулт үзэгдэл:

Ховд аймаг, Үенч сум Улиаст баг "Хар үзүүр' гэдэг газар /аймгийн төвөөс баруун хойд зүгт 495 км, сумын төвөөс зүүн хойд зүгт 45 км, Булган сумын төвөөс барууд хойд зүгт 15 км/ далан сэтэрч хашаа, өвөлжөө, гэр голын халианы усанд автсан тухай дуудлагыг 13:00 цагт хүлээн авсан.Тус аймгийн Онцгой байдлын газрын Булган сум дахь 38 дугаар ангийн алба хаагчдыг очиход, далан сэтэрч голын халианы усанд иргэн Ц-ийн хашаа, өвөлжөө, гэр автсан байсныг ажиллаж, далангийн сэтэрсэн хэсэг болон тухайн айлын хашааг тойруулан шуудаатай шороо байршуулж аюулгүй болгож заавар зөвлөмж өгсөн.

Увс аймаг, Давст сум Торхилог баг ‘‘Галт’’ гэдэг газар /аймгийн төвөөс баруун хойд зүгт 158 км, сумын төвөөс зүүн хойд зүгт 20км Иргэн Т-ын өвөлжөө, гэр усанд /халиа/ автсан тухай дуудлагыг 14:10 цагт хүлээн авсан. Тус аймгийн Онцгой байдлын газрын Давст сум дахь Аврах бүлгийн  алба хаагчдыг очиход, 5 болон 8 ханатай 2 гэр усанд /халиа/ автсан байсныг ажиллан, 2 гэрийг нүүлгэн хүлээлгэн өгсөн.

ОНЦГОЙ БАЙДЛЫН ЕРӨНХИЙ ГАЗАР