Цаг агаар:

Өнгөрсөн хоногт: Хоногийн хугацаанд Архангай, Булган, Говьсүмбэр, Дархан-Уул, Дорноговь, Дорнод, Өвөрхангай, Өмнөговь, Сүхбаатар, Сэлэнгэ, Төв, Хэнтий аймгийн нутгаар цас орж, бусад бүх нутгаар цаг агаар тогтуун байлаа.

Өнөөдөр: Ихэнх нутгаар солигдмол үүлтэй. Дарьгангын тал нутаг, Хангай, Хэнтийн уулархаг нутгаар цас орж, цасан шуурга шуурна. Салхи ихэнх нутгаар баруун хойноос секундэд 7-12 метр, говь, талын нутгаар секундэд 14-16 метр хүрч ширүүснэ. Дархадын хотгор, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Туул, Тэрэлж, Хэрлэн голын хөндий, Дорнод-Монголын тал нутгаар -14...-19 градус, Монгол-Алтайн уулархаг нутаг, Их нууруудын хотгор, говийн бүс нутгийн өмнөд хэсгээр -3...-8 градус, бусад нутгаар -9...-14 градус хүйтэн байна.

Улаанбаатар хотод: Үүлшинэ. Цас орохгүй. Салхи баруун хойноос секундэд 6-11метр. -12...-14 градус хүйтэн байна.

Төлөв байдал: 26, 27-нд төв болон говийн аймгуудын нутгийн зүүн хэсэг, зүүн аймгуудын нутгийн зарим газраар, 28, 29-нд төвийн аймгуудын нутгийн зүүн хэсэг, зүүн аймгуудын нутгийн зарим газраар цас орж, цасан шуурга шуурна. Салхи ихэнх хугацаанд говь, тал, хээрийн нутгаар секундэд 14-16 метр хүрч ширүүснэ. Ихэнх хугацаанд нутгийн зүүн хагаст хүйтэн Дархадын хотгор, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Ерөө, Туул, Тэрэлж , Хэрлэн, Онон, Улз, Халх голын хөндий, Дорнод-Дарьгангын тал нутгаар шөнөдөө -25...-30 градус, өдөртөө -13...-18 градус, говийн бүс нутгийн баруун өмнөд хэсгээр шөнөдөө -11...-16 градус, өдөртөө +2…-3 градус, Их нууруудын хотгор, говийн бүс нутгийн хойд хэсгээр шөнөдөө -14…-19 градус, өдөртөө -1...-6 градус бусад нутгаар шөнөдөө -18…-23 градус, өдөртөө -8...-13 градус хүйтэн байна.

Гал түймэр:

Улаанбаатар хот, Сонгинохайрхан дүүрэг 40 дүгээр хороо байшин шатаж байна гэсэн дуудлагыг 06:49 цагт хүлээн авсан. Тус дүүргийн Онцгой байдлын хэлтсийн 29 дүгээр ангийн алба хаагчдыг очиход, иргэн Э-ийн эзэмшлийн 6х6 метрийн хэмжээтэй байшингийн дээвэр хэсэг шатаж байсныг  ажиллаж унтраасан.

Улаанбаатар хот, Сонгинохайрхан дүүрэг 20 дугаар хороо граж шатаж байна гэсэн дуудлагыг 11:02 цагт хүлээн авсан.Тус дүүргийн Онцгой байдлын хэлтсийн 26 дугаар ангийн алба хаагчдыг очиход, иргэн З-ийн эзэмшлийн 4х10 метрийн хэмжээтэй байшингийн дээвэр, граж шатаж байсныг ажиллаж унтраасан.

Орхон аймаг, Баян-Өндөр сумын Наран багийн 3 дугаар гудамжинд байшин шатаж байна гэсэн дуудлагыг 00:09 цагт хүлээн авсан.Орхон аймгийн Онцгой байдлын газрын 81 дүгээр ангийн  алба хаагчдыг очиход, 8х6 метрийн хэмжээтэй байшин яндангийн цонолт өгч, таазны хэсэг шатаж байсныг ажиллан унтраасан.

Улаанбаатар хот, Чингэлтэй дүүрэг 14 дүгээр хороо байшин шатаж байна гэсэн дуудлагыг 01:38 цагт хүлээн авсан.Сүхбаатар дүүргийн Онцгой байдлын хэлтсийн 34 дүгээр ангийн алба хаагчдыг очиход, иргэн Х-ын 7х4 метрийн хэмжээтэй байшин шатаж байсныг ажиллаж унтраасан.

Хүний үйл ажиллагаатай холбоотой осол:

Говь-Алтай аймаг, Халиун сум Гүү бариач багийн “Шантын гол” гэдэг газар /аймгийн төвөөс баруун урд зүгт 35 км, сумын төвөөс баруун хойд зүгт 50 км/ тус сумын харьяат малчин Л нь 11.23-ны өдрийн 08:00 цагийн орчим гэрээсээ аймгийн төвийн чиглэлд мориор 100 тооны бог мал тууж яваад сураггүй болсон тухай дуудлагыг 11.24-ний өдрийн 05:00 цагт хүлээн авсан. Тус аймгийн Онцгой байдлын газрын Аврах салбарын алба хаагчид очиж, Хантайширын нуруу, Зайврын ам, гэдэг газруудаар  нийт 70 км газар эрлийн ажиллагааг зохион байгуулж, эсэн мэнд байсныг ар гэрийн төлөөлөл олж, эрлийн ажиллагааг зогсоосон.

Өмнөговь аймаг, Ханхонгор сум Мандах баг /аймгийн төвөөс хойд зүгт 45 км, сумын төвөөс урд зүгт 20 км/ Ханбогд сумын төвөөс Ханхонгор сумын чиглэлд зорчиж явсан 3 зорчигчтой автомашин төөрчихлөө, автомашины бензин дуусаж байна гээд 22:00 цагийн орчимд холбогдоод сураггүй болчихлоо гэсэн дуудлагыг 23:56 цагт хүлээн авсан.  Тус аймгийн Онцгой байдлын газрын алба хаагчид очиж,  "Swift" загварын автомашинтай иргэн /Э/, иргэн /М/, иргэн /Ч/ нарыг эсэн мэнд олсон.

ОНЦГОЙ БАЙДЛЫН ЕРӨНХИЙ ГАЗАР