Цаг агаар:

Өнгөрсөн хоногт: Хоногийн хугацаанд Булган, Орхон, Төв, Хэнтий, Дорнод аймгуудын нутгийн зарим хэсгээр цас орж, бусад нутгаар цаг агаар тогтуун байлаа.

Өнөөдөр: Нутгийн өмнөд хэсгээр багавтар үүлтэй, бусад нутгаар солигдмол үүлтэй. Монгол-Алтай, Хөвсгөлийн уулсаар цас орно. Бусад нутгаар хур тунадас орохгүй. Салхи ихэнх нутгаар баруунаас секундэд 5-10 метр, говь, талын нутгаар секундэд 12-14 метр хүрч ширүүснэ. Завхан голын эх, Хүрэнбэлчир орчмоор -9...-14 градус, Монгол-Алтай, Хангай, Хөвсгөлийн уулархаг нутаг, Тэрэлж голын хөндийгөөр -1...-6 градус хүйтэн, говийн бүс нутгийн өмнөд хэсгээр +8…+13 градус, Их нууруудын хотгор, говийн бүс нутгийн хойд хэсэг, Дарьгангын тал нутгаар +4…+9 градус, бусад нутгаар 0...+5 градус дулаан байна.

Улаанбаатар хотод: Багавтар үүлтэй. Хур тунадас орохгүй. Салхи баруунаас секундэд 5-10 метр. +1...+3 градус дулаан байна.

Төлөв байдал: 11-р сарын 02-нд баруун аймгуудын нутгийн өмнөд болон зүүн хэсэг, төв болон говийн аймгуудын нутгийн зарим газраар, 03-нд төв болон говийн аймгуудын нутгийн зүүн хэсэг, зүүн аймгуудын ихэнх нутгаар цас орж, цасан шуурга шуурна. Салхи ихэнх хугацаанд секундэд 6-11 метр, 02-нд нутгийн зарим газраар, 03-нд говь, талын нутгаар, 04-нд нутгийн зүүн хэсгээр секундэд 14-16 метр хүрч ширүүснэ. 02,03-нд ихэнх нутгаар, 04-нд нутгийн зүүн хагаст хүйтэрч, Дархадын хотгор, Завхан голын эх, Хүрэнбэлчир орчим, Байдраг голын хөндийгөөр шөнөдөө -25...-30 градус, өдөртөө -8...-13 градус, Монгол-Алтай, Хангай, Хэнтийн уулархаг нутаг, Идэр, Тэс, Ерөө, Туул, Тэрэлж, Хэрлэн, Улз, Халх голын хөндийгөөр шөнөдөө -18...-23 градус хүйтэн, өдөртөө -2...-7 градус хүйтэн, говийн бүс нутгийн өмнөд хэсгээр шөнөдөө -1...-6 градус хүйтэн, өдөртөө +4…+9 градус дулаан, бусад нутгаар шөнөдөө -10…-15 градус хүйтэн, өдөртөө -1…+4 градус дулаан байна.

Гал түймэр: 

Улаанбаатар хот, Сонгинохайрхан дүүрэг 33 дугаар хороо байшин шатаж байна гэсэн дуудлагыг 09:01 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчдыг очиход, иргэн Н-ын эзэмшлийн 4х6 метрийн хэмжээтэй  галлагааны өрөөний дээвэр хэсэг шатаж байсныг  ажиллаж унтраасан.

Төв аймаг, Баян сум Цавчир 3 дугаар баг боодлын өвс ачсан ачааны автомашин шатаж байна гэсэн дуудлагын 10:12 цагт хүлээн авсан. Багахангай дүүргийн Гал түймэр унтраах, аврах 80 дугаар ангийн алба хаагчдыг очиход, иргэн Б-ийн эзэмшлийн "Beiben North Benz, ND4250" загварын ачааны автомашины чиргүүл,  боодол өвс шатаж байсныг ажиллаж унтраасан.

Улаанбаатар хот, Чингэлтэй дүүрэг 16 дугаар хороо байшин шатаж байна гэсэн дуудлагыг 20:45 цагт хүлээн авсан. Сүхбаатар дүүргийн Онцгой байдлын хэлтсийн Гал түймэр унтраах, аврах 34 дугаар ангийн алба хаагчдыг очиход, иргэн И-ийн эзэмшлийн 6х7 метрийн хэмжээтэй байшингийн дээврийн хэсэг шатаж байсныг ажиллаж унтраасан.

Өмнөговь аймаг, Даланзадгад сум 6 дугаар баг гэр шатаж байна гэсэн дуудлагыг 20:55 цагт хүлээн авсан. Тус аймгийн Онцгой байдлын газрын Даланзадгад сум дахь Гал түймэр унтраах, аврах 21 дүгээр ангийн алба хаагчдыг очиход, 5 ханатай гэрийн 2x3 метрийн хэмжээтэй үүдний амбаарын дээвэр хэсэг шатаж байсныг ажиллаж унтраасан. 

Хүний үйл ажиллагаатай холбоотой осол: 

Улаанбаатар хот, Баянзүрх дүүрэг 11 дүгээр хороо автомашинд хүн хавчуулагдсан тухай дуудлагыг 21:48 цагт хүлээн авсан.Нийслэлийн аврах ангийн алба хаагчдыг очиход,  "Sinotruck ZZ3257" загварын автомашин, "Howo ZZ3257N3847C1" загварын  автомашины араас мөргөж иргэн Т-ын хөл хэсэг хавчуулагдсан байсныг ажиллан эсэн мэнд  гаргаж, Цагдаагийн байгууллагад хүлээлгэн өгсөн.

ОНЦГОЙ БАЙДЛЫН ЕРӨНХИЙ ГАЗАР