Онцгой байдлын байгууллагын 2025 оны эрдэм шинжилгээний “Шилдэг бүтээл”-ээр “Гамшиг, аюулт үзэгдэл, ослын статистик туршлага, сургамж 2017-2024” нэг сэдэвт бүтээл шалгарлаа.

Тус бүтээлийг ОБЕГ-ын дэргэдэх Гамшиг судлалын үндэсний хүрээлэнгийн Эрдэмтэн нарийн бичгийн дарга, хурандаа, доктор (Ph.D), дэд профессор Д.Чимэдцэрэн удирдсан юм.

Харин бүтээлийн зохиогчоор ОБЕГ-ын Эрсдэлийн удирдлагын газрын ахлах мэргэжилтэн, хошууч Ц.Батзаяа, мөн газрын ахлах мэргэжилтэн, дэслэгч С.Рэнчинханд, Гамшиг судлалын үндэсний хүрээлэнгийн эрдэм шинжилгээний ажилтан, ахлах дэслэгч Б.Лхагвасүрэн, дэслэгч Х.Цогзол, дэслэгч С.Энхтунгалаг, дэслэгч Э.Хатантөмөр, дэслэгч Л.Тунгалагсүрэн, дэслэгч У.Молор нар ажиллалаа.

Гамшгаас хамгаалах үйл ажиллагааг шинжлэх ухааны үндэстэй зохион байгуулах, учирч болзошгүй аюулыг урьдчилан таамаглах, тохиолдсон гамшиг, аюулт үзэгдэл, осолд дүн шинжилгээ хийх, сургамж авах, цаашдын чиг хандлагыг тодорхойлоход үнэтэй хувь нэмэр оруулсан бүтээл болсныг онцолж байна.