Улсын Их Хурлын 2024 оны 21 дүгээр тогтоолоор баталсан “Монгол Улсын Засгийн газрын 2024-2028 оны үйл ажиллагааны хөтөлбөр” -ийн 4.4.4.14 дэх дэд заалт, Засгийн газрын 2024 оны 181 дүгээр тогтоолоор баталсан “Монгол Улсын хууль тогтоомжийг 2028 он хүртэл боловсронгуй болгох үндсэн чиглэл”-ийн 1.3 дахь хэсгийг тус тус үндэслэн ОБЕГ-аас  Гамшгаас хамгаалах тухай хууль болон Улсын нөөцийн тухай хуульд нэмэлт, өөрчлөлт оруулахаар ажиллаж байна.

Үүнтэй холбогдуулан Онцгой байдлын байгууллагын болон гамшгаас хамгаалах, урьдчилан сэргийлэх чиглэлээр үйл ажиллагаа эрхэлдэг төрийн бус байгууллага, эрдэмтэн, судлаачид, үе, үеийн ажилтан, алба хаагчдыг оролцуулсан хуулийн төслийн нээлттэй хэлэлцүүлгийг зохион байгууллаа.  

Энэ үеэр оролцогчид хуулиийн төсөлд бичгээр болон ярилцлагаар санал, хүсэлтээ илэрхийлсэн бөгөөд тус саналуудыг тусгахаар ажиллаж байна.

Мөн энэ үеэр Азийн хөгжлийн банкны санхүүжилтээр хэрэгжүүлэх “Монгол Улсын гамшгийн сөрөн тэсвэрлэх чадавхыг бэхжүүлэх төслийг хэрэгжүүлэх” олон улсын хэлэлцээр соёрхон батлах тухай хуулийн төсөл, Онцгой байдлын байгууллагын гамшигтай тэмцэх чадавхыг бэхжүүлэх чиглэлээр авч хэрэгжүүлэхээр төлөвлөсөн төсөл, хөтөлбөрийн талаар мэдээлэл өгч, санал, хүсэлтийг сонслоо.