1.Цаг агаар: 

  Өнгөрсөн хоногт:  Нийт нутгаар цаг агаар тогтуун байлаа.

  Өнөөдөр: Нутгийн баруун хэсгээр үүлшинэ, бусад нутгаар цэлмэг. Нийт нутгаар цас орохгүй. Салхи ихэнх нутгаар баруун хойноос секундэд 4-9 метр. Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр -12...-17 градус, Алтай, Хэнтийн уулархаг нутаг, Тэрэлж голын хөндийгөөр -7...-12 градус, Их нууруудын хотгор, Хангайн нурууны өвөр бэл, говийн бүс нутгийн өмнөд хэсэг, Дорнод-Дарьгангын тал нутгаар +3...-2 градус, бусад нутгаар -3...-8 градус хүйтэн байна.

  Улаанбаатар хотод: Цэлмэг, зөөлөн салхитай, өдөртөө -3...-5 градус хүйтэн байна.

Төлөв байдал: 19-нд Хэнтийн уулархаг нутгаар ялимгүй цас орж, 22-нд баруун, төв, зүүн аймгуудын нутгийн хойд хэсгээр цас орж, цасан шуурга шуурна. Бусад хугацаанд цас орохгүй. Салхи 19-нд тал, хээрийн нутгаар, 22-нд нутгийн зарим газраар секундэд 14-16 метр хүрч ширүүснэ. Дархадын хотгор, Завхан, Заг-Байдраг голын эх, Идэр, Тэс голыг хөндийгөөр шөнөдөө -28…-33 градус, өдөртөө -10…-15 градус, Алтай, Хангай, Хөвсгөл, Хэнтийн уулархаг нутаг, Хараа, Ерөө, Туул, Тэрэлж, Хэрлэн голын хөндийгөөр шөнөдөө -20…-25 градус, өдөртөө -6…-11 градус, говийн бүс нутгийн өмнөд хэсгээр шөнөдөө -8…-13 градус, өдөртөө +3…-2 градус, бусад нутгаар шөнөдөө -13…-18 градус, өдөртөө -3…-8 градус хүйтэн байна.

2.Гал түймэр:

Хэнтий аймаг, Хэрлэн сум Сариг багийн “Задгай”-д  суудлын автомашин шатаж байна гэсэн дуудлагыг 11.17-ны өдрийн 10:30 цагт хүлээн авсан. Тус аймгийн Онцгой байдлын газрын 32 дугаар ангийн алба хаагчдыг очиход иргэн Ц-ийн  "Приус-20" загварын суудлын автомашины хөдөлгүүр шатаж байсныг ажиллаж унтраасан.

Улаанбаатар хот, Сонгинохайрхан дүүрэг 36 дугаар хороо байшин шатаж байна гэсэн дуудлагыг 11.17-ны өдрийн 11:25 цагт хүлээн авсан. Тус дүүргийн Онцгой байдлын хэлтсийн 26 дугаар ангийн алба хаагчдыг очиход иргэн Т-ийн  10х10 метрийн хэмжээтэй 2 давхар байшинд эд хогшил шатаж байсныг ажиллаж унтраасан.

Улаанбаатар хот, Сүхбаатар дүүрэг 19 дүгээр хороо байшин шатаж байна гэсэн дуудлагыг 11.17-ны өдрийн 14:08 цагт хүлээн авсан. Тус дүүргийн Онцгой байдлын хэлтсийн 74 дүгээр ангийн алба хаагчдыг очиход иргэн Б-ын 5х8 метрийн хэмжээтэй байшингийн шал шатаж байсныг ажиллаж унтраасан. 

Ховд аймаг, Булган сум дэлгүүрийн барилга шатаж байна гэсэн дуудлагыг 11.17-ны өдрийн 17:25 цагт хүлээн авсан.  Тус аймгийн Онцгой байдлын газрын Булган сум дахь 38 дугаар ангийн алба хаагчдыг очиход иргэн Б-ын 5х14 метрийн хэмжээтэй барилгын шал шатаж байсныг ажиллаж унтраасан. 

Ховд аймаг, Жаргалант сум Наран багийн “Задгай”-д гэр шатаж байна гэсэн дуудлагыг 11.18-ны өдрийн 00:45 цагт хүлээн авсан. Тус аймгийн Онцгой байдлын газрын 48 дугаар ангийн алба хаагчдыг очиход иргэн Р-ын  8 ханатай гэрт аргал шатаж байсныг  ажиллаж унтраасан. 

Улаанбаатар хот, Хан-Уул дүүрэг 25 дугаар хороо орон суцны байранд эд зүйл шатаж байна гэсэн дуудлагыг 11.18-ны өдрийн 04:42 цагт хүлээн авсан. Тус дүүргийн Онцгой байдлын хэлтсийн 30 дугаар ангийн алба хаагчдыг очиход иргэн Г-ын 2 өрөө орон сууцны байрны унтлагын өрөөнд ор шатаж байсныг ажиллаж унтраасан.  Утаажилтын бүсээс 79 иргэнийг аюулгүй талбайд гаргасан.

3.Хүний үйл ажилллагаатай холбоотой осол: 

Баян-Өлгий аймаг, Улаанхус сум 5 дугаар багийн “Ягаан шовх-Уул” гэдэг газар /аймгийн төвөөс зүүн урд зүгт 45 км-т, сумын төвөөс зүүн урд зүгт 14 км-т/ Тус сумын харьяат иргэн А нь 11.16-ны өдрийн 16:00 цагт гэрээсээ гараад сураггүй болсон тухай дуудлагыг 22:20 цагт хүлээн авсан.  Аймгийн Онцгой байдлын  газрын  алба хаагчид Улаанхус сумын чиглэлд явж байхдаа 13:45 цагт тус сумын Даян багийн “Салхитын даваа” гэдэг газар /гэрээс нь урд зүгт 30 км/-аас эсэн мэнд олсон.

ОНЦГОЙ БАЙДЛЫН ЕРӨНХИЙ ГАЗАР