1.Цаг агаар: 

Өнгөрсөн хоногт: Нийт нутгаар цаг агаар тогтуун байлаа.

Өнөөдөр: Баруун аймгуудын нутгаар үүлшинэ, бусад нутгаар багавтар үүлтэй. Монгол-Алтайн уулархаг нутгаар цас орж, цасан шуурга шуурна. Салхи ихэнх нутгаар баруун өмнөөс секундэд 5-10 метр, өдөртөө Алтайн уулархаг нутгаар секундэд 15-17 метр хүрч ширүүснэ. Агаарын температур өдөртөө Дархадын хотгор, Хэнтийн уулархаг нутаг, Завхан, Заг-Байдраг голын эхээр -8...-13 градус, Хангай, Хөвсгөлийн уулархаг нутаг, Идэр, Тэс, Эг, Үүр, Хараа, Ерөө, Туул, Тэрэлж голын хөндийгөөр -3...-8 градус хүйтэн, Их нууруудын хотгор болон Хангайн нурууны өвөр бэл, говийн бүс нутгийн өмнөд хэсгээр +2...+7 градус дулаан, бусад нутгаар +2...-3 градус хүйтэн байна. 

Улаанбаатар хотод: Багавтар үүлтэй. Цас орохгүй. Салхи баруун өмнөөс секундэд 5-10 метр. Шөнөдөө Яармаг-Сонгины орчмоор -17...-19 градус, бусад хэсгээр -10...-12 градус, өдөртөө 0...-2 градус хүйтэн байна

Төлөв байдал: 14-нд баруун болон төвийн аймгуудын ихэнх нутгаар, 15-нд төв, говийн аймгуудын нутгийн зарим, зүүн аймгуудын нутгийн хойд хэсгээр, 16-нд төвийн аймуудын нутгийн зүүн хэсэг, зүүн аймгуудын нутгийн зарим газраар, 17-нд зүүн аймгуудын нутгийн зүүн хэсгээр цас орж, цасан шуурга шуурна. Салхи 14-нд ихэнх нутгаар, 15,16-нд говь, тал, хээрийн нутгаар секундэд 15-17 метр хүрч ширүүснэ. 15-нд нутгийн баруун хэсгээр, цаашдаа ихэнх нутгаар хүйтний эрч эрс чангарч Дархадын хотгор, Идэр, Тэс, Завхан, Заг-Байдраг голын эхээр шөнөдөө -32…-37 градус, өдөртөө -17…-22 градус, Алтай, Хангай, Хөвсгөл, Хэнтийн уулархаг нутаг, Хараа, Ерөө, Туул, Тэрэлж голын хөндийгөөр шөнөдөө -24…-29 градус, өдөртөө -13…-18 градус, говийн бүс нутгийн өмнөд хэсгээр шөнөдөө -13…-18 градус, өдөртөө -3…-8 градус, бусад нутгаар шөнөдөө -19…-24 градус, өдөртөө -8…-13 градус хүйтэн байна.

2.Гал түймэр:

Улаанбаатар хот, Баянзүрх дүүрэг 21 дүгээр хороо байшин шатаж байна гэсэн дуудлагыг 11.12-ны өдрийн 14:37 цагт хүлээн авсан. Сүхбаатар дүүргийн Онцгой байдлын хэлтсийн 34 дүгээр ангийн алба хаагчдыг очиход иргэн Б-н 18х17 метрийн хэмжээтэй 3 давхар бөөний худалдааны төвийн 1 дүгээр давхарт байрлах 10х10 метрийн хэмжээтэй хүнсний дэлгүүрийн 3х5 метрийн хэмжээтэй хэсэгт эд хогшил, бараа материал, 2 болон 3 дугаар давхрын 4х5 метрийн хэсэг хайрагдсан, 2х4 метрийн хэмжээтэй галлагааны өрөө бүрэн шатаж байсныг  ажиллаж унтраасан. 

Дархан-Уул аймаг, Дархан сум 3 дугаар баг байшин шатаж байна гэсэн дуудлагыг 11.12-ны өдрийн 15:25 цагт хүлээн авсан. Тус аймгийн Онцгой байдлын газрын 54 дүгээр ангийн алба хаагчдыг очиход иргэн Г-ийн 8х6 метрийн хэмжээтэй байшингийн үүд болон дээврийн хэсэг шатаж байсныг ажиллаж унтраасан.

3 Ой, хээрийн түймэр:

- Хээрийн түймэр: Сүхбаатар аймаг, Эрдэнэцагаан сум 7 дугаар багийн “Давхар" гэдэг газар /аймгийн төвөөс зүүн урд зүгт 290 км, сумын төвөөс зүүн хойд зүгт 70 км/Хээрийн гал түймэр гарсан тухай дуудлагыг 11.12-ны өдрийн 17:00 цагт хүлээн авсан.  Тус аймгийн Онцгой байдлын газрын Эрдэнэцагаан сум дахь 47 дугаар ангийн алба хаагчид, орон нутгийн иргэд унтраах ажиллагааг зохион байгуулан 19:50 цагт цурамд оруулж, 20:10 цагт бүрэн унтраасан. Урьдчилсан байдлаар түймэрт 225 га талбай өртөж шатсан.

ОНЦГОЙ БАЙДЛЫН ЕРӨНХИЙ ГАЗАР