ОБЕГ-ын дарга, хошууч генерал Г.Ариунбуян өнөөдөр БНСУ-ын Үндэсний гал түймэртэй тэмцэх газрын тоног төхөөрөмж, технологийн газрын дарга Юүн Сан Ги тэргүүтэй төлөөлөгчдийг хүлээн авч уулзлаа.

Уулзалтын үеэр талууд хамтын ажиллагааны цаашдын чиглэл, боломжийн талаар дэлгэрэнгүй санал солилцож, харилцаагаа улам өргөжүүлэхээр тохиролцсон юм.

Тухайлбал, гал түймэр унтраах болон яаралтай тусламжийн автомашины тусламж, хамтарсан төсөл хөтөлбөр хэрэгжүүлэх, гамшгийн хариу арга хэмжээ болон яаралтай тусламж үзүүлэх чадавхыг бэхжүүлэх сургалтыг тогтмол зохион байгуулах зэрэг асуудлыг онцлон хэлэлцлээ.

Мөн алба хаагчдыг нарийн мэргэжлийн чиглэлээр тэтгэлэгт хөтөлбөрт хамруулах, урт болон богино хугацааны сургалтад тогтмол оролцуулах зэрэг хүний нөөцийн хөгжилд чиглэсэн олон талын санаачилгыг дэвшүүлсэн юм.