Цаг агаар:

Өнгөрсөн хоногт: Улаанбаатар хотод 1.2 мм, Архангай 0.3-5 мм, Баянхонгор аймагт 0.9 мм, Булган аймагт 0.1-19 мм, Дархан-Уул аймагт 4.5 мм, Орхон аймагт 1.4 мм, Сэлэнгэ аймагт 0.2-0.9 мм, Увс аймагт 1 мм, Төв аймагт 0.11 мм, Хөвсгөл аймагт 8 мм бороо орсон. Бусад нутгаар цаг агаар тогтуун байлаа.

Өнөөдөр: Ихэнх нутгаар солигдмол үүлтэй. Баруун болон төвийн аймгуудын нутгийн зарим газар, говийн аймгуудын нутгийн зүүн хэсэг, зүүн аймгуудын ихэнх нутгаар бороо, дуу цахилгаантай аадар бороо орно. Салхи нутгийн зүүн хэсгээр баруун өмнөөс, бусад нутгаар баруун өмнөөс баруун хойш эргэж 5-10 м/с, нутгийн зарим газраар борооны өмнө түр зуур ширүүснэ. Нутгийн хойд хэсгээр сэрүүсэж Алтай, Хангай, Хөвсгөл, Хэнтийн уулархаг нутаг, Завхан голын эх, Идэр, Байдраг, Тэрэлж голын хөндийгөөр +19…+24 градус, Орхон, Сэлэнгэ, Хараа, Ерөө, Туул голын хөндийгөөр +26…+31 градус, говийн бүс нутгийн өмнөд хэсэг, Дорнод-Дарьгангын тал нутгаар +31…+36 градус, бусад нутгаар +23...+28 градус дулаан байна.

Улаанбаатар хотод: Үдээс өмнө үүлэрхэг. Үдээс хойш үүл багасна. Бороо орохгүй. Салхи өмнөөс 5-10 м/с, +26…+28 градус дулаан байна.

Төлөв байдал: 7-р сарын 1-нд баруун аймгуудын нутгийн хойд хэсэг, зүүн аймгуудын ихэнх нутгаар, 2-нд баруун аймгуудын нутгийн хойд, төвийн аймгуудын нутгийн баруун хэсгээр, 3-нд баруун болон говийн аймгуудын нутгийн зарим газар, төвийн аймгуудын ихэнх нутаг, зүүн аймгуудын нутгийн баруун хэсгээр, 4-нд баруун аймгуудын нутгийн баруун хэсэг, төвийн аймгуудын нутгийн зарим газар, говийн аймгуудын нутгийн зүүн хэсэг, зүүн аймгуудын ихэнх нутгаар бороо, дуу цахилгаантай аадар бороо орно. Салхи ихэнх хугацаанд 5-10 м/с, нутгийн зарим газраар борооны өмнө түр зуур ширүүснэ. Монгол-Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчмоор шөнөдөө +5…+10 градус, өдөртөө +17...+22 градус, Хэнтийн уулархаг нутаг, Орхон-Сэлэнгийн сав газар, Туул голын хөндийгөөр шөнөдөө +12...+17 градус, өдөртөө +25...+30 градус, говийн бүс нутгийн өмнөд хэсэг, Дорнод-Дарьгангын тал нутгаар шөнөдөө +18...+23 градус, өдөртөө +32...+37 градус, бусад нутгаар шөнөдөө +8…+13 градус, өдөртөө +21...+26 градус дулаан байна. Хугацааны сүүлээр нутгийн хойд хэсгээр бага зэрэг сэрүүснэ.

Гал түймэр:

Баянхонгор аймаг, Заг сум Баян-Улаан багийн “Цаахан тохой” гэдэг газар /аймгийн төвөөс баруун хойд зүгт 172 км, сумын төвөөс зүүн хойд зүгт 15 км/ суудлын автомашин шатаж байна гэсэн дуудлагыг 06.29-ний өдрийн 10:09 цагт хүлээн авсан. Тус аймгийн Онцгой байдлын газрын Жаргалант сум дахь Эрэн хайх, аврах салбарын алба хаагчдыг очиход иргэн У-ын  “Хьюндай верна” загварын суудлын автомашин шатаж байсныг  ажиллаж унтраасан.

Улаанбаатар хот, Хан-Уул дүүрэг 18 дугаар хороо хогийн цэг шатаж байна гэсэн дуудлагыг 06.29-ний өдрийн 15:13 цагт хүлээн авсан. Тус дүүргийн Онцгой байдлын хэлтсийн 14 дүгээр ангийн алба хаагчдыг очиход 3х4 метрийн хэмжээтэй хогийн цэгт хог шатаж байсныг ажиллаж унтраасан.     

Ой, хээрийн түймэр: 

Сэлэнгэ аймаг, Ерөө сум Буурагчин багийн “Даваат” гэдэг газар /аймгийн төвөөс зүүн урд зүгт 320 км, Ерөө сумын төвөөс зүүн урд зүгт 270 км, Мандал сумын төвөөс зүүн хойд зүгт 101 км/ Ой, хээрийн гал түймэр гарч байна гэсэн дуудлагыг 06.24-ний өдрийн 22:33 цагт /06.25-ны өдрийн 08:01 цагт/ хүлээн авсан. Тус аймгийн Онцгой байдлын газрын Мандал сум дахь Онцгой байдлын хэлтэс, Баянгол сум дахь 40 дүгээр анги, нийслэлийн Онцгой байдлын газар, Мод боловсруулах үйлдвэрийн ажилтнууд, орон нутгийн нийт 54 хүн, 6 автомашинтайгаар ойн гал түймрийг унтраах ажиллагааг зохион байгуулж,  цурамд оруулж, 06.29-ний өдрийн 14:28 цагт бүрэн унтрааж, хүлээлгэн өгсөн.  Урьдчилсан байдлаар ойн гал түймэрт 30 га талбай өртсөн.

Сэлэнгэ аймаг, Ерөө сум Буурагчин багийн “Ялбаг Асгатын-Ам” гэдэг газар /аймгийн төвөөс зүүн урд зүгт 325 км, Ерөө сумаас зүүн урд зүгт 270 км, Мандал сумаас зүүн хойд зүгт 60 км/ Ой, хээрийн гал түймэр гарч байна гэсэн дуудлагыг 06.24-ний өдрийн 22:40 цагт /06.25-ны өдрийн 08:01 цагт/ хүлээн авсан. Тус аймгийн Онцгой байдлын газрын Мандал сум дахь 19 дүгээр анги, Баянгол сум дахь 40 дүгээр анги, нийслэлийн Онцгой байдлын газрын алба хаагчид, “Өгөөж Хараа” ХХК-ийн нийт 34 хүн, 2 автомашинтай ойн гал түймрийг унтраах ажиллагааг зохион байгуулж, 06.28-ны өдрийн 14:07 цагт цурамд оруулж, 06.29-ний өдрийн 09:30 цагт бүрэн унтраасан. Урьдчилсан байдлаар ойн гал түймэрт 40 га талбай өртөж шатсан.

Сэлэнгэ аймаг, Хүдэр сум Тарвагатай багийн "Шоргоолж" гэдэг газар /аймгийн төвөөс зүүн урд 228 км, сумын төвөөс зүүн урд зүгт 60 км/  Ой, хээрийн гал түймэр гарч байна гэсэн дуудлагыг 06.26-ны өдрийн 16:35 цагт хүлээн авсан. Тус аймгийн Онцгой байдлын газрын Хүдэр сум дахь Эрэн хайх аврах салбар, Дорноговь аймгийн Онцгой байдлын газар, Өмнөговь аймгийн Онцгой байдлын газрын алба хаагчид, сумын Мэргэжлийн ангийнхан нийт 36 хүн, 4 автомашинтай ой, хээрийн гал түймрийг унтраах ажиллагааг зохион байгуулж, 06.28-ны өдрийн 12:34 цагт цурамд оруулж, бүрэн унтраахаар ажиллаж байна. Урьдчилсан байдлаар ой, хээрийн гал түймэрт 64.4 га талбай өртөж шатсан.

Хэнтий аймаг, Батширээт сум 1 дүгээр багийн “Баруун тас” гэдэг газар /аймгийн төвөөс хойд зүгт 180 км, сумын төвөөс баруун хойд зүгт 120 км/  www.firms.modaps.eosdis.nasa.gov сайтад түймрийн цэг илэрсэн дуудлагыг 06.26-ны өдрийн 13:37 цагт хүлээн авсан. Хэнтий аймгийн Онцгой байдлын газрын алба хаагчид ойн гал түймрийг унтраах ажиллагааг зохион байгуулж, 06.28-ны өдрийн 15:20 цагт цурамд оруулж, 06.29-ний өдрийн 09:15 цагт бүрэн унтраасан. Урьдчилсан байдлаар ойн гал түймэрт 1.32 га талбай өртсөн.

ОНЦГОЙ БАЙДЛЫН ЕРӨНХИЙ ГАЗАР