Монгол Улсын Шадар сайдын 2018 оны 118 дугаар тушаалаар баталсан “Онцгой байдлын байгууллагын алба хаагчид онцгой гавьяа байгуулсан тохиолдолд мөнгөн урамшуулал олгох журам”-ыг үндэслэн 2018 оноос эхлэн Онцгой гавьяа байгуулсан алба хаагчдад мөнгөн урамшуулал олгодог болсон. Энэ журмын дагуу зургаа  дахь  жилдээ гамшиг, осол, аюулт үзэгдлийн бүс болон хүний гоц халдварт өвчний голомтод аврах, эмчлэх, сувилах, хор уршгийг арилгах, сэргээн босгох ажиллагаанд эр зориг, мэргэжлийн ур чадвар гарган оролцсон таван алба хаагч тус бүрт 16 сая төгрөгийн мөнгөн урамшуулал олголоо.

ОБЕГ-ЫН ХАРЬЯА ҮНДЭСНИЙ АВРАХ БРИГАДЫН ЭРЭН ХАЙХ, АВРАХ САЛБАРЫН АВРАГЧ,  АХЛАГЧ Г.МӨНГӨНШАГАЙ 

Ахлагч Г.Мөнгөшагай нь Онцгой байдлын байгууллагад тав дахь жилдээ үүрэг гүйцэтгэж байна. Тэрбээр 2024 онд гамшиг, ослын дуудлагаар үүрэг гүйцэтгэхдээ 41 хүний амь насыг авран хамгаалж, таван буцалтгүй нэрвэгдэгчийг гарган, холбогдох байгууллагад хүлээлэгн өгч, дөрвөн нэгж техникийг үерийн голомтоос татан гаргасан. Тухайлбал, нийслэлийн Хан-Уул дүүргийн12 дугаар хороо Биокомбинатад болсон үерийн голомтоос 33 иргэний амь насыг аварсан бол Сонгино хайрхан дүүргийн 33 дугаар хороо Тахилтын  нүхэн гарц аадар борооны улмаас үерийн усаар дүүрч автомашин болон төмөр замын зорчих хэсэг хаагдсан дуудлагаар үүрэг гүйцэтгэж, зургаан автомашин татан гаргаж, 17 иргэний амь насыг аварч, усыг сорууах ажлыг гүйцэтгэн, зорчих хөдөлгөөнийг хэвийн болгосон. Сэлэнгэ аймгийн Хүдэр сумын нутаг дэвсгэрт гарсан ойн түймрийг унтраах ажиллагаанд оролцож, Хэнтий аймгийн Батширээт сум “Онон” голд осолдсон хоёр буцалтгүй нэрвэгдэгчийг эрэн хайх ажиллагаа мөн үерийн усанд осолдсон  автомашиныг татан гаргах ажиллагаануудад нийт 29 хоног үүрэг гүйцэтгэсэн байна. Түүнчлэн Хан-Уул дүүргийн 13 хороонд “Хилэм” загас үржүүлгийн нуурт Үндэсний аврах бригадын Эрэн хайх, аврах салбарын гүний усны сургалтын хотхоныг барих ажиллагаанд манлайлан оролцож,  Үндэсний аврах бригадын байрлалд сургалтын зориулалтаар ашиглах мөсөн хана болон ханан хадны авиралтын цамхаг, гүний усны цооногийг санаачлан салбарын аврагч нарын хамтаар хийж ашиглалтад оруулсан зэргээр үндсэн үүргээсээ гадна албаны бэлтгэл, бэлэн байдлыг дээшлүүлэхэд үнэтэй хувь нэмэр орууллаа.

НОБГ-ЫН ЧИНГЭЛТЭЙ ДҮҮРГИЙН ОНЦГОЙ БАЙДЛЫН ХЭЛТСИЙН ГАЛ ТҮЙМЭР УНТРААХ, АВРАХ 10 ДУГААР АНГИЙН САЛААНЫ ЗАХИРАГЧИЙН ТУСЛАХ, АХЛАХ АХЛАГЧ Э.ЭНХБАТ

Ахлах ахлагч Э.Энхбат нь Онцгой байдлын албанд 15 дахь жилдээ ажиллаж байна. Тэрбээр 2024 онд гал түймрийн 128 удаагийн дуудлагаар 52 цаг 25 минут ажиллаж,  утаажилтын бүсээс 143 иргэнийг гаргаж, аж ахуй нэгж, байгууллага, иргэдийн 3.4 тэрбум төгрөгийн өмч хөрөнгийг авран хамгааллаа.  Мөн Улаанбаатар хот орчмын гол, тогтоол усанд иргэд, живж осолдохоос урьдчилан сэргийлэх зорилгоор Туул гол дагуу хөдөлгөөнт эргүүлийн үүргийг 156 удаа гүйцэтгэж, аюулт үзэгдэл, ослоос урьдчилан сэргийлэх сэрэмжлүүлэг материал тараах, сэрэмжлүүлэг яриа хийх, хороотой бүсэд байрласан машиныг гаргах зэрэг ажлыг гүйцэтгэх хугацаандаа 69 иргэнийг үерийн усанд живэхээс урьдчилан сэргийлж ажилласан юм. Түүнчлэн өөрийн хариуцсан Чингэлтэй дүүргийн 1-24 дүгээр  хорооны айл өрхөд гамшгаас хамгаалах болон галын аюулгүй байдлын тухай  хуулиудын хэрэгжилт, галын аюулгүй байдлыг хангуулах зорилгоор 850 айл өрхөд галын аюулаас урьдчилан сэргийлэх үзлэг шалгалт хийж, гал түймэр гарч болзошгүй  231 зөрчил илрүүлж,  56 зөрчлийг газар дээр нь арилгуулж, бусдыг зөрчлийг арилгуулах арга хэмжээг зохион байгууллаа. Мөн Чингэлтэй дүүргийн 7, 8, 12, 17, 18 дугаар хорооны гудамж талбай, булгийн ус газрын хөрснөөс нэвчин гарч хөлдөлт үүссэн голомтод  айл өрхийн хашаа, гудамж талбайд тогтсон мөсийг цэвэрлэж, суваг шуудууг сэргээн засварлах ажлыг хийж гүйцэтгэсэн зэргээр үүргээ нэр төртэйгөөр биелүүлж байна.

ХОЙД БҮСИЙН ТӨВ-ОРХОН АЙМГИЙН ОНЦГОЙ БАЙДЛЫН ГАЗРЫН ГАЛ ТҮЙМЭР УНТРААХ, АВРАХ 56 ДУГААР АНГИЙН АВРАГЧ-ГАЛ СӨНӨӨГЧ, АХЛАХ АХЛАГЧ Э.ЭРДЭНЭБАТ

Ахлагч ахлагч Э.Эрдэнэбат нь Онцгой байдлын байгууллагад 11 дэх жилдээ үүрэг гүйцэтгэж байна. Тэрбээр 2024 онд аймгийн Баян-Өндөр сумын Оюут багийн нутаг дэвсгэр “Гранд гарден хотхон”-д гарсан дуудлагаар үүрэг гүйцэтгэж, 10 хүний амь нас, “ЦАХ” маркет худалдааны төвд гарсан гал түймрийн дуудлагаар ажиллаж, 105 түрээслэгчийн тэрбум гаруй төгрөгийн эд хөрөнгийг авран хамгааллаа.

Мөн гэр хорооллын айл өрхүүдийг галын аюулаас урьдчилан сэргийлэх ажлын хүрээнд зургаан багийн 915 өрхөд шалган туслах, зөвлөн зааварчилгаа өгсөн байна.

Түүнчлэн анги байгууллагын өнгө үзэмжийг нэмэгдүүлэх, ажиллах орчин нөхцлийг сайжруулахад манлайлан оролцож, ангийн тавиулангийн багананд гал унтраах болон аврах ажиллагааны багаж зэвсэглэмжээр үзүүлэн хийж, амьсгалын бие даасан төхөөрөмжийг агаараар цэнэглэх өрөө, Онцгой байдлын газрын дөрвөн алба хаагчийн өрөөг бүрэн засварлах, Төрийн далбааг мандуулах хүндэтгэлийн тавцанг шинээр хийж, хамт олны ажилд манлайлан оролцсон юм.

СҮХБААТАР АЙМГИЙН ОНЦГОЙ БАЙДЛЫН ГАЗРЫН ЭРЭН ХАЙХ, АВРАХ САЛБАРЫН БҮЛГИЙН ДАРГА, АВРАХ АЖИЛЛАГААНЫ ЗААВАРЛАГЧ, ДЭСЛЭГЧ Ө.БАТ-ОЧИР

Дэслэгч Ө.Бат-Очир нь Онцгой байдлын байгууллагад 17 дахь жилдээ ажиллаж байна. Тэрбээр 2024 онд 61 удаагийн гамшиг, аюулт үзэгдэл, ослын дуудлагаар үүрэг гүйцэтгэж, 165 хүний амь насыг авран хамгаалж, буцалтгүй 4 нэрвэгдэгчийг гарган холбогдох байгууллагад хүлээлгэн өгсөн. Мөн хээрийн түймрийн дөрвөн удаагийн дуудлагаар ажиллаж, ард иргэдийн 5 ханатай гэр-2, өвөлжөө хашаа-5 буюу нийт 68 сая төгрөгийн эд хөрөнгийг  түймрийн аюулаас авран хамгаалж чадлаа. Сүхбаатар аймгийн хэмжээнд өвөлжилт хүндэрсэнтэй холбогдуулан аймгийн Онцгой комиссын шийдвэрээр ковштой тусгай зориулалтын техник ашиглан Сүхбаатар, Асгат сумдын Онцгой комисстой хамтран хаагдсан төв замын нийт  300 орчим км замын цасыг ковшоор хусаж, хагалан зам гаргах ажлыг шуурхай зохион байгуулж, малчид, ард, иргэд болоод тээврийн хэрэгслийн аюулгүй зорчих боломжийг бүрдүүлсэн юм.

ЗАВХАН АЙМГИЙН ОНЦГОЙ БАЙДЛЫН ГАЗРЫН УЛИАСТАЙ СУМ ДАХЬ ГАЛ ТҮЙМЭР УНТРААХ, АВРАХ 43 ДУГААР АНГИЙН ГАЛ УНТРААХ АВТОМАШИНЫ ЖОЛООЧ, АХЛАХ АХЛАГЧ М.ОЧИРБАТ

Ахлах ахлагч М.Очирбат нь Онцгой байдлын байгууллагад 9 дэх жилдээ үүрэг гүйцэтгэж байна. Тэрбээр 2024 онд нийт 24 удаагийн гамшиг, аюулт үзэгдэл, ослын дуудлагаар ажиллаж, 40 иргэний амь нас, байгууллага, аж ахуйн нэгж, иргэдийн 120 гаруй сая төгрөгийн өмч хөрөнгийг авран хамгааллаа. Мөн Улиастай сумын Жинст багийн нутаг дэвсгэрт болсон үерийн дуудлагаар ажиллан, гэртэй гацсан дөрвөн иргэнийг аюулгүйн талбайд гаргаж, тухайн нутаг дэвсгэрийг сэргээн босгох лаг шаврыг цэвэрлэх, зөөх ажлыг 18 хоног зохион байгуулсан юм.