Цаг агаар:

Өнгөрсөн хоногт: Архангай, Дорнод, Орхон, Өвөрхангай, Хөвсгөл аймагт бороо орсон. Бусад нутагаар цаг агаар тогтуун байлаа.

Өнөөдөр: Ихэнх нутгаар үүлшинэ. Хангай, Хөвсгөл, Хэнтийн уулархаг нутаг, говийн бүс нутгийн зарим газраар дуу цахилгаантай аадар бороо орно. Салхи ихэнх нутгаар баруунаас 5-10 м/с, борооны өмнө түр зуур ширүүснэ. Монгол-Алтай, Хангай, Хөвсгөлийн уулархаг нутгаар +18...+23 градус, говийн бүс нутгийн өмнөд хэсгээр +33...+38 градус, Их нууруудын хотгор, говийн бүс нутгийн хойд хэсгээр +28...+33 градус, бусад нутгаар +23...+28 градус дулаан байна.

Улаанбаатар хотод: Үүлшинэ, дуу цахилгаантай бага зэргийн аадар бороо орно, салхи баруунаас 5-10 м/с, борооны өмнө түр зуур ширүүснэ, өдөртөө +25...+27 градус дулаан байна.

Гал түймэр: 

-Дундговь аймаг, Адаацаг сум. Өвөр-Урт багийн “Хөшөөтийн булаг” гэдэг газар /аймгийн төвөөс баруун хойд зүгт 141 км, сумын төвөөс зүүн хойд зүгт 37 км-т, 46.53492E, 106.16768N/ 08.04-ний өдрийн 16:30 цагт гэр шатсан тухай мэдээллийг хүлээн авсан. Малчин О-ийн 5 ханатай гэр шатсан тухай мэдээллийг 08.06-ны өдрийн 12:50 цагт тус сумын Засаг даргын Тамгын газрын дарга аймгийн Онцгой байдлын газарт ирүүлсэн.  

- Улаанбаатар хот, Хан-Уул дүүрэг. 2 дугаар хорооны “Задгай”-д /47°51'49.4"N, 106°45'47.3"E/ суудлын автомашин шатаж байна гэсэн дуудлагыг 08.06-ны өдрийн 07:01 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 30 дугаар ангийн алба хаагчид 1 км зам туулан 07:04 цагт очиход иргэн Э-ийн "Crown"  загварын суудлын автомашин шатаж байсныг 20 минут ажиллаж унтраасан.

Хүний үйл ажиллагаатай холбоотой осол. Голын усанд осолдсон: 

- Дорнод аймаг, Хэрлэн (Сүмбэр). 6 дугаар багийн “Задгай”-д Хэрлэн голын усанд 1 хүн живсэн тухай дуудлагыг 08.03-ны өдрийн 12:24 цагт хүлээн авсан. Тус аймгийн Онцгой байдлын газрын Эрэн хайх, аврах ангийн алба хаагчид иргэн О/25 настай, эрэгтэй/-ыг эрэн хайх ажиллагааг 08.05-ны өдрийн 05:00 цагаас осолдсон газраас Баянтүмэн сумын Жаргалант багийн “Өндөр-Эрэг” гэдэг газар хүртэл 70 км зайд 3 удаагийн давтамжтай голын  усаар завиар урсаж зохион байгуулсан боловч үр дүнд хүрээгүй тул 20:00 цагт түр зогсоосон. 08.05-ны өдрийн 05:00 цагт дахин эхлүүлж 13:50 цагт тус багийн "Гучин хоёрын саам" гэдэг газар /анх осолдсон газраас зүүн зүгт 30 км/-аас цогцсыг олж уснаас гарган Цагдаагийн байгууллагад шилжүүлэн өгсөн.  

- Хөвсгөл аймаг, Рэнчинлхүмбэ сум. Хоолойн зах багийн "Тэнгис" гэдэг газар /аймгийн төвөөс хойд зүгт 300 км, сумын төвөөс баруун хойд зүгт 100 км-т/  “Тэнгис-Шишгэд”-ын голд 3 хүн моторт завиар зугаалж яваад завь нь хөмөрч 2 хүн нь эсэн мэнд гарч, 1 хүн нь осолдсон тухай дуудлагыг 08.03-ны өдрийн 19:08 цагт хүлээн авсан. Хөвсгөл аймгийн Онцгой байдлын газрын Эрэн хайх, аврах салбарын алба хаагчид,  Агаараас эрэн хайх, аврах ангийн 111 дүгээр анги, Үндэсний аврах бригадын алба хаагчид, ар гэрийнхэнтэй иргэн П/36 настай, эрэгтэй/-ийг эрэн хайх ажиллагааг 08.06-ны өдөр анх осолдсон газраас явганаар голын урьд болон хойд эргээр нийт 3.6 км газар, осолдсон газраас доош 9 км газар дроноор самналт хийж 18:00 цагт түр зогсоосон. 08.07-ны өдрийн 08:00 цагт дахин эхлүүлсэн. 

Төөрсөн, сураггүй болсон:

- Дорноговь аймаг, Айраг сум. Өнгөт багийн "Олон-Овоо” гэдэг газар /Дорноговь аймгийн төвөөс хойд зүгт 155 км, Айраг сумаас хойд зүгт 25 км, Говьсүмбэр аймгийн төвөөс урд зүгт 50 км-т/ Иргэн Э нь 08.02-ны өдөр  мотоциклоор яваад сураггүй болсон тухай дуудлагыг 08.05-ны өдрийн 17:15 цагт хүлээн авсан. Говьсүмбэр аймгийн Онцгой байдлын газрын Гал түймэр унтраах, аврах 37 дугаар ангийн алба хаагчид,  ар гэрийн хүнтэй 50 км зам туулан 12:17 цагт очиж иргэн Э/44 настай, эрэгтэй/-ыг эрэн хайх ажиллагааг Шивээговь сумын 2 дугаар багийн "Цагаан-Эрэг", Дорноговь аймгийн Айраг сум "Олон-Овоо", "Алаг толгой"-н уурхай, МАК-ийн уурхай, Даланжаргалан сумын 2 дугаар багийн "Өнгөт"-ийн гүүрнээс урд зүгт 10 км орчим, нийт 400 км эрэн хайх ажиллагааг зохион байгуулж гуу жалга, үер урссан сайр эргээр дрон нисгэж зохион байгуулж 20:00 цагт зогсоосон. 

- Увс аймаг, Давст сум. Зүүн хөвөө багийн "Нуурын хөвөө" гэдэг газар /аймгийн төвөөс зүүн хойд зүгт 145 км  сумын төвөөс зүүн хойд зүгт 15 км-т, N 53.610 E92.2602/ Увс нуурын эрэг дээр 17 хүн амарч байснаас 08.05-ны өдрийн 18:00 цагт иргэн Д нь “Тэрмис” уул руу яваад сураггүй болсон тухай дуудлагыг 08.06-ны өдрийн 17:06 цагт хүлээн авсан. Тус аймгийн Онцгой байдлын газрын Давст сум дахь Эрэн хайх аврах бүлгийн алба хаагчид 15 км зам туулан 17:45 цагт очиж иргэн М/66 настай, эрэгтэй/-ийг эрэн хайх ажиллагааг эхэлүүлж 18:15 цагт тус багийн   “Шаварт” гэдэг газар /Тэрмис уулаас урд зүгт 8 км/-аас эсэн мэнд олсон.

ОНЦГОЙ БАЙДЛЫН ЕРӨНХИЙ ГАЗАР