Онцгой байдлын ерөнхий газраас усны ослын тохиолдол, үер, усны нөхцөл байдлын талаар мэдээлэл хийлээ. ОБЕГ-ын Урьдчилан сэргийлэх газрын ахлах мэргэжилтэн, ахмад Б.Энхмаа:

-Сүүлийн 10 жилд улсын хэмжээнд нийт 1044 иргэн усны ослоор амь насаа алдсан. Усны ослын тохиолдлоос насны онцлогоор нь харвал ид буюу 17-21 насныхан дийлэнх хувийг эзэлж байна. 67 хувь эрэгтэйчүүд, Туул голд 26 хувь нь осолдсон. Хар цэг гэж нэрлэдэг гол мөрнүүдэд анхааруулга сэрэмжлүүлэг бүхий постер, самбаруудыг байршуулж байна. Завьт эргүүлийнхэн голын эргээр явж байгаа хүмүүст шаардлага тавьж, зөвлөмжийг өгч ажилладаг. 

Энэ сарын 15-нд согтууруулах ундаа хэрэглэсэн иргэдэд алба хаагчид шаардлага тавьсан ч хүлээж аваагүй. Бусад иргэдэд шаардлага хүргүүлэхээр яваад удаагүй байхад усанд осолдсон гэх дуудлага мэдээлэл ирсэн. Дуудлагын дагуу очиход өнөөх шаардлага хүлээж аваагүй согтуурсан иргэд байсан. Нэг иргэн усанд осолдож амиа алдсан. 55 том хүн, 13 хүүхэд усны ослоор амь насаа алдсан.

Албан хаагчид ямар ч ээлжгүйгээр ажиллаж байна. Юуны төлөө вэ гэхээр ард иргэдийн төлөө. Нэг ч гэсэн иргэн, нэг ч гэсэн хүүхэд битгий амь насаа алдаасай гэдэг байдлаар анхааруулга сэрэмжлүүлгийг өгөх үүднээс хэлж яриад, зөвлөөд яваад байгаа юм. Тасралтгүй ажиллаж байна.

Усны ослын тохиолдол судалгааг харах юм бол нийт иргэдийн 14 хувь нь усанд сэлж чаддаг хүмүүс байдаг. Өөрөөр хэлбэл, усанд сэлж чаддаг хүмүүс усанд илүү их осолдож байна. Энэ бол усанд бардаж байгаагийн хэлбэр. Нөгөө талаасаа Туул, Орхон, Хараа, Хэрлэн голууд дээр тухайн газар нутгийн бус өөр нутгийн хүмүүс ирж осолдож байна. Тухайн иргэн тэр бүс нутгийн онцлогийг мэдэхгүй, дээрээс нь сэлж чаддаг даа бардаж байна. Зөвхөн архи согтууруулах ундаа уусан үедээ осолдоод байгаа юм биш.

Мөн төрөл бүрийн амьтны дүрстэй хийлдэг гудас, тоглоомуудыг маш ихээр ашигладаг болсон. Эцэг, эхчүүд хүүхдээ тоглуулахын тулд ийм зүйлсийг хэрэглэж байна. Хүүхдээ эрхлүүлж болно, голын усанд бүү эрхлүүлээч ээ. Урсгал усанд ашиглах зориулалттай эд биш ээ, энэ бол. Жижиг усан бассейн, тогтоол усанд ашигладаг.

Нэг дор гэр бүлийн хүмүүс нэгэн зэрэг осолдох тохиолдол байна. Нэг нь усанд осолдохоор араас нь аврах гэж ороод амь насаа алдах тохиолдол гарч байгаа. 

Сүүлийн 10 жилд 10044 хүн голын усанд амиа алдсан. Үүний 71.4 хувь нь том хүн. 28.9 хувь нь хүүхэд. Усны ослоор 68 иргэн амь насаа алдсан гэдэг тоог зүгээр нэг сонсоод өнгөрөхгүй байгаасай. Өөрт нь, гэр бүлийн ойрын хүнд нь тохиолдоогүй бол сонсоод, харамсаад өнгөрдөг. Сэрэмжлүүлгийг хүлээж авахгүй байна. Усанд ам гарч болохгүй гэдэг. Гай хийсч ирдэг. Иргэн бүр анхаарал сэрэмжтэй байх хэрэгтэй байна. 68 гэсэн энэ тоог нэмэгдүүлэхгүй байх бүрэн боломжтой.

Тогтоол усанд амь насаа алдах, мотоцикл, морьтой усыг гатлах гэж байгаад амь насаа алдах тохиолдлууд байна. 2023 онд усны ослын 72 тохиолдол бүртгэгдсэн. Энэ онд өмнөх жилүүдээс илүү олон усны ослын тохиолдол бүртгэгдэх магадлалтай байна гэв.

Эх сурвалж: zogii.mn