Онцгой байдлын ерөнхий газраас “Монгол орны хөдөөгийн иргэдийн уур амьсгалын өөрчлөлтөд дасан зохицох чадамж болон эрсдэлийн менежментийг боловсронгуй болгох” нь АДАПТ төсөлтэй хамтран “Урьдчилан сэргийлэх, эрсдэлийн үнэлгээ хариуцсан мэргэжилтний чадавхжуулах сургалт”-ыг энэ сарын 16-20-ны өдрүүдэд “Глобал Сивик Шэйринг” ТББ-ын сургалтын төвд зохион байгууллаа.

  Сургалтад төв, орон нутгийн Онцгой байдлын байгууллагын Урьдчилан сэргийлэх, эрсдэлийн үнэлгээ хариуцсан 30 гаруй мэргэжилтнүүд хамрагдаж, гамшгийн эрсдэлийн удирдлага, олон улсын болон улсын гамшгийн эрсдэлийн нөхцөл байдал, цаашдын төлөв, гамшгийн эрсдэлийг бууруулах үйл ажиллагааны чиг хандлага, уур амьсгалын гаралтай гамшгийн эрсдэлийг бууруулах арга зам, нөлөөлөлд суурилсан урьдчилсан мэдээ, санхүүжилт, газар хөдлөлт, ой хээрийн гал түймрийн гамшгийн эрсдэлийг бууруулах чадавхыг бэхжүүлэх чиглэлээр онол, практикийн мэдлэгийг  олгосон юм.

Мөн хэвлэл, олон нийттэй харилцах арга,  зохион байгуулалт, эрхзүйн баримт бичиг болон үндэсний хэмжээнд боловсруулсан эрсдэлийн ерөнхий үнэлгээний өгөгдөл, дата, мэдээлэлд тулгуурлан аймаг, 330 сум, багийн түвшинд гамшгийн төрлөөр ангилан газарзүйн мэдээллийн систем дээр зураглал боловсруулах чадварыг эзэмшүүллээ.

Ингэснээр гамшгийн орон зайн мэдээллийн системийг ашиглан өөрийн орон нутгийн хэмжээнд эрсдэлийн зураглалыг гамшгийн төрөл тус бүрээр боловсруулах, олон нийтэд гамшгаас хамгаалах мэдээ, мэдээлэл түгээх, цахим хуудас хөтлөх анхан шатны ур чадварыг эзэмшснээр гамшгийн эрсдэлийн удирдлагын тухай мэдлэг ойлголт нэмэгдэж, эрсдэлийн мэдээлэлд суурилсан шийдвэр гаргах, төлөвлөх чадварт суралцлаа.