Төв, орон нутгийн Онцгой байдлын байгууллагын эмч-сэтгэл зүйч, сувилагч, эмнэлгийн мэргэжилтэн нарын мэдлэг, ур чадварыг дээшлүүлэх, мэргэшүүлэх зорилгоор Онцгой байдлын ерөнхий газраас  Анагаахын Шинжлэх Ухааны Үндэсний Их Сургуультай хамтран ажиллах гэрээг шинэчлэн байгууллаа.  Гэрээнд ОБЕГ-ын дарга, хошууч генерал Г.Ариунбуян,  АШУҮИС-ийн ректор Б.Дамдиндорж нар гарын үсэг зурсан юм.

 Хамтын ажиллагааны хүрээнд үндсэн нарийн мэргэжил болох зүү, төөнө заслын чиглэлээр-2, уламжлалт анагаахын мэдрэл судлалын чиглэлээр-1, дүрслэл оношилгооны чиглэлээр-1 буюу нийт 4 алба хаагчийг суралцуулж,  сэтгэл судлалын мэргэжил дээшлүүлэх богино хугацааны гурван сарын сургалтад 3 алба хаагч тус тус хамруулаад байна.

Мөн нийт эмч, сувилагч, эмнэлгийн мэргэжилтэн нарын 20.3 хувийг сургалтад хамруулж, 2025-2026 оны хичээлийн жилд анагаах ухааны магистрт-2, мэдээгүйжүүлэг судлалын чиглэлээр-2, хөдөлмөрийн эрүүл мэнд судлал чиглэлээр-1, яаралтай тусламжийн сувилагчаар-1 буюу нийт 6 алба хаагч элсэн суралцаж байна. 

Цаашид хамтын ажиллагааг өргөжүүлэх зорилгоор эмч, сувилагч, эмнэлгийн мэргэжилтэн нарын төгсөлтийн дараах үндсэн болон төрөлжсөн мэргэжлээр сургаж мэргэшүүлэх, 
төв, орон нутагт зохион байгуулах эрүүл мэндийн урьдчилан сэргийлэх хугацаат үзлэгийн бүрэлдэхүүнд нарийн мэргэжлийн эмч нарыг ажиллуулах, 
Онцгой байдлын байгууллагын эмч, сувилагч, эмнэлгийн мэргэжилтэн нарыг тус сургуулийн харьяа эмнэлэг, сувилалд дадлагажуулах, чадавхжуулах, алба хаагчдыг сургуулийн харьяа эмнэлэг, сувилалд хэвтэн эмчлүүлэх, эрүүл мэндийн боловсрол олгох арга хэмжээг хамтран хэрэгжүүлэхээр боллоо.