ОБЕГ-ын дарга, хошууч генерал Г.Ариунбуян, БНХАУ-аас Монгол Улсад суугаа Онц бөгөөд бүрэн эрхт Элчин сайд, эрхэмсэг хатагтай Шэнь Миньжуантай уулзаж, хоёр орны гамшгаас хамгаалах салбарын хамтын ажиллагааны талаар санал солилцлоо.

 Уулзалтаар талууд Монгол Улсын Засгийн газар, БНХАУ-ын Засгийн газар хоорондын “Хил орчмын ой, хээрийн гал түймрээс урьдчилан сэргийлэх, түймэртэй тэмцэх талаар хамтран ажиллах хэлэлцээр”-т нэмэлт өөрчлөлт оруулах, хэлэлцээрийн хүрээнд хамтарсан комисс байгуулах, Онцгой байдлын байгууллагын хот дахь эрэн хайх, аврах багийг чадавхжуулах, алба хаагчдыг БНХАУ-д академик түвшинд суралцуулах болон бусад асуудлаар хэлэлцсэн юм.

 Хатагтай Шэнь Миньжуан хоёр орны гамшгаас хамгаалах салбарын хамтын ажиллагааг цаашид улам бүр өргөжүүлэн хөгжүүлэхэд анхаарч ажиллахаа энэ үеэр онцлон тэмдэглэлээ.