Дэлхийн улс орнуудын гамшгийн асуудал эрхэлсэн дээд түвшний төлөөлөгчдийн “Гамшгийн эрсдэлийг бууруулах дэлхийн платформын VIII хуралдаан”-д оролцох үеэрээ ОБЕГ-ын дарга, хошууч генерал Г.Ариунбуян Япон Улсын Бодлогын зохицуулалт хариуцсан дэд сайд, ноён Хара Хироакитай хоёр талт уулзалт хийлээ.

Хошууч генерал Г.Ариунбуян байгалийн гамшиг, онцгой үед Монгол Улсад буцалтгүй тусламж үзүүлдэгт Япон Улсын Засгийн газар, Японы ард түмэнд талархал илэрхийлж, хоёр улсын гамшгийн асуудал эрхэлсэн төрийн байгууллагуудын хамтын ажиллагааг бэхжүүлэх, харилцан ойлголцлын санамж бичиг байгуулах саналтай байгаагаа илэрхийлсэн юм.

Мөн Монгол Улсын гамшгийн нөөцийн хүнсний бараа, материал болон газрын тосны бүтээгдэхүүний агуулах байгуулах төсөл хэрэгжүүлэх, Япон Улсын гамшгаас эрт сэрэмжлүүлэх, зарлан мэдээлэх, хиймэл дагуулын тандалт, газарзүйн мэдээллийн систем, газар хөдлөлтийн эрсдэлийн судалгаа, хяналтын дэвшилтэт технологийг ашиглах талаар болон Онцгой байдлын байгууллагын алба хаагчдыг тус улсад нарийн мэргэжлээр сургах боломжийг судлан, дэмжлэг үзүүлэхийг хүслээ.

Ноён Хара Хироаки Япон Улсын Засгийн газар, Гал түймэр, гамшгийн удирдлагын газар Монгол Улсын Засгийн газартай хамтран ажиллахад үргэлж нээлттэйг онцлоод, Онцгой байдлын байгууллагын алба хаагчдыг нарийн мэргэжлээр сургах, дадлагажуулах боломжтой бөгөөд ажил, хэрэг болгоход анхаарч ажиллахаа илэрхийллээ.