Монгол Улсын Шадар сайдын 2024 оны 63 дугаар тушаалын дагуу Онцгой байдлын ерөнхий газраас Аж үйлдвэр, эрдэс баялгийн улсын албанд Гамшгаас хамгаалах бэлэн байдлын үзлэгийг хоёр үе шаттайгаар зохион байгуулж, дүнгийн хурлаа хийлээ.

Эхний шатанд “Цуглар дохио”-оор  Шуурхай штаб, Ашигт малтмал, газрын тосны газар, Үндэсний геологийн алба, Геологийн cудалгаа-шинжилгээний төв ТӨҮГ,  “Эрдэнэс Монгол” ХХК-ийн нийт 262 ажилтан, алба хаагчийг цуглуулж, хүн нэг бүрийн бэлэн байдал, хөдөлмөр хамгааллын хувцас, багаж хэрэгсэл болоод автомашин, тусгай зориулалтын багаж, техник, тоног төхөөрөмжийн бэлэн байдлыг шалгасан юм.

Харин II шатанд Аж үйлдвэр, эрдэс баялгийн улсын алба, Ашигт малтмал, газрын тосны газар, Үндэсний геологийн алба, Геологийн cудалгаа-шинжилгээний төв ТӨҮГ, Багануур ХК-д ерөнхий 12, нарийвчилсан 24 үзүүлэлтээр гамшгаас хамгаалах хууль тогтоомжийн хэрэгжилт, гамшгаас хамгаалах алба, мэргэжлийн ангийн төлөвлөлт, гамшгийн үеийн удирдлага, зохион байгуулалт, гамшгийн үед үүрэг гүйцэтгэх хүн, техник, холбооны бэлэн байдал, болзошгүй хүндрэл бэрхшээлийг хэрхэн тодорхойлсон зэргийг үнэлж, дүгнэсэн байна.

Дүнгийн хурлын үеэр ажлын хэсгийн ахлагч, ОБЕГ-ын Ажиллагааны удирдлагын газрын дарга, хурандаа А.Дашням  “Эрдэс баялгийн салбар-Эрсдэлийн эсрэг хамтдаа” уриаг дэвшүүлэн бэлтгэл, бэлэн байдлыг хангаж ажилласныг онцлоод, цаашид эрсдэлийн үнэлгээнд тулгуурлан гамшгаас хамгаалах төлөвлөгөөг боловсруулж, хэрэгжүүлэх, ажилтан, алба хаагчдын бүх шатны оролцоог хангах, гамшгаас хамгаалах үйл ажиллагаанд зарцуулах хөрөнгийг нэмэгдүүлж, гамшгаас хамгаалах хууль, тогтоомжийн хэрэгжилтийг хангаж ажиллахыг даалгалаа.