Мьянмарт болсон газар хөдлөлтийн улмаас Тайландын Бангкок хотод өндөр барилга нурж, 43 ажилчин нурангид дарагджээ
Мьянмарын Холбооны Бүгд Найрамдах Улсын Сагайнг хотод өнөөдөр 7.7 магнитудын хүчтэй газар хөдлөлт болсон байна. Газар хөдлөлтийн голомт нь Сагайнг хотоос баруун хойд зүгт 16 км-ийн зайд, 10 км-ийн гүнд байсан гэж албаны мэдэгдэлд дурджээ. Энэ бүс нь нийслэл Нейпидо хотоос хойд зүгт 100 орчим км зайд оршдог аж.
Тус газар хөдлөлтийн чичирхийлэл Тайланд, Вьетнам зэрэг хөрш таван оронд мэдрэгдсэн бөгөөд хүчтэй газар хөдлөлтийн дараа Тайландын нийслэл Бангкок хотод төрийн байгууллагын оффисын зориулалтаар барьж байсан 30 давхар өндөр барилга нурж, 43 ажилчин нурангид дарагдсан тухай тус улсын Онцгой байдлын алба мэдээлжээ. Одоогоор хүний амь нас хохирсон тухай мэдээлээгүй байна.
Түүнчлэн дахин газар хөдлөх магадлалтайг мэргэжлийн байгууллагаас анхааруулсан тул тус бүс нутагт амьдарч байгаа болон зорчин яваа манай улсын иргэд өндөр барилга, ургаа мод, цахилгааны шон зэргээс хол байж, өөрийгөө болон гэр бүлийн гишүүдээ задгай талбайд нүүлгэн шилжүүлэх хэрэгтэй гэж Монгол Улсаас Тайландын Хаант улсад суугаа Элчин сайдын яамнаас зөвлөв.
Газар хөдлөлтийн улмаас гэмтэж бэртсэн эсвэл танил, найз нөхөд, хамаатан садан, гэр бүлийн гишүүн нь холбоо тасарсан бол Элчин сайдын яамны +66 061-026-9692, +66 082-003-8683 шуурхай утсаар яаралтай мэдээлэх аж.
Эх сурвалж: montsame.mn
Уг нийтлэлийн бүх текстүүдийг хуулах
Уг нийтлэлийн бүх зургийг татах
Бусад мэдээлэл
2025/03/28
Шинэ мэдээАжиллагааны шуурхай штаб удирдлага, зохион байгуулалтаар ханган ажиллаж байна
“Ажиллагааны шуурхай штаб” нь гамшгаас хамгаалах улсын алба, яам, агентлаг, аймаг, сум, дүүргийн Онцгой комиссын үйл ажиллагаанд мэргэжил, аргазүйн дэмжлэг үзүүлж, удирдлага, зохион байгуулалтаар хангаж, гамшиг, аюулт үзэгдэл, ослоос урьдчилан сэргийлэх, хүн, хүч, хэрэгслийг тодотгож, томилгоожуулах, үүссэн нөхцөл байдалд үнэлгээ, дүгнэлт хийж, шийдвэр гаргах арга хэмжээг хэрэгжүүлэх юм.
2025/03/28
Шинэ мэдээБайгууллагын үйл ажиллагаа, төсөл, хөтөлбөр болоод хэрэгжүүлж байгаа арга хэмжээ, гамшиг, ослын нөхцөл байдалтай танилцлаа
Он гарсаар дөрөвдүгээр сарын 06-ны өдрийн байдлаар 1282 удаагийн аюулт үзэгдэл, осол тохиолдож, Онцгой байдлын байгууллагын алба хаагчид 1570 хүн, урьдчилсан байдлаар 116.9 тэрбум төгрөгийн эд хөрөнгийг авран хамгааллаа.
2025/03/28
Шинэ мэдээНийслэлийн 2 дүүрэг, 8 аймгийн 21 суманд 25 удаагийн ой, хээрийн гал түймэр бүртгэгдээд байна
Дээрх түймэрт ойн 704 га, хээрийн 58.615 га нийт 59.319 га талбай өртсөн бол ой, хээрийн түймрийн аюулаас 26 гэр, 19 өвөлжөө, хашаа саравч авран хамгаалж, 3 айл өрхийн 8 иргэн, 2000 орчим малыг нүүлгэн шилжүүллээ.
