Уур амьсгалын ногоон сангийн дэмжлэгтэйгээр хэрэгжүүлж буй “Монгол орны хөдөөгийн иргэдийн уур амьсгалын өөрчлөлтөд дасан зохицох чадавхыг бэхжүүлэх” (АДАПТ) төслийн хүрээнд “Гамшгийн эрсдэлийн удирдлага” гарын авлагыг 2023 онд гамшгийн эрсдэлийг бууруулах үндэсний болон орон нутгийн зөвлөл, гамшгаас хамгаалах албадын бүрэлдэхүүнд зориулан боловсруулсан.

Энэ хүрээнд Ховд, Завхан аймгийн Гамшгийн эрсдэлийг бууруулах орон нутгийн зөвлөлийн гишүүд, аймгийн Онцгой байдлын газрын бүрэлдэхүүн, сумдын Засаг даргын тамгын газрын дарга нар болон холбогдох байгууллагын төлөөлөлийг оролцуулсан сургалтыг энэ сарын 11-13-ны өдрүүдэд зохион байгууллаа.

Сургалтаар оролцогчдод гарын авлагыг танилцуулахаас гадна ус, цаг уурын гаралтай гамшиг, аюулт үзэгдлээс урьдчилан сэргийлэх мэдээлэлд суурилсан төлөвлөлтийг хийх чадавхыг нэмэгдүүлэх зорилгоор бүлгээр ажиллан, хэлэлцүүлэг өрнүүлсэн юм.

Мөн Ховд, Завхан аймгийн Онцгой байдлын газрын алба хаагчдад гамшгийн мэдээллийн сан, газарзүйн мэдээллийн системийн чиглэлээр мэдээлэл өгч ажиллалаа.

“Гамшгийн эрсдэлийн удирдлага” гарын авлагыг танилцуулах сургалтыг өнгөрсөн оны арваннэгдүгээр сард  21 аймаг, нийслэл, 9 дүүргийн Гамшгийн эрсдэлийг бууруулах орон нутгийн зөвлөлийн төлөөлөл, төв, орон нутгийн Онцгой байдлын байгууллагын гамшгийн эрсдэлийн удирдлага, үнэлгээ хариуцсан мэргэжилтнүүдэд Улаанбаатар хотноо зохион байгуулсан юм.

 “Монгол орны хөдөөгийн иргэдийн уур амьсгалын өөрчлөлтөд дасан зохицох чадавхыг бэхжүүлэх” төслийн хүрээнд Ховд, Завхан, Дорнод, Сүхбаатар аймгийг зорилтод аймгаар сонгосон бөгөөд төсөл 2028 он хүртэл хэрэгжинэ.