Онцгой байдлын ерөнхий газраас ШУТИС-ийн Механик инженер, тээврийн сургуультай хамтран “Автомашины цахилгаан болон электрон систем, оношилгоо, засварын мэргэшүүлэх богино хугацааны модуль” сургалтыг энэ сарын 10-12-ны өдрүүдэд зохион байгууллаа. 

Сургалтад төв, орон нутгийн Онцгой байдлын байгууллагын хөдөлмөрийн аюулгүй байдал, техник хэрэгсэл хариуцсан мэргэжилтэн, механик жолооч нарын нийт 20 орчим алба хаагч хамрагдаж, мэргэжлийн ур чадвараа дээшлүүлсэн юм.

ОБЕГ-ын дэд дарга, хурандаа Ц.Уранчимэг, ШУТИС-ийн Механик инженер, тээврийн сургуулийн захирал, доктор, дэд профессор Н.Пүрэвдорж нар сургалтын хаалтын арга хэмжээнд оролцож, сургалтаар олгосон мэдлэг, ур чадварыг өдөр тутмын үйл ажиллагаандаа хэрэгжүүлж, алба хаагчдад таниулж ажиллахыг чиглэл болгоод, ажлын амжилт хүслээ.

Алба хаагчдад сүүлийн үеийн дэвшилтэт бүх төрлийн автомашины бүтэц, хийцийн лаборатори, цахилгаан болон электрон систем, камминс хөдөлгүүр, Тоёота хөдөлгүүрийн симулятор, “Приус 50” загварын сургалтын автомашины лаборатори, Hi-tech загварын оношилгооны автосканер, мультиметр ашиглан оношилгоо, засварын ажлыг гүйцэтгэх чадварыг эзэмшүүлсэн юм.