Онцгой байдлын ерөнхий газрын дэд дарга, хурандаа Ц.Уранчимэг Сүхбаатар аймагт ажиллах үеэрээ Баруун-Урт сумын ерөнхий боловсролын II сургуулийн ахлах ангийн сурагчдад эх оронч үзэл, үндэсний үнэт зүйл, өв соёлоо дээдлэх, эрсдэлийг ойлгох, гамшгийн эрсдэлээс урьдчилан сэргийлэх, уур амьсгалын өөрчлөлтөд дасан зохицох-сөрөн тэсвэрлэх агуулгаар сургалт хийлээ. Сургалтад тус сургуулийн ахлах ангийн 180 гаруй сурагч хамрагдсан юм.

 

Онцгой байдлын байгууллагын үйл ажиллагаа, байгаль дэлхий, эх орноо хайрлах, цөлжилтөөс сэргийлж мод тарих, уур амьсгал, ус, цаг уурын гаралтай аюулт үзэгдлээс урьдчилан сэргийлэх, гамшиг, ослын үед өөрийн болон бусдын амь насыг хамгаалах талаар мэдлэг олгосоноос гадна суралцагчдын эх оронч сэтгэлгээг хөгжүүлэх, монгол хүн болж төрснөөрөө бахархах, улс орныхоо тусгаар тогтнолыг дээдлэх, тусгаар тогтнолын үнэ цэнийг ойлгуулснаараа онцлог байлаа.