Онцгой байдлын ерөнхий газрын 2025 оны сургалт бэлтгэлийн төлөвлөгөөний хэрэгжилтийг хангах хүрээнд “Эрэн хайх, аврах ажиллагааны ахлах удирдагч нарын сургалт, дадлага”-ыг 2025 оны 02 дугаар сарын 19-21-ний өдрүүдэд Үндэсний аврах бригадад зохион байгууллаа. 

Онцгой байдлын ерөнхий газрын дэд дарга, хурандаа Ц.Уранчимэг сургалтыг нээж хэлсэн үгэндээ “Эрэн хайх, аврах анги салбарын захирагчийн үүрэг, хариуцлага бол гамшиг ослын үед хүний амь нас, эрүүл мэнд, эд хөрөнгө хамгаалахад хамгийн чухал байр суурийг эзэлдэг. Тус албан тушаалтан нь Гамшгаас хамгаалах тухай хууль, Эрэн хайх аврах ажиллагаа зохион байгуулах журам, мөрдөгдөж буй хууль тогтоомжийн хэрэгжилтийг хангуулах, мөн алба хаагчдын хөдөлмөрийн аюулгүй байдал, эрүүл ахуйг хангах үүрэгтэй. Таны гаргаж буй шийдвэр хэр оновчтой байна, тэр хэрээр хүний амь нас эрсдэх эрсдэлийг багасаж, иргэн, хуулийн этгээдийн эд хөрөнгө хохирох магадлал бууруулах чухал ач холбогдолтой юм. Өөрөөр хэлбэл Эрэн хайх аврах ажиллагаа зохион байгуулалт сайтай, амжилттай байх нь гамшиг ослын хохирлыг хамгийн бага хэмжээнд хүргэхэд чухал нөлөө үзүүлдэг гэдгийг хэзээ ч мартаж болохгүй” хэмээн онцолсон юм.

Энэхүү сургалт, дадлагаар эрэн хайх, аврах ажиллагааны опертив-тактикийн түвшинд төв, орон нутгийн Онцгой байдлын байгууллагын эрэн хайх, аврах нэгжийн хэмжээнд удирдлага, зохион байгуулалт, албан тушаалтны чиг үүрэг, ажиллагааны үе шат, дараалал мөн хөдөлмөрийн аюулгүй байдал, сэтгэл зүйгээ тогтворжуулах дадлага, ур чадварыг төв, орон нутгийн Онцгой байдлын байгууллагын Эрэн хайх, аврах анги, салбарын захирагч нарт олгов. 

Тодруулбал “Эрэн хайх, аврах нэгжийн өнөөгийн байдал, цаашдын чиг хандлага”, “Олон улсын эрэн хайх, аврах ажиллагаа”, “Аврах ажиллагааны үеийн сэтгэл зүй, сэтгэл зүйгээ тогтворжуулах”, “Хөдөлмөрийн аюулгүй байдал, эрүүл ахуйн бодлого, зохион байгуулалт”, “Цацраг, химийн хорт болон аюултай бодисын ослоос сэргийлэх” зэрэг мэргэжлийн ур чадварын хичээл сургалт болон цэргийн дүрэм, журмын мэдлэг бататгах, хувь хүний ур чадвар, бусдын зан чанарыг танин мэдэх арга зүйд суралцах чиглэлээр сэдэвчилсэн, танхимын сургалт болон дадлага хэлбэрээр зохион байгуулагдлаа.

Гурван өдрийн турш үргэлжилсэн тус сургалтад төв, орон нутгийн Онцгой байдлын байгууллагын Эрэн хайх, аврах анги, салбарын захирагч нийт 24 алба хаагч хамрагдаж, оролцогчдод гэрчилгээ гардуулсан юм.