Цаг агаар:

Өнгөрсөн хоногт: Нийт нутгаар цаг агаар тогтуун байлаа. 

Өнөөдөр: Баруун болон төвийн аймгуудын нутгаар үүлэрхэг, Орхон-Сэлэнгийн сав газраар ялимгүй цас орно. Бусад нутгаар багавтар үүлтэй, цас орохгүй. Салхи ихэнх нутгаар баруун хойноос секундэд 5-10 метр, төвийн аймгуудын нутгаар зарим үед секундэд 12-14 метр хүрч ширүүснэ. Увс нуур болон Дархадын хотгор, Хөвсгөл, Хэнтийн уулархаг нутаг, Завхан голын эх, Тэс, Байдраг голын хөндийгөөр -22…-27 градус, Алтай, Хангайн уулархаг нутаг, Хүрэнбэлчир орчим, Идэр, Эг, Үүр, Орхон, Сэлэнгэ, Хараа, Ерөө, Тэрэлж, Хэрлэн, Халх голын хөндий, Дорнод-Дарьгангын тал нутгаар -17…-22 градус, Хангайн нурууны өвөр бэл болон говийн бүс нутгийн баруун өмнөд хэсгээр -4…-9 градус, бусад нутгаар -12...-17 градус хүйтэн байна.

Улаанбаатар хотод: Үүлэрхэг, цас орохгүй, салхи баруун хойноос секундэд 5-10 метр. -15…-17 градус хүйтэн байна.

Төлөв байдал:  29-нд төвийн аймгуудын нутгийн зарим газар, говийн аймгуудын нутгийн зүүн хойд хэсэг, 30-нд Алтай, Хангай, Хөвсгөл, Хэнтийн уулархаг нутгаар, 31-нд Хангай, Хөвсгөлийн уулархаг нутаг, Орхон, Сэлэнгийн сав газраар, 02 дугаар сарын 01-нд нутгийн хойд хэсгээр, 02-нд төв, говь, зүүн аймгуудын нутгийн зарим газраар, 03-нд Халх голын сав газраар цас орно. Салхи ихэнх хугацаанд ихэнх нутгаар секундэд 4-9 метр, 27, 28-нд говь, тал, хээрийн нутгаар секундэд 12-14 метр хүрч ширүүснэ. Увс нуурын болон Дархадын хотгор, Завхан голын эх, Идэр, Тэс, Байдраг голын хөндийгөөр шөнөдөө -39...-44 градус, өдөртөө -28...-33 градус, Монгол-Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Хараа, Ерөө, Туул, Тэрэлж, Хэрлэн, Онон, Улз голын хөндийгөөр шөнөдөө -30...-35 градус, өдөртөө -20...-25 градус, говийн бүс нутгийн өмнөд хэсгээр шөнөдөө -14...-19 градус, өдөртөө -5...-10 градус, бусад нутгаар шөнөдөө -23...-28 градус, өдөртөө -11...-16 градус хүйтэн байна.

Гал түймэр: 

Нийслэлийн Сонгинохайрхан дүүргийн 6 дугаар хороонд хогийн сувагт хог шатаж байна гэсэн дуудлагыг 01.27-ны өдрийн 13:01 цагт хүлээн авсан. Тус дүүргийн Онцгой байдлын хэлтсийн 26 дугаар ангийн алба хаагчид ажиллаж унтраасан. Утаажилтын бүсээс 22 том хүн , хүүхэд 2 нийт 25 иргэнийг гаргасан. 

Сүхбаатар дүүргийн 8 дугаар хороонд цайны газарт цахилгаан төхөөрөмж шатаж байна гэсэн дуудлагыг 01.27-ны өдрийн 14:51 цагт хүлээн авсан. Тус дүүргийн Онцгой байдлын хэлтсийн 10 дугаар ангийн алба хаагчдыг очиход иргэн Г-гийн 2х4 метрийн хэмжээтэй гал тогооны өрөөнд мах шарагч шатаж байсныг ажиллаж унтраасан.

Орхон аймгийн Баян-Өндөр сумын Уурхайчин багт үйлчилгээний төвд бэлэн хувцасны лангуу шатаж байна гэсэн дуудлагыг 01.27-ны өдрийн 16:12 цагт хүлээн авсан. Тус аймгийн Онцгой байдлын газрын 56 дугаар ангийн алба хаагчдыг очиход иргэн Э-гийн бэлэн хувцасны лангуу шатаж байсныг ажиллаж унтраасан. 

Баянзүрх дүүргийн 11 дүгээр хороонд амбаар шатаж байна гэсэн дуудлагыг 01.27-ны өдрийн 16:48 цагт хүлээн авсан. Тус дүүргийн Онцгой байдлын хэлтсийн 63 дугаар ангийн алба хаагчдыг очиход иргэн О-гийн 2х2 метрийн хэмжээтэй амбаар, иргэн Х-гийн 1.2х1.6 метрийн хэмжээтэй амбаар шатаж байсныг ажиллаж унтраасан. 

Дорноговь аймгийн Даланжаргалан сумын Олон-Овоо багийн “25-р зөрлөг” гэдэг газар /сумын төвөөс зүүн хойд зүгт 9 км-т, аймгийн төвөөс зүүн хойд зүгт 154 км-т/ ачааны автомашинд ачсан нүүрс шатаж байна гэсэн дуудлагыг 01.27-ны өдрийн 21:26 цагт хүлээн авсан. Тус аймгийн Онцгой байдлын газрын Айраг сум дахь 23 дугаар ангийн алба хаагчдыг очиход Замын-Үүд сумын чиглэлд нүүрс тээвэрлэж байсан иргэн Б-гийн ND-4250 загварын зүтгүүрийн тэвшний 6 дугуй, мөн 25 тонн нүүрс шатаж байсныг ажиллаж унтраасан.

Хүний үйл ажиллагаатай холбоотой осол: 

Зам, тээврийн осол: Нийслэлийн Чингэлтэй дүүргийн 5 дугаар хороонд Суудлын автомашин авто замын хажуугийн гэрэлтүүлгийн төмөр тулгуур багана мөргөж 2 хүн автомашины бүхээгт хавчуулагдсан тухай дуудлагыг 01.28-ны өдрийн 01:13 цагт хүлээн авсан. Нийслэлийн Аврах ангийн алба хаагчдыг очиход Баянзүрх дүүргийн 19 дүгээр  хорооны харьяат иргэн Б /21 настай, эрэгтэй/, Э /20 настай эрэгтэй/ нар “Кровн” загварын автомашинаар зорчиж явахдаа гэрэлтүүлгийн төмөр тулгуур багана мөргөж автомашиныхаа эд ангид хавчуулагдан гэмтсэн байсныг 45 минут ажиллаж эсэн мэнд гаргаж НТТТ-д шилжүүлэн өгсөн.    

Цас шаварт суусан: Увс аймгийн Баруунтуруун сумын Баян-Айраг багийн "Элсний хаяа" гэдэг газар /аймгийн төвөөс зүүн өмнөд зүгт 130 км-т, сумын төвөөс зүүн хойд зүгт 50 км-т/ суудлын автомашин цасанд суусан тухай дуудлагыг 01.27-ны өдрийн 12:40 цагт хүлээн авсан. Тус аймгийн Онцгой байдлын газрын  Баруунтуруун сум дахь 60 дугаар ангийн алба хаагчдыг очиход иргэн О Увс аймгийн Зүүнговь сумаас Баруунтуруун сумын чиглэлд “Galloper” загварын суудлын автомашинаар зорчиж яваад цасанд суусан байсныг 1 цаг 20 минут ажиллаж татан гаргасан.  

Бусад төрлийн осол /ажиллагаа/: Увс аймгийн Малчин сумын 1 дүгээр багийн "Мөнгөн давалгаа" гэдэг газар /аймгийн төвөөс урд зүгт 140 км, сумын төвөөс урд зүгт 20 км/ Наранбулаг сумаас Улаангом чиглэлд зорчиж байсан 6 зорчигчтой суудлын автомашин Хяргас нуурт, урд 2 дугуй нь мөсөнд цөмөрч орсон тухай дуудлагыг 01.26-ны өдрийн 15:25 цагт хүлээн авсан. Тус аймгийн Онцгой байдлын газрын Аврах салбарын алба хаагчдыг очиход иргэн О-гийн эзэмшлийн “Prius-30” загварын суудлын автомашин нуурын эргээс 300-400 м зайд мөсөнд цөмөрч нуурын усанд бүхэлдээ орсон байсныг 5 метрийн гүнээс татан гаргасан.

ОНЦГОЙ БАЙДЛЫН ЕРӨНХИЙ ГАЗАР