Цаг агаар: 

Өнгөрсөн хоногт: Нийт нутгаар цаг агаар тогтуун байлаа.

Өнөөдөр: Нийт нутгаар багавтар үүлтэй, цас орохгүй. Салхи нутгийн төв хэсгээр баруун өмнөөс, бусад нутгаар баруунаас секундэд 5-10 метр. Агаарын температур өдөртөө Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр -24…-29 градус, Их нууруудын хотгор, Монгол-Алтай, Хөвсгөлийн уулархаг нутаг, Хүрэнбэлчир орчмоор -18…-23 градус, Хангай, Хэнтийн уулархаг нутаг, Эг, Үүр, Хараа, Ерөө, Халх голын хөндийгөөр -11…-16 градус, Хангайн нурууны өвөр бэл, цас багатай газар болон говийн бүс нутгийн өмнөд хэсгээр +2...-3 градус, бусад нутгаар -4...-9 градус хүйтэн байна.

Улаанбаатар хотод: Багавтар үүлтэй. Цас орохгүй. Салхи баруунаас секундэд 3-8 метр. Шөнөдөө Яармаг-Сонгины орчмоор -25...-27 градус, бусад хэсгээр -20...-22 градус, өдөртөө -6…-8 градус хүйтэн байна.

Төлөв байдал: 18-нд Монгол-Алтайн уулархаг нутгаар, 19-нд баруун болон төвийн аймгуудын нутгийн хойд хэсгээр, 20-нд төв болон зүүн аймгуудын нутгийн зарим газраар цас орно. Салхи 18-нд Монгол-Алтайн уулсаар, 19-нд нутгийн зарим газраар, 20-нд говь, тал, хээрийн нутгаар секундэд 13-15 метр хүрч ширүүснэ. 17-оос 21-ийг хүртэл Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр шөнөдөө -34...-39 градус, өдөртөө -21...-26 градус, Их нууруудын хотгор, Монгол-Алтай, Хөвсгөлийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн, Халх голын хөндийгөөр шөнөдөө -24...-29 градус, өдөртөө -11...-16 градус, говийн бүс нутгийн өмнөд хэсэг болон цас багатай газраар шөнөдөө -9...-14 градус хүйтэн, өдөртөө +2…-3 градус, бусад нутгаар шөнөдөө -15…-20 градус, өдөртөө -4...-9 градус хүйтэн байна. 

Гал түймэр: 

Нийслэлийн Хан-Уул дүүргийн 16 дугаар хороонд байшин шатаж байна гэсэн дуудлагыг 01.15-ны өдрийн 08:04 цагт хүлээн авсан. Тус дүүргийн Онцгой байдлын хэлтсийн 30 дугаар ангийн алба хаагчдыг очиход иргэн Д-гийн 8х6 метрийн хэмжээтэй байшингийн 2х3 метрийн хэмжээтэй амбаарын дээврийн хэсэг шатаж байсныг ажиллаж унтраасан.

Орхон аймгийн Баян-Өндөр сумын Рашаант багт байшингийн дээвэр шатаж байна гэсэн дуудлагыг 01.15-ны өдрийн 08:51 цагт хүлээн авсан. Тус аймгийн Онцгой байдлын газрын 81 дүгээр ангийн алба хаагчдыг очиход иргэн Ц-гийн 5х10 метрийн хэмжээтэй байшингийн дээврийн хэсэг шатаж байсныг ажиллаж унтраасан.

Баянзүрх дүүргийн 14 дүгээр хороонд хогийн цэгт хог шатаж байна гэсэн дуудлагыг 01.15-ны өдрийн 12:39 цагт хүлээн авсан. Тус дүүргийн Онцгой байдлын хэлтсийн 63 дугаар ангийн алба хаагчдыг очиход 2х4 метрийн хэмжээтэй хогийн цэгт хог шатаж байсныг ажиллаж унтраасан.

Хан-Уул дүүргийн 22 дугаар хороонд орцонд утаа гараад байна гэсэн дуудлагыг 01.15-ны өдрийн 12:57 цагт хүлээн авсан. Тус дүүргийн Онцгой байдлын хэлтсийн 14 дүгээр анги, Чингэлтэй дүүргийн Онцгой байдлын хэлтсийн 10 дугаар ангийн алба хаагчдыг очиход иргэн Н-ийн 3 өрөө байрны жижиг өрөө, угаалгын өрөө шатаж байсныг ажиллаж унтраасан. Утаажилтын бүсээс 29 иргэн /17 том хүн, 12 хүүхэд/-ийг аюулгүй бүсэд гаргасан.

Увс аймгийн Улаангом сумын 7 дугаар багт байшингийн дээвэр шатаж байна гэсэн дуудлагыг 01.15-ны өдрийн 14:01 цагт хүлээн авсан. Тус аймгийн Онцгой байдлын газрын 41 дүгээр ангийн алба хаагчдыг очиход иргэн А-гийн 8х9 метрийн хэмжээтэй байшингийн дээврийн хэсэг шатаж байсныг ажиллаж унтраасан.

Хан-Уул дүүргийн 23 дугаар хороонд баригдаж байгаа барилга дотроос утаа гараад байна гэсэн дуудлагыг 01.15-ны өдрийн 14:02 цагт хүлээн авсан. Тус дүүргийн Онцгой байдлын хэлтсийн 30 дугаар ангийн алба хаагчдыг очиход 21х17 метрийн хэмжээтэй 2 давхар объектын 1 дүгээр давхарт хураалттай барилгын материал шатаж байсныг ажиллаж унтраасан.

Дархан-Уул аймгийн Дархан сумын 3 дугаар багт гарааш шатаж байна гэсэн дуудлагыг 01.15-ны өдрийн 18:21 цагт хүлээн авсан. Тус аймгийн Онцгой байдлын газрын 54 дүгээр ангийн алба хаагчдыг очиход иргэн М-ийн “Kia Bongo-3” загварын бага оврын ачааны автомашины хөдөлгүүр хэсэг, иргэн М-ийн “Hyundai Sonata” загварын суудлын автомашин, 8x8 метрийн хэмжээтэй гарааш тус тус шатаж байсныг ажиллаж унтраасан.

Баянгол дүүргийн 20 дугаар хороонд харуулын байр шатаж байна гэсэн дуудлагыг 01.15-ны өдрийн 19:44  цагт хүлээн авсан. Тус дүүргийн Онцгой байдлын хэлтсийн 18 дугаар ангийн алба хаагчдыг очиход 2х2 метрийн хэмжээтэй харуулын байр шатаж байсныг  ажиллаж унтраасан.

Хүний үйл ажиллагаатай холбоотой осол:

Цас шаварт суусан: Төв аймгийн Мөнгөнморьт сумын Жаргалант багийн “Зорголын гол” гэдэг газар /аймгийн төвөөс зүүн хойд зүгт 244 км, сумын төвөөс зүүн урд зүгт 30 км/ автомашин цасанд суусан тухай дуудлагыг 01.16-ны өдрийн 05:00 цагт хүлээн авсан. Тус аймгийн Онцгой байдлын газрын Мөнгөнморьт сум дахь 75 дугаар ангийн алба хаагчдыг очиход Мөнгөнморьт сумаас Улаанбаатар хотын чиглэлд зорчиж явсан иргэн Б-гийн “Toyota Prius-30” загварын 6 зорчигчтой суудлын автомашин цасанд суусан байсныг ажиллаж, татан гаргасан.

ОНЦГОЙ БАЙДЛЫН ЕРӨНХИЙ ГАЗАР