Цаг агаар: 

Өнгөрсөн хоногт: Нийт нутгаар тогтуун.

Өнөөдөр: Баруун аймгуудын нутгаар солигдмол үүлтэй. Алтай, Хангайн уулархаг нутгаар цас орно. Бусад нутгаар багавтар үүлтэй, цас орохгүй. Салхи ихэнх нутгаар баруун хойноос секундэд 5-10 метр, Монгол-Алтайн уулархаг нутаг, говь, талын нутгаар секундэд 12-14 метр хүрч ширүүснэ. Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс, Байдраг голын хөндийгөөр -25…-30 градус, Их нууруудын хотгор, Монгол-Алтай, Хангай, Хөвсгөлийн уулархаг нутаг, Эг, Үүр, Хараа, Ерөө голын хөндийгөөр -17…-22 градус, Хангайн нурууны өвөр бэл, говийн бүс нутаг болон цас багатай газар, Дорнодын тал нутгаар -4...-9 градус, бусад нутгаар -10...-15 градус хүйтэн байна.

Улаанбаатар хотод: Багавтар үүлтэй. Цас орохгүй. Салхи баруун хойноос секундэд 3-8 метр. -12…-14 градус хүйтэн байна.

Төлөв байдал: 04-нд Увс нуурын хотгор, Хөвсгөлийн уулархаг нутгаар, 05-нд Хэнтийн уулархаг нутгаар, 6-нд Хэнтийн уулархаг нутаг, Дорнод-Монголын тал нутгаар, 7-нд Халх голын сав газраар цас орно. Салхи 04-нд Алтайн салбар уулсаар, 05, 06-нд говь, тал, хээрийн нутгаар, 7-нд говь, талын нутгаар секундэд 13-15 метр хүрч ширүүснэ. 04-08-нд Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр шөнөдөө -38...-43 градус, өдөртөө -27...-32 градус, Монгол-Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн голын хөндийгөөр шөнөдөө -29...-34 градус, өдөртөө -18...-23 градус, говийн бүс нутгийн өмнөд хэсэг болон цас багатай газраар шөнөдөө -13...-18 градус, өдөртөө -3…-8 градус, бусад нутгаар шөнөдөө -21…-26 градус, өдөртөө -11...-16 градус хүйтэн байна.

Гал түймэр:

Говьсүмбэр аймаг, Сүмбэр сум Сансар баг гэр шатаж байна гэсэн дуудлагыг 08:45 цагт хүлээн авсан.Тус аймгийн Онцгой байдлын газрын 37 дугаар ангийн алба хаагчдыг очиход, 4 ханатай гэр эд зүйлийн хамт шатаж байсныг ажиллан унтрааж, иргэнд хүлээлгэн өгсөн.

Дорноговь аймаг, Сайншанд сум байшингийн гал тогооны хэсэгт гал гарч байна гэсэн дуудлагыг 11:25 цагт хүлээн авсан.Тус аймгийн Онцгой байдлын газрын 33 дугаар ангийн алба хаагчдыг очиход, 5х4 хэмжээтэй байшингийн гал тогооны таазны хэсэг шатаж байсныг ажиллан унтраасан.

Дорнод аймаг, Баянтүмэн сум Өлзийт багийн "Сайхан нуур" гэдэг газар /аймгийн төвөөс зүүн урд зүгт 50 км, сумын төвөөс зүүн урд зүгт 65 км/ Малын саравч /өвөлжөө/ дээр хураалттай 200 орчим боодлын өвс шатаж байна гэсэн дуудлагыг 12:02 цагт хүлээн авсан.Тус аймгийн Онцгой байдлын газрын Аврах ангийн алба хаагчид, Баянтүмэн сумын мэргэжлийн ангийнхныг очиход, 15х6 хэмжээтэй малын саравч /өвөлжөө/, 281 ширхэг боодлын өвс шатаж байсныг унтраасан.

Улаанбаатар хот, Баянгол дүүрэг 12 дугаар хороо хогийн сувагт хог шатаж байна гэсэн дуудлагыг 03:28 цагт хүлээн авсан. Чингэлтэй дүүргийн Онцгой байдлын хэлтсийн 10 дугаар ангийн алба хаагчдыг очиход, 2х2 метрийн хэмжээтэй хогийн сувагт хог шатаж байсныг ажиллаж унтраасан. 

Хүний үйл ажиллагаатай холбоотой осол:

Автозамын тээврийн осол: Хэнтий аймаг, Цэнхэрмандал сум Согоот багийн Устын хоолой гэдэг газар 2 автомашин мөргөлдөж хүн хавчуулагдсан байна гэсэн дуудлагыг 17:05 цагт хүлээн авсан. Багануур дүүргийн Онцгой байдлын хэлтсийн 64 дүгээр ангийн алба хаагчдыг очиход "Sonata" загварын автомашин,  "Land Cruiser Prado" загварын автомашинууд мөргөлдөж, "Sonata" загварын автомашины жолооч А /40 настай, эрэгтэй/ нь автомашины төмөр хийцэд хавчуулагдсан байсныг эсэн мэнд гарган, Багануур дүүргийн ЯТТ-ийн их эмчид хүлээлгэн өгсөн.

ОНЦГОЙ БАЙДЛЫН ЕРӨНХИЙ ГАЗАР