Цаг агаар: 

Өнгөрсөн хоногт: Дорнод аймагт цас орсон. Бусад нутгаар цаг агаар тогтуун.

Өнөөдөр: Ихэнх нутгаар солигдмол үүлтэй. Хөвсгөлийн уулсаар ялимгүй цас орно. Салхи нутгийн зүүн хэсгээр баруун хойноос, бусад нутгаар баруунаас секундэд 6-11 метр. Дархадын хотгор, Завхан голын эх, Хүрэнбэлчир орчмоор -3…-8 градус, Хангай, Хөвсгөл, Хэнтийн уулархаг нутаг, Тэрэлж, Хэрлэн, Онон, Улз, Халх голын хөндийгөөр +1…-4 градус хүйтэн, Их нууруудын хотгор, говийн бүс нутгийн өмнөд хэсгээр +8…+13 градус, бусад нутгаар +1...+6 градус дулаан байна.

Улаанбаатар хотод: Багавтар үүлтэй. Цас орохгүй. Салхи баруун хойноос секундэд 5-10 метр. +2...+4 градус дулаан байна.

Төлөв байдал: 23-нд Монгол-Алтай, Хөвсгөлийн уулархаг нутгаар, 24-нд Алтай, Хангайн уулархаг нутгаар ялимгүй хур тунадас, 25-нд Хангай, Хэнтийн уулархаг нутгаар, 26-нд зүүн аймгуудын нутгийн зарим газраар цас орно. Салхи ихэнх хугацаанд секундэд баруунаас 6-11 метр, 24-нд Алтайн салбар уулсаар, 25-26-нд говь, талын нутгаар секундэд 13-15 метр хүрч ширүүснэ. Өдөртөө бага зэрэг дулаарч Завхан голын эх, Хүрэнбэлчир орчмоор шөнөдөө -15...-20 градус, өдөртөө 0...-5 градус, Хангайн, Хөвсгөл, Хэнтийн уулархаг нутаг, Идэр, Тэс, Орхон, Хараа, Ерөө, Туул, Тэрэлж, Улз, Халх голын хөндийгөөр -10...-15 градус хүйтэн, өдөртөө 0...+5 градус, говийн бүс нутгийн өмнөд хэсгээр шөнөдөө -2…+3 градус, өдөртөө +12…+17 градус дулаан, бусад нутгаар шөнөдөө -4…-9 градус хүйтэн, өдөртөө +5…+10 градус дулаан байна.

Гал түймэр: 

Нийслэлийн Хан-Уул дүүргийн 11 дүгээр хороо байшин шатаж байна гэсэн дуудлагыг 10.21-ний өдрийн 04:42 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 14 дүгээр ангийн алба хаагчдыг очиход иргэн С-ын 12×12 метрийн хэмжээтэй хоолны газар, гадна тагт /террас/ шатаж байсныг  унтраасан.

Төв аймгийн Сэргэлэн сумын Эрдэнэ-Уул  багт /аймгийн төвөөс баруун хойд зүгт 3 км, сумын төвөөс баруун хойд зүгт 17 км/ байшингийн дээврийн нүдэн гэрэлтэй хэсгээс утаа гарч байна гэсэн дуудлагыг 09:57 цагт хүлээн авсан. Тус аймгийн Онцгой байдлын газрын Гал түймэр унтраах, аврах 24 дүгээр ангийн алба хаагчдыг очиход, 8х8 метрийн хэмжээтэй байшингийн угаалгын өрөөний таазны хэсэгт, шилэн хөвөн, хөөсөнцөр шатаж байсныг  ажиллан унтраасан.

Нийслэлийн Сонгинохайрхан дүүргийн 1 дүгээр хороонд байшин шатаж байна гэсэн  дуудлагыг 01:41 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчдыг очиход, 3 метр хашаа, 5х5 метрийн хэмжээтэй байшин бүрэн шатаж байсныг ажиллан унтраасан. Уг гал түймэрт С /49 настай,эрэгтэй/ өртөж нас барсан байдалтай байсныг Сонгинохайрхан дүүргийн Цагдаагийн мөрдөгчид хүлээлгэн өгсөн.

Хүний үйл ажиллагаатай холбоотой осол:

Ховд аймгийн Булган сумын Алагтолгой багийн "Харгайт" гэдэг газар /аймгийн төвөөс баруун зүгт 550км, сумын төвөөс баруун хойд зүгт 120 км/Булган сумаас “Харгайт” гэдэг газар руу 10.20-ны өдрийн 23:00 цагийн үед явж байсан автомашин 2 зорчигчтой замаасаа төөрч цасанд суусан тухай дуудлагыг 10.21-ний өдрийн 15:40 цагт хүлээн авсан. Тус аймгийн Онцгой байдлын газрын Булган сум дахь Гал түймэр унтраах, аврах 38 дугаар ангийн алба хаагчдыг очиход, “Land Cruiser 100” загварын автомашинд  иргэн В/46 настай, эрэгтэй/, иргэн М /38 настай, эрэгтэй/ нар цасанд суусан байсныг автомашиныг аюулгүй газарт татан гаргасан. 

ОНЦГОЙ БАЙДЛЫН ЕРӨНХИЙ ГАЗАР