ОБЕГ-ын дарга, хошууч генерал Г.Ариунбуян тэргүүтэй төлөөлөгчид БНСУ-ын Дотоод хэрэг, үндэсний аюулгүй байдлын яамнаас зохион байгуулсан “Олон улсын К-Аюулгүй байдал-2024” үзэсгэлэнд оролцлоо.

Энэ сарын 10-12-ны өдрүүдэд  Бусан хотын Бэкско цогцолборт болсон тус үзэсгэлэнд улс орнуудын нийт 300 гаруй аж ахуй нэгж байгууллага, компани, үйлдвэрлэгч, төрийн болон төрийн бус байгууллагууд оролцсон юм.

Оролцогчид гамшгаас хамгаалах, гал унтраах, аж үйлдвэрлэл, олон нийт, төрийн үйлчилгээ, усан, төмөр, авто замын аюулгүй байдлыг хангах, эрүүл ахуйн зориулалтын сүүлийн үеийн дэвшилтэт техник, тоног төхөөрөмжийг танилцууллаа.

Мөн аюулгүй, үйлдвэрлэлийн олон улсын хуралдаан, худалдааны уулзалтууд, аюулгүй байдлын сургалт, сурталчилгааны үйл ажиллагаа болон “Дэлхийн гамшиг, аюулгүй байдлын бизнес форум”-ыг тус тус зохион байгууллаа.

Хошууч генерал Г.Ариунбуян тус улсын Гёнги мужийн Галын албаны академийн сургалтын төлөвлөлтийн хэлтсийн дарга Ким Хүн тэргүүтэй төлөөлөгчидтэй уулзаж, хамтын ажиллагааны талаар хэлэлцсэн юм.

Мөн тус улсын Цахим харилцаа холбооны судалгааны хүрээлэнгийн дэд захирал Ким Сын Хуантай уулзаж, “Монгол Улсад Мэдээлэл, харилцаа холбооны технологийн чадавхжуулсан ухаалаг онцгой байдлын ажиллагааны удирдлагын төвийг байгуулах” төслийг хэрэгжүүлэх талаар санал солилцож,  Шуурхай удирдлагын төвийн үйл ажиллагаатай танилцлаа.

Түүнчлэн Газар хөдлөлтийн гамшгаас урьдчилан сэргийлэх судалгааны төвийн үйл ажиллагаатай танилцах айлчлал хийлээ. Тус төв нь 2004 онд байгуулагдсан бөгөөд газар хөдлөлтийн чиглэлийн судалгаа, туршилт хийх, шинэ техник технологийг хөгжүүлэх, залуу судлаачдыг дэмжих чиглэлээр үйл ажиллагаа явуулдаг байгууллага юм.