Өнгөрсөн хоногт: Дархан, Дорнод, Орхон, Өвөрхангай, Сүхбаатар, Төв, Хөвсгөл, Хэнтий аймгуудын нутгаар бороо орсон. Бусад нутгаар цаг агаар тогтуун байлаа.

Өнөөдөр: Хур тунадас нутгийн зүүн хэсгээр үүлэрхэг, бусад нутгаар солигдмол үүлтэй. Шөнөдөө төвийн аймгуудын нутгийн зарим газар, зүүн аймгуудын ихэнх нутгаар, өдөртөө төвийн аймгуудын нутгийн зүүн, зүүн аймгуудын нутгийн өмнөд хэсгээр бороо, дуу цахилгаантай аадар бороо орно. Салхи нутгийн зүүн хэсгээр зүүн хойноос, бусад нутгаар баруун хойноос секундэд 5-10 метр, нутгийн зарим газраар борооны өмнө түр зуур ширүүснэ. Агаарын температур өдөртөө Хөвсгөл, Хэнтийн уулархаг нутаг, Хараа, Ерөө, Туул, Тэрэлж, Хэрлэн, Онон, Улз, Халх голын хөндий, Дарьгангын тал нутгаар +13...+18 градус, Их нууруудын хотгор, говийн бүс нутгийн баруун өмнөд хэсгээр +25...+30 градус, бусад нутгаар +19...+24 градус дулаан байна.

Улаанбаатар хотод: Үүлэрхэг. Бороо орохгүй. Салхи баруун хойноос секундэд 5-10 метр. Шөнөдөө +5...+7 градус, өдөртөө +15...+17 градус дулаан байна.

Төлөв байдал: 31-нд Хангай, Хэнтийн уулархаг нутгаар, 06-р сарын 01, 02-нд Монгол-Алтай, Хангай, Хөвсгөл, Хэнтийн уулархаг нутгаар, 03-нд Хөвсгөл, Хэнтийн уулархаг нутгаар бороо, дуу цахилгаантай аадар бороо орно. Салхи ихэнх хугацаанд секундэд 5-10 метр, нутгийн зарим газраар борооны өмнө түр зуур ширүүснэ. Монгол-Алтай, Хангай, Хөвсгөл, Хэнтийн уулархаг нутаг, Эг, Үүр, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 0...+5 градус, өдөртөө +17...+22 градус, говийн бүс нутгийн өмнөд хэсгээр шөнөдөө +12...+17 градус, өдөртөө +25...+30 градус, бусад нутгаар шөнөдөө +6...+11 градус, өдөртөө +20...+25 градус дулаан байна.

Гал түймэр: 

Улаанбаатар хот, Баянзүрх дүүрэг 42 дугаар хороо баригдаж байгаа барилгын гадна фасад шатаж байна гэсэн дуудлагыг 05.29-ний өдрийн 12:34 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчдыг очиход14 давхар барилгын 7 дугаар давхраас дээшээ гадна фасад шатаж байсныг ажиллаж унтраасан.

Улаанбаатар хот, Чингэлтэй дүүрэг 14 дүгээр хорооны Хайлаастын 21 дүгээр гудамжинд байшин шатаж байна гэсэн дуудлагыг 05.29-ний өдрийн 12:55 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчдыг очиход иргэн Б-ын 7х6 метрийн хэмжээтэй байшингийн дотор хэсэг, эд хогшлын хамт бүрэн шатаж байсныг ажиллаж унтраасан.

Хэнтий аймаг, Бор-Өндөр Уурхайчин багийн “Геологи” хорооллын 7 дугаар гудамжинд байшин шатаж байна гэсэн дуудлагыг 05.30-ны өдрийн 01:19 цагт хүлээн авсан. Тус аймгийн Онцгой байдлын газрын Бор-Өндөр сум дахь Гал түймэр унтраах, аврах 49 дүгээр ангийн алба хаагчдыг очиход иргэн Э-ийн 10х9 метрийн хэмжээтэй байшингийн дээврийн хэсэг шатаж байсныг ажиллаж унтраасан.

Өмнөговь аймаг, Ханбогд сум Баян багийн “Худагт” хорооллын 6 дугаар гудамжинд гэр шатаж байна гэсэн дуудлагыг 05.30-ны өдрийн 06:21 цагт хүлээн авсан. Тус аймгийн Онцгой байдлын газрын Ханбогд сум дахь Гал түймэр унтраах, аврах 66 дугаар ангийн алба хаагчдыг очиход иргэн Д-ийн 5 ханатай гэр бүрэн шатаж байсныг ажиллаж унтраасан.

Хүний үйл ажиллагаатай холбоотой осол:

Хэнтий аймаг, Дадал сум 4 дүгээр багийн “Зүрх-Уул” гэдэг газар /аймгийн төвөөс зүүн хойд зүгт 290 км, сумын төвөөс зүүн зүгт 40 км/-т 2 суудлын автомашин шаварт суусан, гарах боломжгүй байна гэсэн дуудлагыг 05.29-ний өдрийн 18:35 цагт хүлээн авсан. Тус аймгийн Онцгой байдлын газрын Баян-Адарга сум дахь Эрэн хайх, аврах салбарын алба хаагчдыг очиход иргэн Ш-ийн “Lexus RX450h” загварын суудлын автомашин /4 том хүн/, иргэн Б-ын  “Mitsubishi Delica” загварын суудлын автомашин /3 том хүн, 1 хүүхэд/ шаварт суусан байсныг ажиллаж татан гаргасан.

ОНЦГОЙ БАЙДЛЫН ЕРӨНХИЙ ГАЗАР