Өнгөрсөн хоногт: Говьсүмбэр, Дархан-Уул, Дорнод, Дундговь, Орхон, Сэлэнгэ, Төв, Хэнтий аймгуудын нутгаар бага зэрэг бороо орсон.  Бусад нутгаар цаг агаар тогтуун байлаа.

  Өнөөдөр: Нутгийн зүүн хагаст үүлэрхэг, бусад нутгаар солигдмол үүлтэй. Төвийн аймгуудын нутгийн зарим газар, зүүн аймгуудын ихэнх нутгаар дуу цахилгаантай аадар бороо орно. Салхи нутгийн зүүн хэсгээр баруун өмнөөс хойш эргэж, бусад нутгаар баруун хойноос 6-11 м/с, нутгийн зарим газраар борооны өмнө түр зуур ширүүсэж, шороон шуурга шуурна. Монгол-Алтай, Хангай, Хөвсгөл, Хэнтийн уулархаг нутаг, Орхон, Сэлэнгэ, Хараа, Ерөө, Туул, Тэрэлж, Халх голын хөндий, Дарьгангын тал нутгаар +13...+18 градус, Их нууруудын хотгор, говийн бүс нутгийн баруун болон өмнөд хэсгээр +23...+28 градус, бусад нутгаар +18...+23 градус дулаан байна.

  Улаанбаатар хотод: Үүлэрхэг, бага зэргийн бороо орно, салхи баруун хойноос 6-11 м/с, борооны өмнө түр зуур ширүүснэ, өдөртөө +14...+16 градус дулаан байна.

Төлөв байдал: 30-нд төв болон зүүн аймгуудын нутгийн зарим газраар, 31, 06 дугаар сарын 01-нд Монгол-Алтай, Хангай, Хөвсгөл, Хэнтийн уулархаг нутгаар, 02-нд баруун аймгуудын нутгийн зарим газар, төвийн аймгуудын нутгийн баруун хэсгээр дуу цахилгаантай аадар бороо орно. Салхи ихэнх хугацаанд 6-11 м/с, нутгийн зарим газраар борооны өмнө түр зуур ширүүснэ. Монгол-Алтай, Хангай, Хөвсгөл, Хэнтийн уулархаг нутаг, Эг, Үүр, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 0...+5 градус, өдөртөө +15...+20 градус, говийн бүс нутгийн өмнөд хэсгээр шөнөдөө +12...+17 градус, өдөртөө +25...+30 градус, бусад нутгаар шөнөдөө +6...+11 градус, өдөртөө +20...+25 градус дулаан байна.

Гал түймэр: 

Улаанбаатар хот, Сонгинохайрхан дүүрэг 6 дугаар хороо байшин шатаж байна гэсэн дуудлагыг 05.28-ны өдрийн 12:11 цагт хүлээн авсан.  Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчдыг очиход иргэн Ц-ын 4х6 метрийн хэмжээтэй байшин шатаж байсныг ажиллаж унтраасан.  

Улаанбаатар хот, Чингэлтэй дүүрэг 14 дүгээр хороо авто замын зорчих хэсэгт автобус шатаж байна гэсэн дуудлагыг 05.28-ны өдрийн 20:32 цагт хүлээн авсан.  Тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчдыг очиход автобусны хөдөлгүүрийн хэсэг шатаж байсныг ажиллаж унтраасан.  

Хүний үйл ажиллагаатай холбоотой осол:

- Нуурын усанд осолдсон: Хөвсгөл аймаг, Арбулаг сум Тарган нуур багийн “Тарган нуур” гэдэг газар /аймгийн төвөөс хойд зүгт 71 км, сумын төвд/  тус сумын харьяат иргэн Э суудлын автомашинаар зорчиж яваад “Тарган нуур”-ын усанд живсэн тухай дуудлагыг 05.28-ны өдрийн 15:58 цагт хүлээн авсан.  Тус аймгийн Онцгой байдлын газрын Эрэн хайх, аврах салбарын алба хаагчдыг очиход иргэн Э /44 настай, эмэгтэй/  “Ипсум” загварын суудлын автомашинтай 2 метрийн гүнтэй нуурын усанд живж нас барсан байсныг уснаас гарган Цагдаагийн байгууллагад шилжүүлэн өгсөн.  

ОНЦГОЙ БАЙДЛЫН ЕРӨНХИЙ ГАЗАР