Цэргийн цол гэдэг албан тушаалын ангилал, цэргийн боловсрол, алба хаасан хугацааг илэрхийлдэг. Онцгой байдлын албанд ч офицер буюу ахлагч гэсэн хоёр бүрэлдэхүүн ажилладаг бөгөөд ахлагч нар нийт алба хаагчдын 70-аас илүү хувийг эзэлж байна. Түүнчлэн Монгол Улсын Ерөнхийлөгч, Зэвсэгт хүчний ерөнхий командлагч 2024 оныг “Ахлагчийн жил” болгон зарлаад буй. Тиймээс байгууллагынхаа цөм бүтэц болсон ахлагч нараа дэмжиж хөгжүүлэх, соён гэгээрүүлэх, тогтвор суурьшилтай, аз жаргалтай ажиллаж амьдрах боломжийг бүрдүүлэх зорилгоор энэ жилийг “Ахлагчийн алба-мэргэшсэн алба” уриан дор өнгөрүүлэх юм.

Энэ хүрээнд Өмнөд, Хойд, Баруун бүсийн төвүүдэд “Ахлагчийн жил”-ийн нээлтийг хийлээ. Нээлтийн үйл ажиллагаанд ОБЕГ-ын Урьдчилан сэргийлэх газрын дарга, хурандаа Ц.Уранчимэг оролцов. Тэрээр “Онцгой байдлын байгууллагын үнэт зүйл нь та бүхэн юм. Алба хаагч бүр эх оронч үзэл, ёс суртахуунтай, чадварлаг байж ард олныхоо аюулгүй байдлыг хангаж чадна. Тиймээс та бүхэн дор бүрнээ хичээж, өөрсдийгөө бүх талаар хөгжүүлэн нийгэмд манлайлал үзүүлж явах үүрэгтэй” гэдгийг онцолж ажил амьдралд нь сайн сайхныг хүслээ.

Онцгой байдлын байгууллага орон нутгийг газар зүйн байршил, бүс нутгийнх нь онцлог зэргээс шалтгаалан бүсийн системээр ажиллуулдаг. Тухайлбал, Архангай, Хөвсгөл, Булган, Орхон, Дархан-Уул, Сэлэнгэ, Төв аймаг хойд бүсэд хамаардаг бөгөөд бүсийн төв нь Орхон. Өмнөд бүсийн төв Өмнөговьд, баруун бүсийн алба хаагчид Ховд аймгийн Жаргалант суманд хуран цуглаж нээлтийн үйл ажиллагаандаа оролцсон юм. Нийтдээ 850 орчим ахлагч биечлэн ирсэн бол бусад нь цахим хэлбэрээр оролцов.

Энэ үеэр аймгийн Онцгой байдлын газрууд үйл ажиллагаандаа ISO стандартыг хэрхэн мөрддөг. Дотоод нөөц боломжоо ашиглан залуу алба хаагчдаа гэр, хашаа байшин, орон сууцжуулах хөтөлбөрт хамруулах зэрэг ар гэрт нь чиглэж хийсэн ажлаа танилцуулав. Тухайлбал, алба хаагчдынхаа гэр бүлүүдийн дунд урлагийн наадам, явган аялал, байгууллагын дэргэдэх цэцэрлэг байгуулах, хүүхдүүдэд зориулсан хадгаламжтай болгох зэргээр ар гэрийг нь холбож, гэр бүлийн найзууд болох нөхцөлийг бүрдүүлэх зэргээр алба хаагчын талархалыг хүлээсэн олон ажил хийжээ.

Ийнхүү бүс бүсийн алба хаагчид нэг өдрийг хамт өнгөрүүлж, өөр хоорондоо танилцан, туршлага солилцож, авьяаслаг алба хаагчдынхаа дуу эгшгээс ч хуваалцаж амжив. Мөн Үндэсний аюулгүй байдлын зөвлөлийн стратеги судалгааны хүрээлэнгийн албаны дарга, доктор Ц.Минжин "Монгол бахархал ба Монгол дархлаа", Хүний нөөцийн судалгааны үндэсний хүрээлэнгийн багш Н.Цогжавхлан "Аз жаргалтай ажлын байр бүтээхүй", ОБЕГ-ын Урьдчилан сэргийлэх газрын дарга, хурандаа Ц.Уранчимэг “Олон нийттэй харилцах ёс зүй" сэдвээр сургалт явуулсан юм.