Цаг агаар: 

Өнгөрсөн хоногт: Шөнөдөө Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр -22...-27 градус, Хангай, Хөвсгөлийн уулархаг нутаг, Эг, Үүр, Орхон, Ерөө, Туул, Тэрэлж, Хэрлэн, Халх голын хөндийгөөр -14...-19 градус, говийн бүс нутгийн өмнөд хэсгээр -3...-8 градус, Их нууруудын хотгор болон Хангайн нурууны өвөр бэл, говийн бүс нутгийн хойд хэсгээр -6...-11 градус, бусад нутгаар -10...-15 градус байсан. Нийт нутгаар цаг агаар тогтуун байсан.

Өнөөдөр: Нутгийн баруун хэсгээр үүлшинэ. Бусад нутгаар багавтар үүлтэй. Шөнөдөө Монгол-Алтайн уулсаар, өдөртөө Алтай, Хөвсгөлийн уулархаг нутгаар цас орно. Бусад нутгаар цас орохгүй. Нутгийн зүүн хэсгээр баруун хойноос, бусад нутгаар баруунаас секундэд 5-10 метр, Алтайн салбар уулсаар секундэд 12-14 метр хүрч ширүүснэ. Өдөртөө Увс нуур болон Дархадын хотгор, Тэс голын хөндийгөөр -5...-10 градус хүйтэн, Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Байдраг, Идэр, Хэрлэн, Халх голын хөндийгөөр -2...+3 градус, Их нууруудын хотгор, Хангайн нурууны өвөр бэл, Орхон-Сэлэнгийн сав газраар +7...+12 градус, говийн бүс нутгийн өмнөд хэсгээр +11...+16 градус, бусад нутгаар +3...+8 градус дулаан байна.

Улаанбаатар хотод: Багавтар үүлтэй. Цас орохгүй. Салхи баруунаас секундэд 4-9 метр. Шөнөдөө Яармаг-Сонгины орчмоор -17...-19 градус, бусад хэсгээр -10...-12 градус хүйтэн, өдөртөө +4...+6 градус дулаан байна.

Гал түймэр: Объектын түймэр:

- Улаанбаатар хот, Чингэлтэй дүүрэг. 6 дугаар хороо, 41 дүгээр байрны хогийн суваг шатаж байна гэсэн дуудлагыг 03.19-ний өдрийн 16:57 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 1 км замыг туулан 17:02 цагт очиход тус байрны 2х2 метрийн хэмжээтэй хогийн суваг дотор хог шатаж байсныг 5 минут ажиллаж унтраасан.

- Дархан-Уул аймаг, Дархан сум. 12 дугаар багийн Хуучин” хорооллын 27 дугаар байрны гадна хогийн цэгт хог шатаж байна гэсэн дуудлагыг 03.20-ны өдрийн 01:04 цагт хүлээн авсан. Тус аймгийн Онцгой байдлын газрын Гал түймэр унтраах, аврах 22 дугаар ангийн алба хаагчид 1 км замыг туулан 01:07 цагт очиж хогийн цэгт хог шатаж байсныг 3 минут ажиллаж унтраасан.

- Улаанбаатар хот, Баянгол дүүрэг. 2 дугаар хороо, 7/3 дугаар байрны орцонд утаа үнэртээд байна гэсэн дуудлагыг 03.20-ны өдрийн 03:15 цагт хүлээн авсан. Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 2 км замыг туулан 03:26 цагт очиход тус байрны 1 давхарт  2х2 метрийн хэмжээтэй  цахилгаан хуваарилах самбар шатаж байсныг 20 минут ажиллаж унтраасан. Утаажилтын бүсээс 27 том хүн, 30 бага насны хүүхэд гаргаж, 8 иргэнийг Нийслэлийн түргэн тусламжийн төв 103-т хүлээлгэн өгсөн.

- Ховд аймаг, Эрдэнэбүрэн сум. Шурга багийн “Эх цагаан булан” гэдэг газар /аймгийн төвөөс зүүн хойд зүгт 70 км, сумын төвөөс зүүн урд зүгт 17 км/-т 03.18-ны өдрийн 22:00 цагт хаваржаа шатаж байна гэсэн мэдээллийг хүлээн авсан. Тус сумын малчин М-рын хаваржаа 03.18-ны өдрийн 22:00 цагийн орчим шатаж эхэлсэн. Сумын мэргэжлийн ангийн алба хаагчид гал түймрийг унтраахаар ажиллаж байна гэсэн мэдээллийг сумын Засаг даргын Тамгын газрын дарга Н.Цэвэлмаа мөн өдрийн 22:56 цагт аймгийн Онцгой байдлын газарт ирүүлсэн.

Хүний үйл ажиллагаатай холбоотой осол. Төөрсөн, сураггүй болсон: 

- Дорнод аймаг, Матад сум. Буян-Өндөр багийн “Тархитын хошуу” гэдэг газар /аймгийн төвөөс зүүн урд зүгт 200 км, сумын төвөөс зүүн хойд зүгт 90 км/-т 03.16-ны өдрийн 19:00 цагт иргэн Ц айлын гэрээс гарч яваад сураггүй болсон тухай дуудлагыг 03.18-ны өдрийн 10:00 цагт хүлээн авсан. Тус аймгийн Онцгой байдлын газрын алба хаагчид Матад сум дахь Цагдаагийн тасгийн алба хаагчидтай хамтран Сүхбаатар аймгийн Баруун-Урт сумын харъяат иргэн Ц/48 настай, эрэгтэй/-ыг эрэн хайх ажиллагааг 03.19-ний өдрийн 06:45 цагаас эхлэн  “Петрочайна Дачин Тамсаг” ХХК-ийн газрын тосны 19 дугээр талбайд 24 км-ын тойрогт 2 удаагийн зохион байгуулан ажиллаж мөн өдрийн 18:40 цагт зогсоосон. 03.20-ны өдрийн 07:00 цагт дахин эхлүүлсэн.

- Говьсүмбэр аймаг, Сүмбэр сум. Малх багийн “Яргай” гэдэг газар /аймгаас зүүн хойд зүгт 70 км/-т 03.19-ний өдрийн 10:00 цагийн орчим иргэн Г нь Говьсүмбэр аймгийн төв орохоор гэрээсээ явганаар гараад сураггүй болсон тухай дуудлагыг 03.19-ний өдрийн 13:25 цагт хүлээн авсан. Тус аймгийн Онцгой байдлын газрын Эрэн хайх, аврах бүлгийн алба хаагчид  иргэн Ганбаатар /62 настай, эрэгтэй/-ыг эрэн хайх ажиллагааг 03.19-ний өдрийн 13:52 цагаас эхлэн зохион байгуулан ажиллаж мөн өдрийн 18:44 цагт Малх багийн “Баянбулаг” гэдэг газар /аймгийн төвөөс зүүн хойд зүгт 56 км, гэрээс нь баруун хойд зүгт 16 км/-аас эсэн мэнд олсон.

Ус, цаг уурын гаралтай аюулт үзэгдэл: 

- Сүхбаатар аймаг, Уулбаян сум. Сахиулын шанд багийн “Улаан худаг” гэдэг газар /аймгийн төвөөс баруун урд зүгт 30 км, сумын төвөөс хойд зүгт 35 км/-т айлын гэр шар усны үерт автах гэж байна гэсэн дуудлагыг 03.19-ний өдрийн 17:25 цагт хүлээн авсан. Сүхбаатар аймгийн Онцгой байдлын газрын Гал түймэр унтраах, аврах 15 дугаар ангийн алба хаагчид 30 км замыг туулан 19:20 цагт очиж малчин иргэн Б-ын гэр шар усны үерт байсныг 55 минут ажиллаж 2 км зам гарган тусламж үзүүлсэн.

ОНЦГОЙ БАЙДЛЫН ЕРӨНХИЙ ГАЗАР