Цаг агаар: 

Өнгөрсөн хоногт: Архангай аймгийн нутгийн зарим газраар бага зэргийн цас орсон. Бусад нутгаар цаг агаар тогтуун байлаа.

Өнөөдөр: Нутгийн баруун хагаст үүлшинэ, бусад нутгаар багавтар үүлтэй. Шөнөдөө нийт нутгаар цас орохгүй. Өдөртөө Увс нуурын хотгор болон Монгол-Алтай, Хөвсгөлийн уулархаг нутгаар цас орно. Бусад нутгаар цас орохгүй. Салхи ихэнх нутгаар баруун өмнөөс секундэд 5-10 метр, өдөртөө Монгол-Алтайн уулархаг нутгаар секундэд 15-17 метр хүрч ширүүсэж, шороон шуурга шуурна. Өдөртөө Увс нуурын хотгор, Тэс голын хөндийгөөр -7...-12 градус хүйтэн, Хангай, Хөвсгөлийн уулархаг нутаг, Завхан голын эх, Байдраг, Идэр голын хөндийгөөр +2...-3 градус, Хэнтийн уулархаг нутаг Туул, Тэрэлж голын хөндийгөөр +1...+6 градус, Их нууруудын хотгор, Хангайн нурууны өвөр бэл, говийн бүс нутгийн өмнөд хэсгээр +12...+17 градус, бусад нутгаар +6...+11 градус дулаан байна.

Улаанбаатар хотод: Багавтар үүлтэй. Цас орохгүй. Салхи баруун өмнөөс секундэд 3-8 метр. Шөнөдөө Яармаг-Сонгины орчмоор -15...-17 градус, бусад хэсгээр -9...-11 градус хүйтэн, өдөртөө +2...+4 градус дулаан байна. 

Гал түймэр: Объектын түймэр:

- Хөвсгөл аймаг, Төмөрбулаг сум. Жаргалант 5 дугаар баг /аймгийн төвөөс зүүн урд зүгт 75 км, сумын төвөөс хойд зүгт 4 км/-т 03.12-ны өдрийн 13:30 цагийн орчим гэр шатсан тухай мэдээллийг мөн өдрийн 17:45 цагт хүлээн авсан. Тус сумын мэргэжлийн ангийн ажилтнууд 6:40 цагт очиход иргэн М-ын 5 ханатай гэр, эд хогшлын хамт бүрэн шатсан байсан тухай мэдээллийг Засаг даргын Тамгын газрын дарга Г.Нямханд аймгийн Онцгой байдлын газарт мэдээлсэн.

- Дархан-Уул аймаг, Дархан сум. 1 дүгээр багийн Чулуутын 2 дугаар гудамжинд амбаар шатаж байна гэсэн дуудлагыг 03.12-ны өдрийн 13:44 цагт хүлээн авсан. Тус аймгийн Онцгой байдлын газрын Гал түймэр унтраах, аврах 54 дүгээр ангийн алба хаагчид 1.5 км замыг туулан 13:47 цагт очиход иргэн С-ийн 2х4 метрийн хэмжээтэй зуны амбаар бүрэн шатаж байсныг 30 минут ажиллаж унтраасан.

- Өмнөговь аймаг, Ханбогд сум. Жавхлант багийн Баян хөөврийн 6 дугаар гудамжинд айлын хашаанд өвс шатаж байна гэсэн дуудлагыг 03.12-ны өдрийн 20:13 цагт хүлээн авсан. Тус аймгийн Онцгой байдлын газрын Ханбогд сум дахь Гал түймэр унтраах, аврах 66 дугаар ангийн алба хаагчид 2.5 км замыг туулан 20:17 цагт очиход иргэн Н-ийн 150 боодол өвс шатаж байсныг 41 минут ажиллаж унтраасан.

Геологийн гаралтай аюулт үзэгдэл: 

- Баян-Өлгий аймаг, Улаанхус сум. 1, 2 дугаар багийн “Монгол гол”, “Их-Ойгор” гэдэг газар /аймгийн төвөөс зүүн хойд зүгт 125 км, сумын төвөөс зүүн хойд зүгт 80 км/-т уулын цас хайлж айл, өрхүүд шар усны үерт автсан тухай дуудлагыг 03.12-ны өдрийн 10:00 цагт хүлээн авсан. Тус аймгийн Онцгой комиссын Шуурхай штабын даргын шийдвэрээр Онцгой байдлын газрын Гал түймрийн улсын хяналтын байцаагч, хошууч Х.Ербуланаар ахлуулсан алба хаагчид мэргэжлийн ангийн 2 хүн, орон нутгийн 2 иргэнтэй хамтран 125 км замын туулан 15:15 цагт очиход 4 айл шар усны үерт автах эрсдэлтэй байсан тул урьдчилан сэргийлэх зорилгоор 40 см өндөртэй, 150 метр урттай далан байгуулсан. 03.13-ны өдөр ажиллагаа үргэлжилнэ.

- Өвөрхангай аймаг, Хужирт сум. Шивээт 4 дүгээр багийн 24 дүгээр гудамжинд уулын цас хайлж 3 айлын гэр хөрсний шар усны үерт автсан тухай дуудлагыг 03.12-ны өдрийн 15:15 цагт хүлээн авсан. Тус аймгийн Онцгой байдлын газрын Хужирт сум дахь Эрэн хайх, аврах бүлгийн алба хаагчид сумын мэргэжлийн ангийн 7 хүнтэй хамтран 3 км замыг туулан 15:24 цагт очиход иргэн Б, А, Э нарын нийт 3 айлын 5 ханатай гэр хөрсний шар усанд автсан байсныг 4 цаг 34 минут ажиллаж аюулгүй газарт нүүлгэн шилжүүлсэн.

Хүний үйл ажиллагаатай холбоотой осол:

- Улаанбаатар хот, Сонгинохайрхан дүүрэг. Сонгинохайрхан дүүргийн 21 дүгээр хорооны 22-ын товчооноос Тахилт руу явах замд шинэ замын нүхэн гарц дотор ачааны автомашин /портер/ усанд суусан тухай дуудлагыг 03.13-ны өдрийн 02:48 цагт хүлээн авсан. Нийслэлийн Аврах ангийн алба хаагчид 19 км замыг туулан 03:12 цагт очиход иргэн Б-ийн  “Hyundai Porter” загварын ачааны автомашин шар усны усанд суусан байсныг 25 минут ажиллаж татан гаргасан.

Ус, цаг уурын гаралтай аюулт үзэгдэл: 

- Завхан аймаг, Улиастай сум. Богдын гол багийн Даян хэсэгт үерийн хамгаалалтын даланг давж голын ус хашаанд орсон тухай дуудлагыг 03.11-ний өдрийн 13:03 цагт хүлээн авсан. Тус аймгийн Онцгой байдлын газрын орлогч, УСТ-ийн дарга, дэд хурандаа Х.Баярсайханаар ахлуулсан алба хаагчид сумын мэргэжлийн ангийн 3 хүнтэй хамтран  2 км замыг туулан 09:35 цагт очиж 150 м3 шороог зөөвөрлөж 131 метр үерийн хамгаалалтын даланг сэргээн засварлах ажлыг зохион байгуулан 8 цаг 05 минут ажилласан.

- Баян-Өлгий аймаг, Ногооннуур сум. Цагааннуур тосгон 9 дүгээр багийн “Хар говь” гэдэг газар /аймгийн төвөөс баруун хойд зүгт 50 км/-т зам, даваа цасанд боогдож, зорчих хөдөлгөөн хязгаарлагдсан тул малчдад өвс, тэжээл хүргэх, цасанд боогдсон зам, давааг нээх тухай хүсэлтийг 03.12-ны өдрийн 11:30 цагт хүлээн авсан. Тус аймгийн Онцгой комиссын Шуурхай штабын даргын шийдвэрээр Онцгой байдлын газрын Гал түймэр унтраах, аврах 31 дүгээр ангийн алба хаагчид 50 км замыг туулан 13:50 цагт очиж нийт 8 цаг ажиллаж 6 км замын цасыг цэвэрлэж автозамын зорчих хөдөлгөөнийг нээсэн.

ОНЦГОЙ БАЙДЛЫН ЕРӨНХИЙ ГАЗАР