Цаг агаар:

Өнгөрсөн хоногт: Нийт нутгаар цаг агаар тогтуун байсан.

Өнөөдөр: Нийт нутгаар багавтар үүлтэй, цас орохгүй. Ихэнх нутгаар баруун хойноос секундэд 5-10 метр. Шөнөдөө Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр -39...-44 градус, Монгол-Алтай, Хөвсгөлийн уулархаг нутаг, Ерөө, Туул голын хөндийгөөр -32...-37 градус, Хангай, Хэнтийн уулархаг нутаг, Эг, Үүр, Сэлэнгэ, Хараа, Тэрэлж, Хэрлэн голын хөндийгөөр -26...-31 градус, бусад нутгаар -22...-27 градус, өдөртөө Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр -25...-30 градус, Алтай, Хангай, Хөвсгөл, Хэнтийн уулархаг нутаг, Эг, Үүр, Хараа, Ерөө, Туул, Хэрлэн голын хөндийгөөр -17...-22 градус, Хангайн нурууны өвөр бэл, говийн бүс нутгийн баруун өмнөд хэсгээр -7...-12 градус, бусад нутгаар -12...-17 градус хүйтэн байна.

Улаанбаатар хотод: Их төлөв цэлмэг. Салхи баруун хойноос секундэд 4-9 метр. Шөнөдөө Яармаг-Сонгины орчмоор -32...-34 градус, бусад хэсгээр -25...-27 градус, өдөртөө -12...-14 градус хүйтэн байна.

Төлөв байдал: 28-нд зүүн аймгуудын нутгийн зарим газраар цас орно. Бусад хугацаанд нийт нутгаар цас орохгүй. Салхи ихэнх хугацаанд секундэд 5-10 метр, 28-нд тал хээрийн нутгаар секундэд 12-14 метр хүрч ширүүснэ. Ихэнх нутгаар хүйтний эрч өдөртөө бага зэрэг суларч Увс нуур болон Дархадын хотгор, Завхан голын эх, Идэр, Тэс голын хөндийгөөр шөнөдөө -36...-41 градус, өдөртөө -23...-28 градус, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө -29...-34 градус, өдөртөө -16...-21 градус, Хангайн нурууны өвөр бэл, говийн бүс нутгийн баруун өмнөд хэсгээр шөнөдөө -15...-20 градус, өдөртөө -5...-10 градус, бусад нутгаар шөнөдөө -21...-26 градус, өдөртөө -11...-16 градус хүйтэн байна.

Гал түймэр: 

- ААН, байгууллагын өмчид гарсан: Улаанбаатар хот, Чингэлтэй дүүрэг 6 дугаар хороо төв хогийн цэг шатаж байна гэсэн дуудлагыг 01.23-ны өдрийн 21:56 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн  алба хаагчдыг очиход 2х3 метрийн хэмжээтэй хогийн цэг шатаж байсныг  ажиллаж унтраасан.

 Хувийн өмчид гарсан: Төв аймаг, Аргалант сум Хөшөөт багийн "Жирмийн цагаан нуур" гэдэг газар /аймгийн төвөөс баруун зүгт 131 км, сумын төвөөс зүүн зүгт 13 км/-т 01.23-ны өдрийн 05:00 цагт иргэн Б-ын 5 ханатай гэр, эд зүйлсийн хамт бүрэн шатсан тухай мэдээллийг 01.23-ны өдрийн 07:00 цагт хүлээн авсан.  Тус сумын Засаг даргын Тамгын газрын ажилтнууд, сумын Эрүүл мэндийн төвийн ажилтнууд ажиллаж унтраасан. Тус гал түймэрт иргэн Б/28 настай, эрэгтэй/-ын нүүр, толгойн ар тал, 2 гарын алга, хуруу, охин Ц /4 настай, эмэгтэй/-гийн 2 гарын сарвуу, 2 хөлийн ар талын булчин, хонго, цээжний хэсэг түлэгдсэнийг Аргалант сумын Эрүүл мэндийн төвийн их эмч  эмнэлгийн анхны тусламж үзүүлэн эмнэлгийн автомашинаар мөн өдрийн 07:25 цагт гэр бүлийн хамт авч 09:00 цагт Улаанбаатар хотын Гэмтэл согог судлалын үндэсний төв эмнэлэгт тээвэрлэн хүргэсэн.

Улаанбаатар хот, Сонгинохайрхан дүүрэг 23 дугаар хороо, Хангай  22 дугаар гудамжинд байшин шатаж байна гэсэн дуудлагыг 01.23-ны өдрийн 08:06 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчдыг очиход иргэн Э-ын 5х4 метрийн хэмжээтэй байшингийн дээврийн хэсэг шатаж  байсныг ажиллаж унтраасан.

Улаанбаатар хот, Чингэлтэй дүүрэг 23 дугаар хороо, Зүрх-Уулын 3 дугаар гудамжинд байшин шатаж байна гэсэн дуудлагыг 01.24-ний өдрийн 00:22 цагт хүлээн авсан. Сүхбаатар дүүргийн Онцгой байдлын хэлтсийн Гал түймэр унтраах аврах 34 дүгээр ангийн алба хаагчдыг очиход иргэн Э-ын5х8 метрийн хэмжээтэй байшингийн дотор тал, дээврийн хэсэг шатаж байсныг ажиллаж унтраасан.

ОНЦГОЙ БАЙДЛЫН ЕРӨНХИЙ ГАЗАР