Цаг агаар:

Өнгөрсөн хоногт: Нийт нутгаар цаг агаар тогтуун байлаа.

Өнөөдөр: Нутгийн баруун  хагаст  үүлшиж, баруун аймгуудын ихэнх нутгаар цас орно. Бусад нутгаар багавтар үүлтэй, цас орохгүй. Салхи нутгийн баруун хэсгээр баруун өмнөөс хойш эргэж, бусад нутгаар баруун хойноос 5-10 м/с. Увс нуур болон Дархадын хотгор, Завхан голын эх, Идэр, Тэс голын хөндийгөөр -33-38 градус, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул,  Халх голын хөндий, Дарьгангын тал нутгаар -26-31 градус, Монгол-Алтайн уулархаг нутаг, Их нууруудын хотгор, говийн бүс нутгийн баруун өмнөд хэсгээр -8-13 градус, Хангайн нурууны өвөр бэл, говийн бүс нутгийн өмнөд хэсгээр -14-19 градус, бусад нутгаар -21-26 градус хүйтэн байна.

Улаанбаатар хотод: Багавтар үүлтэй, цас орохгүй. Салхи баруун хойноос 3-8 м/с, -21-23 градус хүйтэн байна.

Төлөв байдал: 22-ны өдөр баруун аймгуудын нутгийн зүүн, төв болон говийн аймгуудын нутгийн баруун хэсэг, 24-ний өдөр зүүн аймгуудын нутгийн хойд хэсгээр цас орж, 25-ны өдөр Хэнтийн уулархаг нутаг, Онон, Улз, Халх голын хөндийгөөр цас орж, зөөлөн цасан шуурга шуурна. Салхи ихэнх хугацаанд  5-10 м/с. 24, 25-ны өдөр тал, хээрийн нутгаар 12-14 м/с хүрч ширүүснэ. 23-ны өдрөөс ихэнх нутгаар хүйтний эрч суларч Дархадын хотгор, Завхан голын эх, Идэр, Тэс, Ерөө голын хөндийгөөр шөнөдөө -37-42 градус, өдөртөө -24-29 градус, Увс нуурын хотгор, Хангай, Хөвсгөлийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Туул, Тэрэлж голын хөндийгөөр шөнөдөө -32-37 градус, өдөртөө -20-25 градус, Хэнтийн уулархаг нутаг, Хэрлэн, Онон, Улз, Халх голын хөндий, Дарьгангын тал нутгаар шөнөдөө -26-31 градус, өдөртөө -14-19 градус, Их нууруудын хотгор, Хангайн нурууны өвөр бэл, говийн бүс нутгийн баруун өмнөд хэсгээр шөнөдөө -15-20 градус, өдөртөө -3-8 градус, бусад нутгаар шөнөдөө -21-26 градус, өдөртөө -9-14 градус хүйтэн байна.

Гал түймэр: 

- Хувийн өмчид гарсан: Улаанбаатар хот, Хан-Уул дүүрэг 12 дугаар хороо суудлын автомашин байна гэсэн дуудлагыг 12.20-ны өдрийн 07:31 цагт хүлээн авсан.  Тус дүүргийн Онцгой байдлын хэлтсийн Гал түймэр унтраах, аврах 65 дугаар ангийн алба хаагчдыг очиход иргэн Л-ийн Ниссан тийда загварын суудлын автомашины хөдөлгүүрийн хэсэг шатаж байсныг  ажиллаж унтраасан.

Улаанбаатар хот, Баянзүрх дүүрэг 31 дүгээр хороо, Монелийн 1 дүгээр гудамжинд байшин шатаж байна гэсэн дуудлагыг 12.20-ны өдрийн 18:40 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчдыг очиход иргэн О-ын 12х21 метрийн хэмжээтэй нийтийн байрны 3х3 метрийн хэмжээтэй галлагааны өрөөний дээврийн хэсэг шатаж байсныг  ажиллаж унтраасан.

Улаанбаатар хот, Баянзүрх дүүрэг 28 дугаар хороо, Хужирбулангийн 4 дүгээр хэсгийн 46 дугаар гудамжинд байшин шатаж байна гэсэн дуудлагыг 12.20-ны өдрийн 18:58 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчдыг очиход иргэн Б-ын 8х10 метрийн хэмжээтэй байшингийн зүүн хана, 4х6 метрийн хэмжээтэй гарааш,  Приус-20 загварын суудлын автомашин шатаж байсныг  ажиллаж унтраасан.

Хүний үйл ажиллагаатай холбоотой осол:

Цасанд суусан: Дундговь аймаг, Цагаандэлгэр сум 3 дугаар багийн “Суварга” гэдэг газар /аймгийн төвөөс зүүн хойд зүгт 180 км-т, сумын төвөөс зүүн урд зүгт 25 км-т/Говьсүмбэр аймгаас Дундговь аймгийн чиглэлд зорчиж явсан 1 зорчигчтой суудлын автомашин цасанд суусан тухай дуудлагыг 12.20-ны 14:12 цагт хүлээн авсан.  Говьсүмбэр аймгийн Онцгой байдлын газрын Эрэн хайх аврах бүлгийн алба хаагчдыг очиход иргэн А-ын  “Тоёота приус-20” загварын суудлын автомашин цасанд суусан байсныг ажиллан татан гаргасан

Дундговь аймаг, Баянжаргалан сум 1 дүгээр багийн “Тогоо булаг” гэдэг газар /аймгийн төвөөс зүүн урд 150 км-т, сумын төвөөс зүүн урд зүгт 40 км-т/ Баянжаргалан сумаас Говьсүмбэр аймгийн чиглэлд зорчиж явсан 5 зорчигчтой суудлын автомашин цасан суусан тухай дуудлагыг 12.21-ний өдрийн 02:49 цагт хүлээн авсан. Говьсүмбэр аймгийн Шивээговь сумын мэргэжлийн ангийн алба хаагчдыг очиход иргэн Д-ийн Тоёота приус-20"загварын суудлын автомашин цасанд суусан байсныг ажиллаж татан гаргасан.

Голын мөсөнд цөмөрсөн: Улаанбаатар хот, Налайх дүүрэг 1 дүгээр хороо, “Их ам” гэдэг газар Суудлын автомашин Туул голын мөсөнд цөмөрч суусан тухай дуудлагыг 12.21-ний өдрийн 03:10 цагт хүлээн авсан. Тус дүүргийн Онцгой байдлын хэлтсийн Эрэн хайх, аврах бүлгийн алба хаагчдыг очиход иргэн У-ын Тоёота приус-30 загварын суудлын автомашин, иргэн  Б-ийн  Мини күүпер загварын суудлын автомашинууд “Туул” голын мөсөнд цөмөрсөн суусан байсныг  ажиллаж татан гаргасан.