Цаг агаар:

Өнгөрсөн хоногт: Дорнод аймгийн 1 суманд 1 мм цас орсон. Зүүн бүсийн нийт нутгаар 12-13 м/с, зарим үед 16 м/с хүрч хүчтэй салхилж, шороон шуургатай байсан. Бусад нутгаар цаг агаар тогтуун байсан.

 Өнөөдөр: Ихэнх нутгаар солигдмол үүлтэй. Нийт нутгаар хур тунадас орохгүй. Салхи нутгийн зүүн хэсгээр баруун хойноос, бусад нутгаар баруунаас секундэд 5-10 метр, тал, хээрийн нутгаар секундэд 13-15 метр хүрч ширүүснэ. Дархадын хотгор, Завхан голын эх, Хүрэнбэлчир орчим, Хэнтийн уулархаг нутаг, Сэлэнгэ, Ерөө, Тэс, Туул, Тэрэлж, Хэрлэн, Онон, Улз, Халх голын хөндийгөөр +4...+9 градус, Их нууруудын хотгор, говийн бүс нутгийн өмнөд хэсгээр +16...+21 градус, бусад нутгаар +9...+14 градус дулаан байна.

  Улаанбаатар хотод: Багавтар үүлтэй, хур тунадас орохгүй, салхи баруун хойноос секундэд 6-11 метр, +10...+12 градус дулаан байна.

Төлөв байдал: 24-нд баруун аймгуудын нутгийн хойд, төвийн аймгуудын нутгийн баруун хойд хэсэг, зүүн аймгуудын нутгийн зарим газраар, 25-нд баруун аймгуудын нутгийн зүүн хойд хэсэг, төв болон зүүн аймгуудын нутгийн зарим газраар бороо, нойтон цас орж, явган шуурга шуурна. Салхи 23, 25-нд говь, тал, хээрийн нутгаар, 24-нд Монгол-Алтайн уулархаг нутаг, говь, тал, хээрийн нутгаар секундэд 14-16 метр хүрч ширүүсэж, шороон шуурга шуурна. Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс, Тэрэлж голын хөндийгөөр шөнөдөө -4...-9 градус хүйтэн, өдөртөө +6...+11 градус, Их нууруудын хотгор, говийн бүс нутгийн хойд хэсгээр шөнөдөө +3...+8 градус, өдөртөө +17...+22 градус, говийн бүс нутгийн өмнөд хэсгээр шөнөдөө +8...+13 градус, өдөртөө +22...+27 градус бусад нутгаар шөнөдөө -2...+3 градус, өдөртөө +12...+17 градус дулаан байна. 23-наас нутгийн зүүн хэсгээр бага зэрэг сэрүүснэ.

Гал түймэр:

Улаанбаатар хот, Сонгинохайрхан дүүрэг 33 дугаар хороо байшин шатаж байна гэсэн дуудлагыг 04.20-ны өдрийн 10:34 цагт хүлээн авсан.  Тус дүүргийн Онцгой байдлын хэлтсийн 26 дугаар ангийн алба хаагчдыг очиход иргэн Б-ын 7х8 метрийн хэмжээтэй байшингийн дээврийн хэсэг шатсаны улмаас хажуу хашааны иргэн Т-ийн 6 хантай гэр хайрагдан шатаж байсныг  ажиллаж унтраасан. 

Завхан аймаг, Дөрвөлжин сум Баян-Ухаа баг /аймгийн төвөөс зүүн зүгт 220 км-т, Тосонцэнгэл сумаас зүүн зүгт 45 км-т/с байшин шатаж байна гэсэн дуудлагыг 04.20-ны өдрийн 11:59 цагт хүлээн авсан.  Тус аймгийн Онцгой байдлын газрын Тосонцэнгэл сум дахь 39 дүгээр ангийн алба хаагчдыг очиход иргэн У-ын 10х12 метрийн хэмжээтэй байшин шатаж байсныг  ажиллаж унтраасан.

Улаанбаатар хот, Баянгол дүүрэг 23 дугаар хороо хогийн цэгт хог шатаж байна гэсэн дуудлагыг 04.20-ны өдрийн 13:37 цагт хүлээн авсан. Чингэлтэй дүүргийн Онцгой байдлын хэлтсийн 10 дугаар ангийн алба хаагчдыг очиход 2х4 метрийн хэмжээтэй хогийн цэгт хог шатаж байсныг ажиллаж унтраасан. 

Орхон аймаг, Баян-Өндөр сум Их залуу шанд баг байшингийн дээвэр шатаж байна гэсэн дуудлагыг 04.20-ны өдрийн 23:06 цагт хүлээн авсан. Тус аймгийн Онцгой байдлын газрын 81 дүгээр ангийн алба хаагчдыг очиход, иргэн Н-ийн 8х10 метрийн хэмжээтэй 2 давхар тоосгон байшингийн дээвэр шатаж байсныг ажиллаж унтраасан.

ОНЦГОЙ БАЙДЛЫН ЕРӨНХИЙ ГАЗАР