Цаг агаар:

Өнгөрсөн хоногт: Нийт нутгаар цаг агаар тогтуун байлаа.

  Өнөөдөр: Нутгийн хойд хэсгээр солигдмол үүлтэй, бусад нутгаар багавтар үүлтэй. Нийт нутгаар цас орохгүй. Салхи нутгийн зүүн хагаст баруун хойноос, бусад нутгаар баруунаас секундэд 3-8 метр. Увс нуур болон Дархадын хотгор, Завхан, Заг-Байдраг голын эх, Идэр, Тэс, Сэлэнгэ, Ерөө голын хөндий, Орхон-Туулын бэлчирээр -31...-36 градус, Хангай, Хөвсгөл, Хэнтийн уулархаг нутаг, Эг, Үүр, Орхон, Хараа, Хэрлэн, Халх голын хөндий, Дорнод-Дарьгангын тал нутгаар -25...-30 градус, Алтайн уулархаг нутаг, Хангайн нурууны өвөр бэлээр -16...-21 градус, говийн бүс нутгийн баруун өмнөд хэсгээр -11...-16 градус, бусад нутгаар -21...-26 градус хүйтэн байна.  

  Улаанбаатар хотод: Багавтар үүлтэй, цас орохгүй, салхи баруун хойноос секундэд 2-7 метр, агаарын температур өчигдөр өдрөөс 3 градусаар дулаарч -21...-23 градус хүйтэн байна.

Төлөв байдал: 24-нд Увс нуурын хотгор болон Алтай, Хангай, Хөвсгөлийн уулархаг нутгаар, 25-нд баруун аймгуудын нутгийн хойд хэсэг, төвийн аймгуудын нутгийн зарим газар, зүүн аймгуудын нутгийн баруун хэсгээр, 26-нд зүүн аймгуудын нутгаар цас орж, явган шуурга шуурна. Салхи 19-23-нд ихэнх нутгаар их төлөв баруун хойноос секундэд 3-8 метр, 24-25-нд ихэнх нутгаар баруун өмнөөс хойш эргэж секундэд 5-10 метр, нутгийн зарим газраар секундэд 12-14 метр хүрч ширүүснэ. Агаарын температур 22-ныг хүртэл ихэнх нутгаар хүйтэн хадгалагдаж, Увс нуурын болон Дархадын хотгор, Завхан голын эх, Хүрэнбэлчир орчим, Идэр, Тэс голын хөндий, Орхон-Туулын бэлчирээр шөнөдөө -43...-48 градус, өдөртөө -31...-36 градус, Алтай, Хангай, Хөвсгөл, Хэнтийн уулархаг нутаг, Орхон, Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө -36...-41 градус, өдөртөө -25...-30 градус, говийн бүс нутгийн өмнөд хэсгээр шөнөдөө -20...-25 градус, өдөртөө -10...-15 градус, говийн бүс нутгийн хойд хэсгээр шөнөдөө -25...-30 градус, өдөртөө -15...-20 градус, бусад нутгаар шөнөдөө -30...-35 градус, өдөртөө -20...-25 градус хүйтэн байна. 23-наас нутгийн баруун хэсгээр цаашдаа ихэнх нутгаар хүйтний эрч суларна.

Гал түймэр:

Хөвсгөл аймаг, Тариалан сум 3 дугаар баг /аймгийн төвөөс зүүн зүгт 178 км, сумын төвөөс зүүн зүгт 18 км/ хураалттай өвс шатаж байна гэсэн дуудлагыг 01.20-ны өдрийн 06:42 цагт хүлээн авсан.  Тус аймгийн Онцгой байдлын газрын Тариалан сум дахь 46 дугаар ангийн алба хаагчдыг очиход иргэн Б-ийн 6х6 метрийн хэмжээтэй өвөлжөөний дээвэр, хураалттай өвс шатаж байсныг ажиллаж унтраасан.

Улаанбаатар хот, Баянзүрх дүүрэг 24 дүгээр хороо суудлын автомашин шатаж байна гэсэн дуудлагыг 01.20-ны өдрийн 10:20 цагт хүлээн авсан. Тус дүүргийн Онцгой байдлын хэлтсийн 63 дугаар ангийн алба хаагчдыг очиход иргэн Э-ын  “Приус-30” загварын автомашины хөдөлгүүр шатаж байсныг  ажиллаж унтраасан. 

Улаанбаатар хот, Чингэлтэй дүүрэг 15 дугаар хороо суудлын автомашин, амбаар шатаж  байна гэсэн дуудлагыг 01.20-ны өдрийн 13:11 цагт хүлээн авсан. Сүхбаатар дүүргийн Онцгой байдлын хэлтсийн 34 дүгээр ангийн алба хаагчдыг очиход иргэн Т-ийн  “Премио” загварын суудлын автомашины хөдөлгүүр, 5х4 метрийн хэмжээтэй амбаар шатаж байсныг  ажиллаж унтраасан. 

Улаанбаатар хот, Сонгинохайрхан дүүрэг 41 дүгээр хороо байшин шатаж байна гэсэн дуудлагыг 01.21-ний өдрийн 01:16 цагт хүлээн авсан. Тус дүүргийн Онцгой байдлын хэлтсийн 29 дүгээр ангийн алба хаагчдыг очиход иргэн Б-ын 8х5 метрийн хэмжээтэй байшингийн дээвэр шатаж байсныг ажиллаж унтраасан.

Хүний үйл ажиллагаатай холбоотой осол:

Увс аймаг, Тариалан сум Бургастай багийн “Морьт” гэдэг  газар /аймгийн төвөөс баруун урд зүгт 66 км-т, сумын төвөөс урд зүгт 47 км-т/  Суудлын автомашин цасанд суусан тухай дуудлагыг 01.20-ны өдрийн 20:10 цагт хүлээн авсан.  Тус аймгийн Онцгой байдлын газрын  Эрэн хайх, аврах салбарын алба хаагчдыг очиход Баян-Өлгий аймгаас Увс аймгийн чиглэлд 3 зорчигчтой зорчиж явсан иргэн Б-ийн  “Ford Expedition” загварын суудлын автомашин  цасанд суусан байсныг татан гаргасан.

ОНЦГОЙ БАЙДЛЫН ЕРӨНХИЙ ГАЗАР