Цаг агаар: 

Өнгөрсөн хоногт: Нийт нутгаар цаг агаар тогтуун байлаа.

Өнөөдөр: Ихэнх нутгаар багавтар үүлтэй. Нийт нутгаар цас орохгүй.   Салхи нутгийн баруун хэсгээр баруунаас, бусад нутгаар баруун хойноос 5-10 м/с, зүүн аймгуудын нутгийн зарим газраар 12-14 м/с хүрч ширүүснэ. Увс нуур болон Дархадын хотгор, Завхан, Заг-Байдраг голын эх, Идэр, Тэс голын хөндийгөөр -24...-29 градус, Увс нуурын хотгор, Хангай, Хөвсгөл, Хэнтийн уулархаг нутаг, Эг, Үүр, Орхон, Сэлэнгэ, Хараа, Хэрлэн, Халх голын хөндийгөөр -18...-23 градус, Хангайн нурууны өвөр бэл, говийн бүс нутгийн өмнөд хэсгээр -6...-11 градус, бусад нутгаар -12...-17 градус хүйтэн байна.

Улаанбаатар хотод: Багавтар үүлтэй, цас орохгүй. Салхи баруун хойноос 5-10 м/с, -15...-17 градус хүйтэн байна.

Төлөв байдал: 03-нд Хэнтийн уулархаг нутгаар цас орно. Бусад хугацаанд нийт нутгаар цас орохгүй. Салхи ихэнх хугацаанд 5-10 м/с, 31 болон 1-р сарын 03, 04-нд зүүн аймгуудын нутгийн зарим газраар 12-14 м/с хүрч ширүүснэ. Дархадын хотгор, Завхан, голын эх, Хүрэнбэлчир орчим, Идэр, Тэс голын хөндийгөөр шөнөдөө -35...-40 градус, өдөртөө -24...-29 градус, Хангай, Хөвсгөл, Хэнтийн уулархаг нутаг, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн Онон, Улз, Халх голын хөндийгөөр шөнөдөө -29...-34 градус, өдөртөө -18...-23 градус, Хангайн нурууны өвөр бэл, говийн бүс нутгийн өмнөд хэсгээр шөнөдөө -13...-18 градус, өдөртөө -4…-9 градус, бусад нутгаар шөнөдөө -23…-28 градус, өдөртөө -11...-16 градус хүйтэн байна. 2026 оны 01 дүгээр сарын 01-нээс ихэнх нутгаар хүйтний эрч суларна.

Гал түймэр: 

Сонгинохайрхан дүүргийн 22 дугаар хороонд гэр шатаж байна гэсэн дуудлагыг 12.29-ний өдрийн 16:39 цагт хүлээн авлаа. Тус дүүргийн Онцгой байдлын хэлтсийн 26 дугаар ангийн алба хаагчид очиход иргэн  М-ын 5 ханатай гэр болон эд зүйлс, мөн иргэн У-ийн 5 ханатай гэрийн зүүн талын хэсэг хайрагдаж байсныг 10 минут ажиллаж унтраасан. 

Сэлэнгэ аймгийн Сүхбаатар сумын Боргүвээ багт байшингийн дээвэр шатаж байна гэсэн дуудлагыг 12.30-ны өдрийн 01:38 цагт хүлээн авсан. Тус аймгийн Онцгой байдлын газрын 36 дугаар ангийн алба хаагчдыг очиход иргэн Б-ы 6х7 метрийн хэмжээтэй байшингийн дээврийн хэсэг шатаж байсныг 1 цаг 4 минут ажиллаж унтраасан.

Өмнөговь аймгийн Цогтцэций сумын Сийрст багт гэр шатаж байна гэсэн дуудлагыг 12.30-ний өдрийн 02:26 цагт хүлээн авсан. Тус аймгийн Онцгой байдлын газрын Цогтцэций сум дахь 44 дүгээр ангийн алба хаагчдыг очиход иргэн  Б-ын 4 ханатай гэр, эд зүйлс шатаж байсныг 17 минут ажиллаж унтраасан.

Дорноговь аймгийн Даланжаргалан сумын Цомог багийн “Болор” гэдэг газар /айраг сумын төвөөс баруун хойд зүгт 27 км/ ачааны автомашин шатаж байна гэсэн дуудлагыг 12.30-ны өдрийн 05:49 цагт хүлээн авсан. Тус аймгийн Онцгой байдлын газрын Айраг сум дахь 23 дугаар ангийн алба хаагчид очиход мах тээвэрлэж явсан иргэн Б-ийн “Volvo FH12” загварын зүтгүүрийн чиргүүл шатаж байсныг 2 минут ажиллаж унтраасан.

Сэлэнгэ аймгийн Мандал сумын Баян-Арцат багт байшин шатаж байна гэсэн дуудлагыг 12.30-ны өдрийн 07:01 цагт хүлээн авсан. Тус амгийн Онцгой байдлын газрын 19 дүгээр ангийн алба хаагчдыг очиход иргэн У-ын 10х11 метрийн хэмжээтэй байшин дотор эд хогшил шатаж байсныг 23 минут ажиллаж унтраасан.

ОНЦГОЙ БАЙДЛЫН ЕРӨНХИЙ ГАЗАР