Цаг агаар: 

Өнгөрсөн хоногт: Төвийн аймгуудын зүүн хэсэг болон зүүн аймгуудын нутгийн зарим газраар ялимгүй хур тундас орсон. Бусад нутгаар цаг агаар тогтуун байлаа.

Өнөөдөр: Ихэнх нутгаар солигдмол үүлтэй. Баруун болон төвийн аймгуудын нутгийн хойд, зүүн аймгуудын нутгийн баруун хойд хэсгээр бороо, нойтон цас орно. Бусад нутгаар хур тунадас орохгүй. Салхи нутгийн хойд хэсгээр баруунаас баруун хойш эргэж, бусад нутгаар баруун өмнөөс 6-11 м/с, Алтайн уулархаг нутаг, говь, тал, хээрийн нутгаар түр зуур 16-18 м/с хүрч ширүүсэж, шороон шуурга шуурна. Увс нуур болон Дархадын хотгор, Хангай, Хөвсгөлийн уулархаг нутаг, Завхан голын эх, Идэр, Тэс, Эг, Үүр голын хөндийгөөр +1...+6 градус, Хангай нурууны өвөр бэл, говийн бүс нутгийн зүүн өмнөд хэсгээр +14...+19 градус, Их нууруудын хотгор, говийн бүс нутгийн баруун өмнөд хэсгээр +21...+26 градус, бусад нутгаар +6...+11 градус дулаан байна.

Улаанбаатар хотод: Үүлшинэ, ялимгүй хур тунадас орно. Салхи баруунаас баруун хойш эргэж 6-11 м/с, +7...+9 градус дулаан байна.

Төлөв байдал: 24-нд баруун болон зүүн аймгуудын нутгийн хойд хэсэг, төвийн аймгуудын ихэнх нутгаар, 25-нд нутгийн хойд хэсгээр, 26-нд баруун болон төвийн аймгуудын нутгийн зарим газраар, 27-нд нутгийн баруун өмнөд хэсгээр бороо, нойтон цас, цас орж, цасан шуурга шуурна. Салхи 24-нд ихэнх нутгаар, 25-нд нутгийн зарим газраар, 26, 27-нд нутгийн өмнөд хэсгээр 15-17 м/с, зарим үед 20 м/с хүрч ширүүсэж, шороон шуурга шуурна. 24-нөөс нутгийн хойд хэсгээр сэрүүсэж Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө -8...-13 градус хүйтэн, өдөртөө -2...+3 градус дулаан, Алтай, Хангай, Хөвсгөл, Хэнтийн уулархаг нутаг, Орхон, Сэлэнгэ, Хараа, Ерөө, Туул, Тэрэлж голын хөндийгөөр шөнөдөө -4...-9 градус хүйтэн, өдөртөө 0...+5 градус, говийн бүс нутгийн өмнөд хэсгээр шөнөдөө 0...+5 градус, өдөртөө +14...+19 градус дулаан, бусад нутгаар шөнөдөө 0...-5 градус хүйтэн, өдөртөө +4...+9 градус дулаан байна

Гал түймэр: Объектын түймэр:

Өмнөговь аймгийн Даланзадгад сумын Чандмань баг гэр шатаж байна гэсэн дуудлагыг 04.22-ны өдрийн 11:01 цагт хүлээн авсан. Тус аймгийн Онцгой байдлын газрын Гал түймэр унтраах, аврах 21 дүгээр ангийн алба хаагчдыг очиход иргэн Г-ын 5 ханатай гэр шатаж байсныг ажиллаж унтраасан.        

Улаанбаатар хот, Баянзүрх дүүрэг 12 дугаар хороо байшин шатаж байна гэсэн дуудлагыг 04.22-ны өдрийн 15:04 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчдыг очиход иргэн Ц-ийн 5х6 метрийн хэмжээтэй байшингийн дотор талын хана, таазны хэсэг шатаж байсныг ажиллаж унтраасан. 

Улаанбаатар хот, Сонгинохайрхан дүүрэг 26 дугаар хороо байшингийн дээвэр шатаж байна гэсэн дуудлагыг 04.22-ны өдрийн 17:52 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчдыг очиход иргэн Б-ийн 6х7 метрийн хэмжээтэй байшингийн дээврийн хэсэг шатаж байсныг ажиллаж унтраасан.

Өмнөговь аймаг, Цогтцэций сум Сийрст багийн “Гашуун сухайт” чиглэлийн авто замын зорчих хэсэгт /аймгийн төвөөс зүүн урд зүгт 112 км-т, сумын төвөөс зүүн урд зүгт 12 км-т/ ачааны автомашин шатаж байна гэсэн дуудлагыг 04.23-ны өдрийн 02:08 цагт хүлээн авсан. Тус аймгийн Онцгой байдлын газрын Цогтцэций сум дахь Онцгой байдлын хэлтсийн Гал түймэр унтраах, аврах 44 дүгээр ангийн алба хаагчдыг очиход  “Shaanxi-SX4251NT330” загварын зүтгүүрийн  бүхээгийн хэсэг шатаж байсныг ажиллаж унтраасан. Тус автомашины бүхээгт иргэн М/45 настай, эрэгтэй/ нас барсан байдалтай байсан тул хэргийн газрыг тус сум дахь Цагдаагийн хэлтсийн мөрдөгчид шилжүүлэн өгсөн.

Улаанбаатар хот, Баянзүрх дүүрэг 42 дугаар хороо орцонд утаажилт ихтэй байна гэсэн дуудлагыг 04.23-ны өдрийн 05:21 цагт хүлээн авсан.  Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчдыг очиход /16 давхар барилга/-ын 6 дугаар давхраас 11 дүгээр давхар хүртэлх цахилгааны хуваарилах самбар болон сувагчлал шатаж байсныг ажиллаж унтраасан. Утаажилтын бүсээс тус байрны 85 иргэнийг аюулгүй газарт гаргасан.

Ой, хээрийн түймэр:

Сүхбаатар аймаг, Эрдэнэцагаан сум Хадын булаг багийн "Гурван-Ус" гэдэг газар /аймгийн төвөөс зүүн урд 180 км-т, сумын төвөөс зүүн хойд 60 км-т/ Хээрийн гал түймэр гарсан тухай дуудлагыг 04.22-ны өдрийн 12:21 цагт хүлээн авсан. Тус аймгийн Онцгой байдлын газрын эрэн хайх, аврах салбар, Эрдэнэцагаан сум дахь Гал түймэр унтраах, аврах 47 дугаар ангийн алба хаагчид, орон нутгийн иргэд мөн өдрийн 15:17 цагт хээрийн гал түймрийг цурманд оруулж, 15:28 цагт бүрэн унтраасан. Урьдчилсан байдлаар түймэрт 80 га орчим талбай өртсөн.

Хүний үйл ажиллагаатай холбоотой осол:

Өвөрхангай аймаг, Хужирт сум Өвөрмодот багийн  “Шуудуу” гэдэг газар /аймгийн төвөөс зүүн хойд зүгт 70 км-т, сумын төвөөс зүүн зүгт 30 км-т/ Өвөрхангай аймгаас Хөвсгөл аймгийн чиглэлд зорчиж явсан 12 зорчигчтой суудлын шаварт суусан тухай дуудлагыг 04.22-ны өдрийн 09:38 цагт хүлээн авсан. Тус аймгийн Онцгой байдлын газрын Хужирт сум дахь Эрэн хайх, аврах бүлгийн алба хаагчдыг очиход иргэн Х-ын “Уаз-220695” загварын суудлын автомашин шаварт суусан байсныг 8 ажиллаж, татан гаргасан.

Баян-Өлгий аймаг, Цэнгэл сум Долоон гаталга багийн “Цагаан гол” гэдэг газар /аймгийн төвөөс баруун хойд зүгт 100 км-т, сумын төвөөс хойд зүгт 15 км-т/ 2 зорчигчтой түргэн тусламжийн суудлын автомашин шаварт суусан тухай дуудлагыг 04.22-ны өдрийн 00:00 цагт хүлээн авсан. Тус аймгийн Онцгой байдлын газрын Цэнгэл сум дахь Гал түймэр унтраах, аврах 71 дүгээр ангийн алба хаагчдыг очиход  “Уаз 220695” загварын суудлын автомашины шаварт суусан байсныг  ажиллаж, татан гаргасан.

ОНЦГОЙ БАЙДЛЫН ЕРӨНХИЙ ГАЗАР