Онцгой байдлын ерөнхий газрын дарга, Хошууч генерал Т.Бадрал

Онцгой байдлын албаны нийт офицер, ахлагч, ажилтан албан хаагчид аа,

     Эрхэм хүндэт ард иргэд ээ,

Онцгой байдлын байгууллага хуулиар хүлээсэн үүргээ нэр төртэй  биелүүлэхэд дэмжлэг үзүүлж байнга хамтран ажилладаг Монгол Улсын Засгийн газар, гамшгаас хамгаалах улсын албад болон төсөл хөтөлбөр хэрэгжүүлэн тусалж дэмждэг улс орон, олон улсын байгууллага, энэ байгууллагад ажиллаж байсан үе, үеийн удирдлага, ахмад үеийнхэн, одоо ажиллаж байгаа генерал, офицер, ахлагч, нийт албан хаагчид, хамтран зүтгэгч Та бүхэнд Монгол Улсад Онцгой байдлын байгууллага үүссэн байгуулагдсаны 15 жилийн ойн мэндийг өргөн дэвшүүлье!

Гамшгаас хамгаалах үндэсний чадавхыг бэхжүүлэх, гамшигтай тэмцэх, эрэн хайх, аврах, хор уршгийг арилгах, хойшлуулшгүй сэргээн босгох ажиллагааг дэлхий нийтийн хөгжлийн чиг хандлагад нийцүүлэх, Онцгой байдлын байгууллага, түүний харьяа анги, салбарыг олон улсын байгууллагын жишигт ойртуулан орчин үеийн мэргэжлийн байгууллага болгон хөгжүүлэх, эрх зүйн орчин нэгэнт тогтсон.  

Улс орны эдийн засгийн нөхцөл, төсөв хүндрэлтэй амаргүй үеийг туулж байгаа хэдий ч 2015 оноос хойш 42 анги, салбар, хэлтсийг шинээр байгуулж 900 гаруй алба хаагчаар эгнээгээ тэллээ. Гамшиг, аюулт үзэгдлийн үеийн удирдлага, зохион байгуулалт, оператив үйл ажиллагааг шуурхай зохион байгуулах, олон улсын жишигт хүргэх үүднээс Онцгой байдлын байгууллагын тогтолцоог 2016 оноос Бүсийн төвийн зохион байгуулалтад шилжүүллээ. Цаашид Онцгой байдлын байгууллага маань бүс нутгийн, дэлхийн хэмжээнд үйл ажиллагаагаа явуулдаг улам чадварлаг алба болон бэхжих нь дамжиггүй юм. 

Өнөөдөр Монгол Улсын тусгаар тогтнол, үндэсний аюулгүй байдлыг хангах, эх орон, байгаль дэлхий, ард иргэдээ болзошгүй аюул, ослоос авран хамгаалах хүндтэй, хариуцлагатай албыг гүйцэтгэсээр ирсэн Онцгой  байдлын байгууллагагүйгээр монголын ард түмэн өөрсдийн амьдралаа төсөөлөхөөргүй болжээ.

Энэ бүхэн бол та бүгдийн ажил үйлсийн үр дүн, энэ байгууллагын төлөө залуу халуун насаа зориулсан манай ахмад үеийнхний зүтгэл, эх орон, ард түмэн, албаныхаа төлөө алтан амиа зориулсан эрэлхэг зоригт хөвгүүдийн минь гавьяа юм. 

Улс орны тэргүүлэх салбар нь болсон онцгой байдлын байгууллагын алба хаагч байна гэдэг та бидний бахархал, нэр төрийн хэрэг бөгөөд өндөр үүрэг хариуцлага юм. 

Иймд бид мэдлэг, боловсрол, мэргэжлийн ур чадвараар нийгэмдээ тэргүүлэгч, манлайлагчид байж, өнөөдрийн түвшинд хүрсэн ололт, амжилтаа бататгаж, төр, ард түмнийхээ өмнө хүлээсэн үүргээ нэр төртэй биелүүлж, Онцгой байдлын алба улам бүр бэхжин өнө мөнх оршин тогтноно гэдэгт итгэлтэй байна.

Эр зориг, тэсвэр хатуужил, золбоо хийморь төгөлдөр хүмүүнлэгийн албаны яруу алдар үеийн үед мандан бадрах болтугай.